نصائح تربوية (1) – إزاى بنتى ربتنى؟!!!

*** المقالة دى يا جماعة رغم إسمها مش مقصورة على الناس إللى عندهم أولاد و بس و لإن النصايح إللى فيها يمكن تطبيقها على جميع العلاقات الإنسانية ***

إبتدت رحلتى الممتعة مع قراءة كتب تربية الأطفال لما بنتى كان عندها سنتين.

الحقيقة أنا بنتى مكنتش طفلة هادية (حتطلع هادية لمين ههههههههههه) و كنا عند دكتورتها و فضلت تلف و تدور و تتتحرك يمين و شمال و لسؤ حظى كان فيه سلم ففضلت اطلع و أنزل وراها زى المكوك و طبعا مكنتش سعيدة ! و كان نفسى تهمد شوية لغاية  ما جه دورنا و دخلت عند الدكتورة و أنا بنهج و “عرقى مرقى!!”. فالدكتورة إبتسمت لى و قالت: “ما شاء الله بنتك ذكية جدا. أنا لما بلاقى طفل عنده سنتين قاعد هادى بقلق على طول”

فساعتها تبدد تعبى فى لحظة و حمدت ربنا إن بنتى طفلة طبيعية و قررت أقرأ كتب تربوية علشان أأقدر أفهم طبيعة مراحل العمرية المختلفة لبنتى و إزاى أتعامل معاها صح.  و فيها إيه لما أنهج ورا بنتى إللى مبتهمدش؟ هو الرسول عليه السلام قال: “الجنة مش تحت أقدام الأمهات” من شوية؟

مسلسل ونيس فى أوائل أجزائه التى شاركت الفنان محمد صبحى البطولة فيها الفنانة الراحلة سعاد نصر كان فيها عبارة مؤثرة فى المقدمة تقول فيما معناه: إتفقت أنا و زوجتى أن نربى أبنائنا على الأخلاق و القيم و لكننا إكتشفنا أننا كنا نربى أنفسنا معهم.

أنا حصل لى كده بالظبط لإن من أوائل الدروس التربوية إللى إتعلمتها إنى مينفعش كلامى يكون عكس فعلى. ده أنا ممكن متكلمش خالص و الطفل بيقلد الأفعال. لكن لازم أكون قدوة لبنتى و إلا حتصدقنى إزاى؟!

فطبعا إتربيت تمام…زمن المشى حافية و الشرب من بزبوز الإزازة و غيره إنتهى لغير رجعة و قيسوا على كده الحاجات الأهم.

إحساس الأمومة  و لا يقارن بأى إحساس تانى فى الوجود  و من أروع ما فيها أنها تجعلنا أفضل من كل النواحى.

عقبالكم كلكم لما تجيبوا أولاد يربوكوا إن شاء الله قولوا آمين…