و عجبى(2) – يا عينى على المصريين فى الغنا الحزين! و مسابقة غنائية للشاطرين :)

مساء الحزن و الكآبة مع رشة نكد فشر الهبابة

فى مقالة  ما أروع الجرأة على الحق! حاجات مبخافش منها و حاجات مضحكة بترعبنى كنت فضفضت معاكو إنى بخاف من السواقة علشان كده بركب تاكسات كتير. و ياما سمعت أغانى لها العجب و للأسف معظمها حزيييييين و كئييييييييييييييب بس أنا لما بسمعهم بكون عايزة أسخسخ من الضحك. مستغريبن؟!  طيب شوفوا العينة و احكموا بنفسكوا…

* مرة كنت رايحة أجيب بنتى من مكان و إتأخرت عليها لإن سواق التاكسى سمع المكان غلط و أنا كنت مركزة مع الأغانى . الغنوة كانت بتقول: “أنا عامل دماغ تمام مام مام …مش بانجو ولا برشام شام شام”  تحفة طبعا لكن بعده نفس المطرب قلبها نكد إسود وقال: “أنا عازمك على جراح و أحزان و آلام! ما هو كله من خيرك! كتر ألف خيرك!!!” سبحان مغير الأحوال واضح إن الصنف إللى بلبعه كان مضروب و لا حاجة هههههههههههه

* المرة دى ربنا حب يمتحن صبرى و سمعت واحد بالع خيارة بالعرض فى زوره و أأقل شئ يقال عن صوته إنه شنييع!!! إسمعوا قمة الإبداع: “إتخرجت من كلية الأحزان و معايا دكتواره فى ال آآآآآآه! ” يا عينى على السجع….  قطيعة تقطع النكد و سنينه هههههههههههههههه

* المرة دى بقى أنا إتصدمت صدمة عمرى: مطرب شعبى إبتدى أغنيته بشعر لسيدنا على كرم الله وجهه. كا ن بيقول:

 النفس تبكى على الدنيا و قد علمت

أن السلامة فيها ترك ما فيها

لا دار للمرء بعد الموت يسكنها 

إلا التى كان قبل الموت يبنيها

فإن بناها بخير طاب مسكنه 

و إن بناها بشر خاب بانيها

رائع مش كده؟ أنا كنت طيارة من السعادة. هو ألقى الشعر ده من غير تلحين و بعدين إبتدى يغنى و عنيكم ما تشوف إلا النور! لقيته بيقول: أنا حنتقم منك و حعمل فيك و أسوى!! واضح فعلاإن كلام سيدنا على أثر فيه هههههههههههههه حاجة عجيبة!

دى مجرد عينة بسيطة من الأغانى الحزينة إللى بسمعها فى التاكسات و عجبى

طيب إيه حكاية المسابقة الغنائية؟

و إستكمالا لوصلة النكد…فى فيديو “حوار غنائى بين مواطنة بتشد شعرها و مسؤول فى البلالة” أنا غيرت بعض كلامات أغنية حزينة للفنان حماده هلال. ياللا يا شاطرين شوفوا الفيديو و قولوا لى هى إيه. و يا ريت تقولولى كلماتها الأصلية حنشكح قوى و لو عايزننى أزقطط بجد يا ريت تقوللى الكلمات الأصلية لكل أغانى الفيديو. هما سهلين على فكرة. كل ما حتدونى تفاصيل اكتر فى الإجابة كل ما الجايزة حتزيد و أنا مش حتعبكم أهه الفيديو جبتهولكم لغاية عندكم

لو مكنتش عارف تفتح الفيديو من الصفحة دى, إضغط هنا علشان تشوفوه على اليوتوب 

يا سلاااااام يا عينى علينا فى الحزين…”كتاب حياتى يا عين” و “جرحونى و قفلوا الأخزخانات” و عجبى!!! مستنية تعليقاتكم