قصيدة “لا مساس بلعنة لا مساس!”
راحت ناس و جت ناس
و لا مساس بلعنة لا مساس!
مبارك ياما قالها و عادها بحماس!
كان يقول لا مساس
و يدوس على رقاب الناس!
دلوقتى الإخوان بيقولوها
بنفس النبرة ….بنفس الإحساس
ليه؟!! ليه و إزاى تعيدوها تانى؟
ما إنتوا شاربين من نفس الكاس
يا ما دقتوا المر و إتسجنتوا
يا إما إتكويتوا بنار “لا مساس!”
أديكم ملكتم زمام الأمر
و الأمريكان بتجرى عليكم ..و إيديكم بتنباس!
يا تر حتفضلوا فاكرين إن حكمكم لينا
تكليف مش تشريف و لا حتقعوا فى فخ لا مساس؟
صدقونى أنا مش ضدكم… و لا ضد حكمكم
و لا ضد تصريحكم فى الأساس
بس إعذرونى إذا كنت من جوايا
مش طايقة من تانى أسمع ” لا مساس!”
طبعا يا جماعة المشكلة مش فى تعبير لا مساس لكن المشكلة إنه كان بيتقال و مكانش بيتنفذ فلو الإخوان حابين يستخدموه براحتهم بس ياريت ينفذوه. بس أنا لو منهم أحسن مستعملش تعبيرات كان ليها مردود سلبى عند الناس قبل الثورة و مش شرط طبعا يكون الإخوان قالوا كده بالحرف جايز الصحيفة إللى نشرت الخبر هى إللى قالته. المهم عندى إن الإخوان يكونوا قد كلامهم و ساعتها ممكن كلنا نحب “لا مساس”.
و هو ده فيديو اللمبى إللى أنا إستخدمت فيه نفس التعبير الرقيق من أكتر من سنة! لو مش قادر تشوفه على الصفحة دى إضغط هنا علشان تشوفه على اليوتوب
مستنية تعليقاتكم 
Ba7ebMasr.com - هبة الله حسنى
