ليه “متقبلتش!” فى المسجد و لا فى المكان إللى بتعلم فيه غناء فى نفس اليوم؟! و ليه أنا مبسوطة قوى بالحكاية دى؟!!

هل الإعتدال عمال يتقلص تحت وطأة التشدد يمينا و يسارا؟!!!

سؤال طالما ألح على و  من إسبوعين تقريبا تعرضت لمواقف غريبة فى نفس اليوم جددت جوايا الإعتقاد ده.

1- عدم فبولى! فى المسجد: كنت فى المسجد بحضر درس و سمعت أغنية يا بلادى على موبايل واحدة من البنات. فبعد الدرس إستأذنتها إنى آخد منها الغنوة على موبايلى فظهرت لنا أخت منقبة من حيث لاندرى و قالت بإستنكار: “إنتوا بتنقلوا أغانى فى المسجد؟” فأنا رديت عليها رد ندمت عليه بعد كده إنى قلت لها بظرف دى أغنية يا بلادى و الصح إنى مكنتش أديها أى مبررات لكن ده إللى حصل عموما!

2- فاكرين لما حكيت لكم بسعادة غامرة إنى رجعت أدرس غناء شرقى تانى؟ للأسف إضطريت أسيب المكان إللى باخد فيه لإن الأستاذ سئ السلوك جدا و بيهزر مع النبات بالإيدين و طول الوقت بيلمح نلميحات غير لائقة! و حاجة آخر مسخرة زى ما نكون فى كباريه!! رغم إنى كنت مخنوقة من الجو ده, كان ممكن أستمر لو كانوا هما متقبلينى و سايبننى فى حالى. ما أنا فى كندا كنت بتعامل مع ناس معندهمش دين أساس لكن الجميل فى معاملاتنا إن كل واحد محترم حرية التانى فى إنه يكون ما يشاء.

المشكلة إن الأستاذ كان مفروس منى لإنى مش زى الباقيين و كل شوية يلقح عليا بالكلام و القشة إللى قسمت ظهر البعير إنه طلب مننا نكلمه علشان نحدد معاد نقابله فطلبته و مردش عليا و لما رحت بعدها بفترة إتضح إنه كلم كل الناس التانيين و إن هما إتقابلوا بالفعل!! (و الله أنا مذهولة إنه نجحنى فى إمتحان ال Vocal أساسا  لأنه رفض يقبل واحد تانى قدام عينى! أنصف مرة واحدة فى حياته!!)

هو أنصف فى الأول وبعد كده بقى يتعمد يرخم عليا و يقوللى إنى مش عارفة أغنى معاهم و مرة طلب منى مقولش علشان مش عارفة أجيب طبقة الصوت فحركت شفايفى بس دون غناء علشان أحفظ الكلمات. فهو  إفتكر إنى بغنى و قال لى إنى كده بعطل الناس فساعتها أنا إبتسمت و قلت له:”إن فى حد غيرى بينشز لإنى مكنتش بغنى أساسا!!” و ساعتها جبت آخرى و سألته قدام الكل هو ليه مردش لما طلبته زى ما قال و رد على الباقيين, فقال لى كلام عايم معناه إنى كان المفروض اتصل بالليل مع إن هو إللى  طلب مننا نكلمه الصبح! فأنا لقيت نفسى مش قادرة أستحمله فقلت له إنى حدور على مكان تانى أتعامل فيه أحسن من كده و رحت سياباه و ماشية!!

للأسف هو إنتصر بس لما أكون فى مكان بتحجم فيه و بقعد يقوللى متغنيش و أنا رايحة أساسا أتعلم غناء يبقى حستمر إزاى؟ هو فى منصب قيادى و أساء إستخدام سلطته ده غير طبعا إن إحنا كنا بنغنى كورال و أنا سايبة الكورال من سن 11 سنة!!! فللسبب ده لوحده أنا كنت حمشى من نفسى بعد المدة إللى دفعت تمنها ما تخلص.

فلما تقارنوا بين الموقفين حتلاقونى وسط و الناس مش متقبلانى لإنى مش زيهم و هما الإتنين عكس بعض على طول الخط!!!

طيب إيه إللى باسطنى فى الموضوع ده؟ الحقيقة يومها كنت متضايقة جدا بالذات علشان موضوع الغناء لكن لما فكرت إكتشفت إن ميزتى الرأئعة إنى حقيقية و مش مزيفة و مش بركب الموجة و أجارى الناس التانيين علشان أعجبهم. أنا مقتنعة إن ربنا من قوق سبع سماوات مش حيعاقبنى علشان نقلت أغنية يا بلادى على موبايلى فى المسجد و بالتالى الأخت الموقرة إللى إتحشرت فى شؤونى ملهاش عندى حاجة! و فى نفس الوقت فخورة و معتزة بحجابى و إلتزامى السلوكى إللى بيغيظ المستهترين و يفرسهم! إيه إللى يضايق فى كده؟

“متحاولش تبقى حد تانى غير نفسك” نصيحة مخلصة يا ريت كلكو تفكروا فيها و تطبقوها و مستنية تعليقاتكم 🙂

6 تعليقات

  1. Posted by زهرة البنفسزهرة البنفسج on مايو 6, 2011 at 2:04 م

    جميل أوي إننا نكون نفسنا عن إقتناع ومانقلدش حد لمجرد إننا بنرضيهم ولكن مهم نطور من نفسنا للأفضل بهدف رضا الله مش الناس طبعا وربنا يكرمك يارب ويحققلك كل أحلامك ويرضى عنك ويراضيكي

    رد

    • Posted by marwa soliman on مايو 6, 2011 at 2:24 م

      ربنا يباركلك يا رب وفعلا طالما الانسان من جواه واثق انه مش بيغضب ربنا وبيتعامل في حدود الادب ميهمهوش كلام الناس المهم اكون نفسي

      رد

      • معاكى حق يا مروة فعلا كما قالت الآية الكريمة:”بل الإنسان على نفسه بصيرة”. يا ريت بس إللى بيحكموا على غيرهم و خصوصا من المتدينيين يركزوا فى إصلاح نفسهم أولى و ربنا يهدى الجميع

    • ربنا يكرمك يا زهرة و على فكرة إللى بيحاول يرضى كل الناس بيكون منافق و أسوأ من كده بيكون مزيف و معندوش هوية. فالحمد لله إننا مش كده و أشكرك على تعليقك يا جميلة 🙂

      رد

  2. صح جدااااا طالما مابنعملش حاجة تغضب ربنا يبقى لا مؤاخذة طظظظظظظظظظ فى النااااااس

    رد

اترك رداً على zizo إلغاء الرد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s