“الشعب يريد القصاص للشهداء” – يا مسؤلين بردوا نار أهالى الشهداء و حاسبوا المجرمين بدل ما البلطجية يدخلوا و يشعللوها!!!

الحقيقة أنا مخنوقة من إللى بيحصل و مش ناوية أسرد لكم أحداث مسرح البالون و وزارة الداخلية و ميدان التحرير المؤسفة إللى حصلت مؤخرا لكن حعلق عليها.  لو حابين تعرفوا التفاصيل اللينك ده حاكى القصة من أكتر من وجه:

http://shabab.ahram.org.eg/Inner.aspx?ContentID=5556

تعليقى على الأحداث فى نقاط:

 

* التباطؤ فى محاكمة قتلة الشهداءأمر لا يغتفر و يزيد الأمور صعوبة. أنا قلبى موجوع و حاسة بمرارة لا تتخيلوها رغم إنى معرفش حد من إللى إستشهد فى التحرير معرفة شخصية! فما بلكم بأم ملكومة أو أطفال إتيتموا علشان ثورتنا تنجح؟يا ترى إيه حجم الألم إللى فى قلوبهم النهارده؟ ربنا يلطف بيهم.

* لو كانوا المتسببين فى أحداث إمبارح كلهم من أهالى الشهداء كنت حلتمس لهم العذر لكن الشئ المؤسف إن البلطجية إستغلوا الموقف و بغض النظر هما تبع مين بالظبط فالشئ المؤكد إن التباطؤ فى القصاص من قتلة شهداء ثورة يناير هو السبب الأساسى  لكل ما حدث و تداعياته المؤسفة

* سيدنا عمر بن الخطاب ألغى حد السرقة فى عام المجاعة لإن لما الناس بتتحرم من حقوقها الأساسية مش من حق حد يحاسبهم لو أساؤا التصرف

* العدالة البطيئة بطء قاتل بتخرج من الناس أسوأ ما فيهم. ما هم صبروا 5 شهور و المسألة مش مسألة ألف شهيد: كل من فقد عينه أو أصيب بالشلل أو أى عاهات أخرى له قصاص فى رقبتنا.  لما مرة حضرت ندوة فى التوعية السياسية والمحاضرة إنتقدت تصرف الناس إللى وقفوا على شريط القطر أيام أحداث المنيا و قالت إن هما كان ممكن يروحوا جنينة أو مكان مش حيوى علشان يطالبوا بحقوقهم! ساعتها عدد كبير من الحضور عارضها و قاللها إن المسؤولين فى بلادنا مبيجوش غير بالضغط. لو كان مرواح الجناين بيجيب للناس حقوقها فى بعض البلاد فالشئ المؤكد إن ده مش بيحصل فى مصر للأسف! لكن مين السبب؟ المسؤولين هما إللى بيفرضوا على الناس أساليب غير حضارية للتغيير و للأسف تصل للعنف و سفك الدماء أحيانا.

* لذلك أنا أكرر ندائى للمسؤولين: بردوا  نار أهالى الشهداء و حاسبوا المجرمين بدل ما البطجية يدخلوا و يشعللوها!!! فهل من مجيب؟!!!!