أحلام خزعبلية (1) – نفسى مشكلتى الوحيدة فى الحياة تكون إزاى القطة متغرقش فى الجاكوزى؟! ههههههههه

الحقيقة و أنا فى كندا قريت كتاب لواحد من أكبر علماء التنمية البشرية فى أمريكا إسمه Anthony Robins و حكى فيه قصته المؤثرة إنه فى يوم من الأيام كانت مشكلته إنه مش لاقى مكان ينام فيه لكن بعد كده لما غير حياته و بقى مليونير كانت مشكلته إن مش لاقى مكان يكفى الناس إللى عايزة تسمع محاضراته 🙂

فهو كان بيقول إن الحياة لا تخلو من المشاكل لكن كل ما الإنسان بيطور نفسه المشاكل إللى بيواجهها بتكون ممتعة 🙂

أنا نفسى يكون عندى شقة كبيرة فى يوم من الأيام و يكون فيها جاكوزى بس برضه بعشق القطط و عايزة أجيب قطتين علشان يسلوا بعض و أنا مش موجودة و نفسى أقصى مشكلة تواجهنى إزاى أحمى القطة علشان متغرقش فى الجاكوزى 🙂 و ده معناه طبعا إن كل المشاكل التانية حتكون إختفت…

طبعا أنا النهارده معنديش جاكوزى و ده جايز ميفاجئكوش لكن الشئ المؤسف إنى حتى القطة مش طيالها لإنى عايشة مع مامتى و هى خايفة على عفش البيت! طبعا هى من حقها تخاف على عفشها و إللى يعيش فى بيت أهله لازم يحترم رغباتهم لكن أنا جربت عيشة الحرية يا جماعة لما رحت كندا لوحدى و كان عندى قطة جميلة هناك إسمها Tiger

فواضح إنى انا لازم اشتغل جامد علشان اقدر أجيب شقة لنفسى فساعتها أأقدر أجيب قطة و كمان بالمرة أجيب جاكوزى بالمساج…يا سلام روعة و الله  منعش جدا…و ليكو عليا يا جماعة أول ما ربنا يفتح عليا حتبنى القط “جعلص” إللى غرقان فى الزبالة فى الصورة إلى فوق و حعوضه عن كل أيام الحرمان بس المهم إن حياته المرفهة متتنتهيش أوام لو فكر ينط فى الجاكوزى….هههههههههههههه مش بقوللكم أحلام خزعبلية؟

7 تعليقات

  1. ههههههههههه ربنا يوفقك وتتبنى القط جعلص ;D

    رد

  2. Posted by زهرة البنفسج on مايو 5, 2011 at 11:36 م

    ربنا يكرمك بكل خير ياهبهوب لكن ياريت لما تجيبي القطتين تخبيهم لما أحب أرخم عليكي وأزورك ههههههه

    رد

  3. Posted by احمد العشرى on مايو 6, 2011 at 1:03 ص

    يارب تشترى الجاكوزى ويكون عندك الشقه وجعلص وبقلص وحتفى وكل القطط ه ههههه

    رد

اترك رداً على zizo إلغاء الرد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s