مصر لكل المصريين(1) – إيه المشكلة إن الإخوان يتجوزوا من بعض أو يعملوا شركة إنتاج سينمائى؟

أهدى هذه المقالة لكل مصرى ايا كان توجه الفكرى و أتمنى أن يقرأها بقلب مفتوح و حرص على ما فيه خير مصر قبل أى إعتبار آخر لإن الإخلاض و التجرد من أى نوايا شخصية أو حب للظهور أو تشبث بالرأى هو السبيل الأمثل  كى تمر المرحلة الإنتقالية بسلام.

و الحقيقة الصورة إللى فوق أنا حبيت أرمز فيها إن هدف إسقاط النظام وحد الشعب المصرى بمختلف أطيافه و رمزت لها بالوان الطيف و إخترت الألوان بشكل عشوائى لا علاقة له بما يمثله أى لون.

الحقيقة يا جماعة أنا شايفة إن الإخوان كانوا فزاعة قبل الثورة و مازلوا فزاعة بعد الثورة! و ممكن ألتمس العذر لبعض المتخوفين منهم لأن الإخوان بالفعل هم أكثر جماعة منظمة و لها و جود قوى فى الشارع لكن هذا ليس مبرر لأن ننتقدهم فى أشياء مشروعة.

أولا إيه المشكلة إن الإخوان يتجوزوا من بعض؟

أنا حسأللك سؤال شخصى: لو إنت منتمى لأى حزب أو تيار مش تتمنى إنه يزيد و ناس أكتر ينضموا إليه؟ يبقى ميعيبش الإخوان إن هما يقولوا تعالوا نتجوز من بعض علشان نزيد. ده شئ منطقى جدا لكن أنا الحقيقة حسيت بشئ من السذاجة إنهم صرحوا بهذا الأمر خصوصا فى هذ ا التوقيت الحرج و بعدين يرجعوا يقولوا بنهزر! حاجة ملهاش أى لازمة بتفكرنى بهزار! السلفيين الخاص بغزوة الصناديق! أنا بحمد ربنا أنى لا أنتمى لأى تيار علشان أعرف أهزر براحتى هههههههههههههه

خلاصة القول إن الإخوان من حقهم تماما إنهم يتجوزوا من بعض بهدف إن هما يزيدوا و مش منطقى إن إحنا ننتقدهم على كده. أنا كمان سمعت لكن مش متأكدة و مش بعمم إن هما بيشغلوا بعض و ده منطقى برضه لكن لو وصل بيهم التحيز إنهم يشغلوا واحد إخوانى أقل كفاءة من واحد غير إخوانى ساعتها ممكن أنتقدهم لإن ده ميرضيش ربنا. لكن هما حرين فى حوازهم و طبعا مبدا الغاية تبرر الوسيلة مرفوض إسلاميا. و بالتالى أى تيار أيا كان توجهه يروح يدى للغلابة فلوس علشان بشترى أصواتهم فهو آثم أمام الله و المبادىء مبتتجزئش.

ثانيا إيه المشكلة إنهم يعملوا شركة إنتاج سنيمائى؟

قرأت تصريح اقرب لنكتة بايخة على لسان داعية الحرية  إيناس الدغيدى و أتمنى إن الكلام ده يكون متلفق لمصلحتها لإن مش معقول تحلل الحرية لنفسها و تحرمها على غيرها!!!(المعايير المزدوجة هى آفة الآفات من وجهة نظرى) خلاصة الكلام إنها بتنتقد تصريح الإخوان إن هم حيعملوا شركة إنتاج سينمائى و فى فنان تانى مش فاكرة إسمه عبر عن مخاوفه من الإحتكار!

هو مفيش إحتكار النهارده فى شركات  الإنتاج السينمائى فى مصر؟ هى جت على الإخوان؟

و الله العظيم أنا متحمسة إنهم يعملوا شركة إنتاج بالقليل الواحد مش حيروح الفيلم خايف يعمل سيئات! أنا حكيت لكم فى مقالة ليه مش حقدرأشوف فيلم الفاجومى إن المشاهد الساخنة إللى شفتها فى البرمو حتخلينى مضطرة مدخلش فيلم كنت مستنياه بفارغ الصبر!

و آخر فيلم دخلته هو صرخة نملة و هو بالنسبة لى أنا مفيهوش مشكلة لإن أقصى إبتذال فيه كان مشاهد رقص و أنا كبنت مفيش مشكلة إنى أشوف رقص لكن للأسف لازم أأقول رغم إعجابى بموضوع الفيلم إنى أنصح  أى شاب عنده وازع دينى إنه ميدخلوش!

و بالتالى أنا سعادتى لا توصف إن الإخوان بيحاولوا يقدموا بديل محترم بس يا ريت تكون القيمة الفنية للأعمال إللى حيقدموها عالية و يكونوا حيناقشوا قضايا إجتماعية ملحة و مش حيكلمونا عن إن الإخوان هما الحل!!

و طبعا أنا قلت لا للتعديلات الدستورية و قبلها ناشدت الجيش فى هذه المدونة إنه يلغى الإستفتاء أساسا رغم إنى و بكل أمانة معلوماتى السياسة ضحلة جدا لكن كنت حاسة إن هو ده الحل المنطقى. و آدينا راجعين نقول الإنتخابات ألأول و لا الدستور و الإخوان فرصتها أحسن من غيرها من الأحزاب.

عموما أيا كانت القرار الذى سيتخذ فى النهاية إحنا إن شاء الله ماشيين فى الطريق السليم و مفيش شك إن فى مبالغة فى تقدير حجم تواجد الإخوان فى البرلمان الجديد.

و أنا خدت خطوة بسيطة فى حدود إمكانياتى إن أنشات صفحة أحزاب ولدت من رحم الثورة لتكون منبر للإعلان عن أى أحزاب جديدة و أيضا انشات صفحة على الفيس بوك بعنوان معا لدعم وجود أبطال ثورة يناير الحقيقين فى البرلمان و لكن لا ينكر منصف إن الإخوان كان لهم دور يشكروا عليه أثناء الثورة.  و بالتالى يا ريت منبالغش فى إنتقادهم و نتسم بالحيادية و التجرد لإننا أحوج ما نكون إليهما فى هذه الفترة الحساسة من تاريخنا. و مستنية تعليقاتكم