من “هطل 1” ل “ربنا يهدى”! عاملين إيه يا بناتيت فى طوفان معاكسات الموبايل؟!!!

إزيكو يا بناتيت 🙂

يا ترى إنتوا مهريين معاكسات موبايل زيى؟ حاجة رهيبة و الله العظيم! أنا مقدرش اتحكم فى تصرفات الآخرين لكن أقدر أتحكم فى رد فعلى و علشان قررت إنى مش حضايق نفسى من  معاكسات الموبايل و حتعامل معاها صح. و إسمحوا أاقدم لكم حصيلة خبرتى الواسعة (للأسف!) فى هذه ا المجال:

* أول نصيحة و دى بديهية متديش رقمك إلا لناس تكونى واثقة فيهم جدا. أنا الحقيقة بعمل و رغم كده مهرية معاكسات. الظاهر إن ربنا حاطط فى رقم موبايلى القبول 🙂

* مفيش داعى تردى على الرنات القصيرة إللى متعرفيهاش. أنا بضطر ارد علشان ساعات مشرفات أتوبيس مدرسة بنتى بيكونوا عايزين يقولوا لى حاجة و مش عايزين يتكلفوا فبيقفلوا بسرعة . لكن لو إنت معندكيش الأسباب دى مترديش خالص على أى رنة منعرفيهاش. إللى بيحصل لو كان حد بياعكس بالطريقة دى إنى لما بكلمه بيعمل نفسه مش فاهم حاجة  لما بقوله إنى لقيت رقمه على موبايلى! ساعتها بفهم على طول إنه بيعاكس و بقفل على طول.  النوع ده مريح لإنه مقضيها “ميسدات”. بس أنا بحفظ رقمه عندى علشان لو إتصل تانى مردش. دى اهم حاجة لازم تعمليها. أنا الحقيقة بكتب كلمة “هطل” و جنبها رقم علشان لو تصل تانى أعرف.و الحمد لله و صلت ل “هطل 6” إمبارح!! و ده إللى خلانى فكرت اكتب المقالة دى.

* النوع السخيف بقى هو النوع “المريش” إللى معندوش مانع إنك تفتحى عليه الموبايل و عادة يبدأ الكلام بإنه يسالك إنت مين مع إن هو إللى طالب. فأنا عادة برد عليه و بقول: “حضرتك عايز مين؟” بصوت رسمى جدا. مش محتاجة أأقولك إنك متديش إسمك لحد متعرفيهوش. ده بديهى برضه. المهم الناس دول عندهم مثابرة و بعضهم كان بيكلمنى الساعة 3 بالليل!! و ساعات بفتح عليهم من غير ما أتكلم لما بجيب آخرى لغاية ما يزهقوا!!!

و طبعا قراء المدونة الدائمين عارفين إنى موعودة بالحاجات العجيبة و علشان كده ححكى لكم أطرف المعاكسات (هطل 6 بيرن دلوقت على فكرة. حسيبه يرن!! “إن الله مع الصابرين”)

نكمل كلامنا إليكم أطرف المعاكسات:

* مرة بنت كلمتنى و برضه عملت فيلم إنها تسألنى أنا مين و فضلت مصممة تعاكسنى شوية حتى بعد ما لقيتنى بنت زيها!! (دى هطل 3 غالبا!)

* واحد عجوز جدا ول ما قلت له آلو قاللى:مجيتيش ليه يا حبيبتى؟!”. أول مرة و الله إفترضت فيه حسن النية و قلت يمكن بيكلم بنته و لا حاجة فلما سألته : “حضرتك عايز مين ؟”و مردش قفلت بس نسيت أسجله فى لسته الهطل. راح مكلمنى بعدها بيومين و قال نفس الجملة بالظبط فتحول ل “هطل 5” (أنا خايفة يكون هو بطل قصة الصراحة راحة يا جدو!!)

* أما مسك الختام “هطل 6″ فده هارينى تليفونات من إمبارح و فتحت عليه أكتر من مرة من غير ما أتكلم و برضه مش عايز ييأس! الشئ المضحك المبكى إنى لما فتحت عليه النهارده عليت النتليفزيون قوى و حطيت الموبايل جنبه خالص على أمل إن ودنه تتخرم هههههههه. سبحان الله كان فى برنامج دينى و المقدم كان بيقول:”إن الله غفور رحيم”. أنا إستبشرت خير و قلت إن شاء الله الكلام يأثر فيه و يبطل معاكسة بس للأسف رن عليا رنات طويلة أكتر من 5 مرات بعدها!!!

لو احد قراء هذه المقالة كان متخصص فى علم النفس يا ريت يبرر لى ظاهرة المثابرة على حاجة مش حتجيب نتيجة!! مش معقول “هطل 6” و هو بيرن لى الرنة الساتة كان عنده أمل إنى حرد بعد ما إديته الطارشة 5 مرات قبل كده! الناس دى بتعمل كده ليه؟!! حد عنده أى تفسير؟!!!!!!!!!!!!!!!!!!

الحمد لله ربنا ألهمنى إنى أصلح نظرتى للأمور مؤخرا وبقيت أكتب “ربنا يهدى 1 أو 2 …” بدل “هطل” على الأرقام إللى بتعاكس فكده كل ما يرن لى آخد ثواب إنى دعيت بدل ما أضايق نفسى إنه بيعاكس … فعلا صدق إللى قال إن السعادة فن 🙂 

Advertisements

4 تعليقات

  1. Posted by ناصح أمين on مارس 30, 2011 at 12:09 م

    مرحبا
    شكرا على نصايحك انما قولي لي يا ترا كل دول بيجيبو نمرة موبايلك من اين ؟

    رد

    • انا مش عارفة إجابة السؤال ده يا ناصح بس غالبا هما بيعدوا يجربوا أى أرقام من دماغهم فبتكون صدفة.و الدليل على كده إن فيه ناس كتير بتشتكى من الموضوع ده مش أنا بس. هى ظاهرة مؤسفة. شكلك مش من مصر ما دام بتسأل السؤال ده. يا ترى تخمينى فى محله؟

      رد

      • Posted by marwa soliman on مايو 12, 2011 at 8:53 ص

        بصي يا هوبا النوع اللي مش بييأس دا ورغم انك بتفتحي عليه كتير مش هيييأس خالص أسألي مجرب أحسن حل انك تديه لراجل يسمع منه كلمتين المفوض انه يحترم نفسه بعدها علي طول دا انا مرة قعدت افتح عليهوقلتله يا ريت تحترم نفسك ومش هو بس دا كذا حد واول اما اديته لبابا لم نفسه وما اتصلش تاني
        وطول ما انتي عايشة ياما هتشوفي

      • هى دى فكرة جميلة يا مرمر بس أنا الحقيقة والدى متوفى الله يرحمه و أخويا مسافر لكن لو كان فى أى راجل قريبى موجود بالصدفة و حد من بتوع الهطل رن لى, أكيد حعمل بنصحيتك الجميلة دى 🙂

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s