نداء لكل بنت مسروعة! مقبلة على الجواز: إحذرى إقبلى هذه النوعية من العرسان!!!كان لازم أغير المقالة علشان….

1 slide 19

*** الإعتراف بالحق فضيلة و أنا لازم أعترف إنى بعد ما حضرت صالون للدكتور أحمد عمارة  إكتشفت إنى قلت بعض الأشياء الخاطئة فى هذه المقالة و قمت بتصحيحها باللون الأخضر على إعتبار إن الأخضر لون الخير  🙂 فياريت تهتموا بقراءة هذه الأجزاء. و فى نقطة تانية عايزة أوضحها الأفكار المطروحة هنا ممكن يستفيد قراء رجال برضه يعنى هى مش حكر على النساء. بمعنى إنى لو شلت كلمة “مهند” و حطيت مكانها “نانسى أو هيفا” المقالة حتبقى رجالى رسمى :). وأنا حبيت أوضح النقطة دى خصوصا لما لقيت تعليقات من شباب قروا المقالة. و كلمة أخيرة يا جماعة أنا ممكن أكون خرفت فى بعض أجزاء المقالة لكن “عدانى العيب” 🙂 فى ردودى على التعليقات فياريت تقروها هى كمان 🙂 ***

إزيكو با بناتيت 🙂

فى فرق كبير بين إنك تكونى عايزة تتجوزى و بين إنك تكونى مسروعة! على الجواز.

إن يكون ليكى فتى أحلام تتمنى ترتبطى فى يوم من الأيام ده شئ طبيعى لكن لما أى بنت بتعوز الموضوع ده زيادة عن اللزوم ممكن تقع فى غلطة شنيعة إنها تقبل أى حد و السلام! علشان تتجوز و  بعد كده تندم أشد الندم!

الحقيقة أنا فكرت اكتب المقالة دى لإنى آعرف بنات متضايقين زيادة عن اللزوم إن مفيش حد فى حياتهم زى ما يكون الجواز هو نهاية العالم! علشان كده قررت أكنب المقالة دى و حوضح فيها تلات حاجات أساسية:

1. إيه إللى بيخلى بعض البنات تتسرع على الجواز

2. إيه الخطوات الاساسية إللى المفروض تاخديها قبل!! ما تفكرى فى الجواز

3. و ختاما إيه نوعية العرسان إللى المفروض تفرى منهم فرارك من الأسد هههههههههههه.

جاهزين؟ ياللا نبدأ…بس محدش يزغدنى…إيه ده مستعجلين على إيه؟!! قطيعة تقطع الجواز و سنينه هههههههههههه

1. إيه إللى بيخلى بعض البنات تتسرع على الجواز؟

– المقارنات المتخلفة! إنت ممكن تكونى عادية فى الحياة خالص لكن  أول ما جارتك تتخطب تقوم القيامة و متقعدش! إشمعنى هى؟!! من أكثر العادات الإنسانية حماقة على الإطلاق هى إن  الإنسان يقارن نفسه بغيره. إللى بتعمل كده محتاجة تظبط إيمانيتها و تفتكر قوله تعالى:”إن سعيكم لشتى” و تفتكر كمان إن الجواز رزق ربنا حيبعتهولها فى الوقت المناسب. إللى المعانى دى مترسخة جواها, حتفرح من قلبها لما صاحبتها تتخطب قبلها, لكن لو حست بشئ من الحزن, تعرف إنها بتعمل مقارنة فة غير محلها و لازم تراجع نفسها.

الفراغ!! لو البنت كان فى فراغ فى حياتها, أكيد الجواز حيكون شغلها الشاغل!!

– للأسف ساعات المجتمع و الأهل هما إللى بيعملواالمقارنات المتخلفة و يفضلوا يخنقوا البنت فى عيشتها ( فى إعلان عجبنى قوى لعصير جهينة البنت بتقول فيه إلى طنط فلانة و فلانة وفلانة مش عارفة حتفرحوا بيا إمتى ههههههههههههه) هو فعلا سؤال رخم لما واحدة تقولك: هو إحنا حنفرح بيكى إمتى؟ زى ما يكون عندك إجابة!!! بس عارفين مرة سمعت واحدة سالت السؤال ده لبنت فى المسجد و جايز كانت بتسأله بحسن نية فردت البنت رد رائع و قالت: كله بأمر الله 🙂

2. إيه الخطوات الاساسية إللى المفروض تاخديها قبل!! ما تفكرى فى الجواز

زى ما بتذاكرى علشان تنجحى فى الإمتحان فى, فى خطوات معينة لازم تاخديها علشان تضمنى حسن إختيار شريك الحياة:

– تحلى كل المشاكل إللى تكلمنا عليها فى رقم 1 بإنك تثقى فى إن ربنا لا يقضى إلا بالخير و إن رزقك حيجيلك فى الوقت المناسب. و كمان لازم متقعيش فريسة للفراغ بإنك تملى حياتك بأشياء مفيدة مثلا إحرصى على ممارسة هوايتك المفضلة و إعملى أنشطة خيرية و إجتماعية و مهم جدا إنك تقوى علاقتك بربنا أيا كان دينك. و طبعا بالنسبة لبعض التعليقات إللى ممكن تكون مش لذيذة من الأهل أو المجتمع, فيا ريت  تتجاهليها تماما و ده حيكون سهل جدا لو علمتى الحاجات التانية لإنك لما تكونى سعيدة بجد من جواكى, محدش حيقدر يضايقك.

– لازم تكونى عارفة إيه مواصفات فتى احلامك بدقة قبل ما تبتدى تشوفى ناس و أول خطوة إنك تفهمى نفسك كويس الأول و تكونى صادقة مع نفسك. لازم تكونى فاهمة طبيعة شخصيتك و عارفة إيه مميزاتك و عيوبك علشان تقدرى تحددى صفات الشخصية المناسبة ليكى. و طبعا مش محتاجة أقولك إنك لازم تبتدى بنفسك و يكون فيكى نفس الصفات. يعنى مثلا مينفعش واحدة تقول إنها عايزة جوزها يكون واثق فى نفسه و هى معندهاش أى ثقة فى نفسها!

لو و إنت فى جلسة مصارحة مع نفسك إكتشفتى إن فى صفة تتمنيها فى شريك حياتك مش موجودة فيكى, لازم تحاولى تنمى الصفة دى فى نفسك قبل أى شئ.

( الحقيقة أنا عملت هنا خلط غير مقصود لإن طبعا شئ أساسى إنك تكونى صادقة مع نفسك و تحاولى تعالجى عيوبك بس دى حاجة بتعمليها لنفسك و ملهاش علاقة بإختيار شريك الحياة خالص.مسالة إنك لازم تكونى رائعة و محصلتيش علشان الشخص إللى بتحلمى بيه يظهر فى حياتك, ده مفهوم خاطىء.

كل المطلوب منك إنك تعرفى مواصفات فتى أحلامك بدقة وتركزى على إللى إنت عايزاه و  بعد كده يكون عندك يقين إن ربنا حيرزقك بيه. و هى دى الخطوات إللى المفروض تاخديها طبقا لكلام د. أحمد عمارة:

1- إكتبى كل المواصفات إللى بتحلمى بيها فى ورقة و متستعجليش إفضلى زودى على الورقة إسبوع ولا حاجة المهم خدى وقتك لغاية ما تحسى إنك حطيتى كل الصفات و مفيش حاجة ناقصة

2- إختارى أهم 7 صفات منهم

3- و دى ألذ حته خصوصا لو كان خيالك واسع زيى. إتخيلى إنك لقيتى الإنسان ده بالفعل و عيشى كل المشاعر الجميلة و أتخيلى أهم 7 صفات و هى متحققة فيه  بس حاولى متتخيليش ملامح شكل معينة و أهم حاجة منتسيش تتخيلى إنك بتشكرى ربنا إنه أنعم عليكى بيه

4-دكتور أحمد بيؤكد إنك لما تفضلى تعملى كده فترة بإذن الله حتلاقى الإنسان ده بكل صفاته الجميلة ظهر فى حياتك 🙂 )


و على فكرة فى دورات كتير بعضها مجانى بتعلمك إزاى تختار شريك حياتك. أنا مرة شفت إعلان فى جمعية رسالة. حاولى تستفيدى بالدورات دى و أهم عنصر لنجاحك فى إختيار شريك حياتك إنك تقتنعى من جواكى إن ده قرار مصيرى محتاج مجهود مش مجرد فستان أبيض و طرحة!!

– لازم تكونى واثقة فى نفسك وراضية تماما عن شكلك. انا مليش دعوة بعارضات الزياء إللى بيطلعوا فى الإعلانات كل إللى أعرفه إن ربنا مبيخلقش حاجة و حشة و إنك حتكونى أجمل إمرأة فى الكون فى عين الإنسان إللى حيختارك من دون الناس علشان تكونى شريكة حياته ( فى مقالة ما أروع أن تكونى المرأة الوحيدة فى الوجود فى عين حبيبك وعلى فكرة أنا عملت تغييرات فى المقالة دى برضه بناء على كلام د.أحمد و أعتقد إنها مفيدة إنكوا تقرأوها حكيت حكاية زميلتى إللى الناس إتريقوا على شكلها فى الشغل و عيطت لكن بعد كده ربنا حط فى طريقها إنسان حبها بجنون و تسمك بها بإستماتة. فياريت أى واحدة فيكم مش راضية عن شكلها تقرا المقالة دى و أكيد نظرتها لنفسها حتتغير)

لازم تكونى واقعية و إنت بتحطى مواصفات شريك الحياة لإن التطلع للكمال فى بشر حماقة كبيرة لإن عمرك ما حتلاقى عريس على الفرازة زى ما بيقولوا. لازم تكونى مستعدة إنك تحبيه حب غير مشروط بمعنى إنط بتحطى الصفات الأساسية إللى لازم تكون موجودة و بعد كده المفروض تتقبلى شريك حياتك على بعضه و متحاوليش تغيرى شئ فيه.

ممكن مثلا واحدة تقررا إنها لا يمكن ترتبط بإنسان مش بيصلى أو بيدخن لكن ممكن  يكون عصبى شوية لإنها شايفة إن العصبية إللى متدخلش المستشفى و متجيبش عاهات مستديمة 🙂 صفة ممكن تتحملها فى شريك حياتها لو توفرت فيه الشروط الأساسية.

و بالتالى إلى كل بنت حاطة مواصفات إنها عايزة زوج شبه مهند و عاطفى و حساس و ملياردير و بيرجع البيت الساعة 2 علشان يفسحها و مامته خرساء 🙂 ههههههه نصحيتى لها تروح تعيش فى المريخ لإنها بتدور على كائن فضائى ملوش وجود على الأرض!!    

(فى موضوع الواقعية أهم حاجة إنك تكونى صادقة مع نفسك و تسألى نفسك إنت تتمنى إيه بجد؟ مش إيه إللى العرف أو المجتمع قاله!. أنا حضرت ندوة قريب أكد فيها المحاضر أن السبب الرئيسى للزواج فى مصر طبقا للإحصائيات هو الضغوط الإجتماعية و هو أمر مؤسف جدا لإن فى الآخر إنتى إللى حيتتجوزى مش المجتمع! )                                                                                                                          

3.  إيه نوعية العرسان إللى المفروض تفرى منهم فرارك من الأسد هههههههههههه.   

(هنا بقى يا جماعة أنا عملت غلطة شنيعة إنى ركزت على السلبيات و إللى بيركز على السلبيات بتحصله. يعنى مثلا لو فضلتى تقولى مش عايزة زوج كذاب حيجيلك الكذاب لإن هو ده إللى إنت مركز عليه يبقى لازم نعكس لغتنا و نخليها إيجابية:

بدل ما تقولى: “مش عايزة زوج كذاب” قولى: “عايزة زوج صادق ”          

وبناء عليه حغير عنوان فقرة 3 المتخلف من: إيه نوعية العرسان إللى المفروض تفرى منهم فرارك من الأسد هههههههههههه.

إلى:

3. إيه أهم الصفات إللى المفروض تكون موجودة فى عريس علشان تقبليه من حيث المبدأ   

وطبعا حصحح التخريف السلبى إللى قلته عن كل نوع بكلام إيجابى )

بعد ما عملتى الواجب بتاعك و رسمتى صورة فى خيالك لفتى أحلامك آن الأوان إنك تخوضى معترك الحياة و تبدأى تشوفى ناس بالفعل و زى ما بيقولوا الكتاب بيابن من عنوانه. إليك بعض العرسان إللى لازم ترفضيهم من بابه!!

– جاى  فى السريع! تكونش فاكرنى كيس جوافة؟! فى رجالة بيكونوا مستعجلين على الجواز بشكل أوفر زى قصة الفنان ماجد الكدوانى فى فيلم “جاى فى السريع” لما كان عايز يشوف عروسة و يتجوزها فى يومين علشان يرجع شغله فى الإمارات! النوعية دى بتتعامل مع الجواز زى ما  يكونوا رايحين يشتروا كيس جوافة!! و إستعجالهم بيكون واضح فى إنهم بيحاولوا يحددوا تواريخ خطوبة و غيره من اول يوم و كمان بيكون عايز يريحك على الآخر علشان يخلص بسرعة فحتلاقيه بيوافقك على كل حاحة تقوليها حتى لو تخريف علشان ينجز. يا ريت النوع  ده تقوليله مع السلامة و متندميش!!

– التعديل الإيجابى للتخريف السابق: إنسان بشعر بقيمة الزواج و إنه قرار مصيرى و بالتالى يكون مستعد أن يعطيكى و قت كافى للتعرف عليه

– و فى ختام برنامج “متنقطنيش شكرا” يا ريت متردش على سؤالى بسؤال!! النوع ده بينقطنى لإنه بيقعد يلف و يدور و ميدكيش عقاد نافع. فى رجالة سطحيين جدا أول ما شكلك يعجبهم بيعتبروا إن كده تمام و لازم يكملوا فى الجوازة و مش مهم لو فيكى اى عيوب يبقى يغيرها بعد الجواز (دول ملهمش فى الحب الغير مشروط خالص!) .

النوع ده من العرسان دى بيكون خد القرار إنه عايز يكمل الجوازة و علشان يضمن إنك مترفضيهوش بيفكر قبل ما يتكلم و ممكن يلبس قناع مزيف و يفضل يتمسكن لحد مايتمكن!!! بس بيبانوا بقى لما تلاقيهم بيلفوا و يدورا و ميردوش على أسالتك بشكل مباشر لإن كل إللى يهمهم إنهم يريحوكى و يدوكى إجابة مثالية مش إجابة حقيقية!! فمثلا لو سالتى واحد هوايتك إيه فرد عليكى و قال: و إنت هوابتك إيه؟ ياريت تقوليله: هوايتى إنى أرفض الناس إلى بترد على سؤالى بسؤال! و ترويله طريق الباب. هههههههههه 

التعديل الإيجابى للتخريف السابق: إنسان واثق فى نفسه و مؤمن بأهمية الصراحة و الوضوح فى فترة الخطوبة و تشعرى بذلك من إجاباته الصريحة و المباشرة لأسلئتك و طبعا لازم تتعاملى معاه بنفس الطريقة علشان تقدروا تاخدوا القرار السليم

– إبن امه!! لو جالك عريس ساكت و مامته بتتكلم طول الوقت, ده معناه إنه عديم الشخصية و إبن امه و إنها حتحشر نفسها فى حياتكو بعد كده!!! يبقى لازم تقصرى من بابه.

التعديل الإيجابى للتخريف السابق: إنسان قوى الشخصية و بار بأهله

– إحذرى هؤلاء لإن ربنا مش بيحبهم! فى تلات صفات ذميمة جدا ربنا مش بيحبها فمش معقول ترتبطى بإنسان ربنا مش بيحبه. إحذرى تماما البخيل و المتكبر و الكداب. و من فضل ربنا و كرمه إن الصفات دى صعب إخفائها لإن البخيل مثلا حيكون بيعيط وهو بيشترى لك كيس فشار!!! فسهل قوى تكشفيه.

التعديل الإيجابى للتخريف السابق: إذا وجدتى أى من هذه الصفات فأبشرى لإن الله يحب من يتحلون بها: الكريم و المتواضع و الصادق

أنا طبعا خليت التخاريف السلبية إللى كنت كاتباها قبل كده علشان تقارنوا لإن أغلب الناس للأسف بتفكر زيى فلازم كلنا نتعود نغير طريقتنا, ياريت تشاركنا بالتعليق علشان كلنا نتعلم من بعض و مستنية رأيكم 🙂

Advertisements

22 تعليق

  1. هههههههههه موضوع لذيذ
    وفى بردو سبب بيخلى البنات تستعجل على الجواز
    ان العيشة بقت صعبة والبنت مابتصدق تلاقى عريس جاهز فبتوافق على طول
    وكمان معظم الرجالة تافهة زيى كدة بيهتموا بالشكل قبل كل شىء هههههه
    فده بيدى احساس للبنات انهم مش هيتجوزا ابداا وده طبعا مش حقيقى لأن كل شىء قسمة ونصيب

    رد

    • أشكرك يا زيزو و انا سعيدة جدا بصراحتك 🙂 بس حابة أوضح لك إن لازم شكل شريكة حياتك يعجبك. دى حاجة مهمة لكن الغلط إن الشكل يكون هو كل إللى يهمك لإنك حتتعود عليه بعد يومين جواز!
      الزوجة المثالية ليك لازم تعجبك شكلا و طبعا و لازم تكون عاقل و تسيبها حتى لو كانت ملكة جمال الكون لو كان طبعها مش مناسب ليك. هى دى الفكرة.
      و طبعا الجمال شئ نسبى جدا و قصة صاحبتى أدل دليل.
      و على فكرة إنت ممكن تستفيد من كل إلى النصايح إللى أنا كاتباها و تطبقها على نفسك يعنى مثلا فكرة الحب الغير مشروط و البعد عن البنت عديمة الشخصية إللى مامتها بتقوللها تاخد كام نفس فى اليوم! بإختصار المقالة دى ممكن تبقى رجالى تماما لو أنا شلت كلمة “مهند” و حطيت بدالها “هيفا وهبى” ههههههههههه
      و نصيحة تانية يا زيزو لازم تكون حقيقى و مش مزيف و تكون معتز بنفسك و مش مهم إذا كنت حتعجبها زى ما إنت و لأ لكن المهم إنك تكون نفسك. و إللى مش عاجبه…طريق السلامة يا شربات ههههههههههه

      على فكرة و الله يا زيزو إنت أثرت نقطة مهمة ربنا يكرمك عليها. فى بنات بيتجوزا لأسباب إقتصادية محضة زى إن يكون بابها فقير قوى و يجيى لها عريس مريش فتهرب من الفقر للقهر! لإن غالبا الغنى ده بيحس إنه إشتراها بفلوسه.
      و فى ستات بتستحمل ضرب و إهانة من أزواجهم علشان لو طردهم من البيت مش حيلاقوا مكان يباتوا فيه. دول ربنا يكون فى عونهم و يلطف بهم. اللهم آمين

      رد

      • امييين

        فعلن الموضوع مفيد للرجالة فى نفس الوقت
        وفعلن البنت لازم تكون واثقة من نفسها وماتفتكرش نفسها وحشة لأن المشكلة اساسا مشكلة اقتصادية وليست مشكلة جمال وبعدين كمان الجمال جمال الاخلاق

        وعجبانى اوى فكرة كتابة مقالات بطريقة فكاهية بسيطة بحيث تجذب القارىء وفى نفس الوقت بيبقى مضمونها مهم ومفيد والكل بيستفاد منها

  2. ربنا يكرمك يا زيزو و أنا سعيدة إن المقالة عجبتك و سعيدة أكتر إنى حاسة إنك إستفدت منها بالفعل.
    وهو ده هدفى من الكتابة بلغة بسيطة إن الكلام يكون مفهوم للكل. الله يرحمه الشيخ الشعراوى رغم إنه كان عالم لغوى لكن تلاقى كتبه فى منتهى البساطة و مفيهاش تكلف و لا لعب بالألفاظ.

    و على فكرة الجمال شئ نسبى جدا و أدل دليل إن فى العشريناتات التخن كان مقياس الجمال لدرجة إن الستات كانت بتحط مخدات تحت هدومها علشان تبان أتخن و مرة جدتى و هى صغيرة شافت واحدة و قعت منها مخدتها فراحوا الناس يدوهالها فأحرجت قوى و فضلت تقول: مش بتاعتى مش بتاعتى ههههههههه
    ده زمن الخير أيام ما كانوا الستات متربيين على السمن البلدى. ده أنا والدة جدى خلفت 11 طفل! لكن دلوقتى إحنا يا دوب الواحدة فينا بتسند نفسها بالعافية 🙂
    فحتى مسألة إن الرفع دليل على الجمال ده شئ جديد على مجتمعنا فرضته سؤ الحالة الإقتصادية مش أكتر ههههههههههههه

    رد

  3. Posted by زهرة البنفسج on مايو 13, 2011 at 1:53 ص

    موضوع مهم وجميل جدا وأنا كنت قريت مقالات كتير عن اختيار شريك الحياة وعن الحياة الزوجية والزواج الإسلامي والحمدلله ده أفادني كتير جدا وعرفت نفسي وحكمت عقلي بمنتهى الهدوء بعيدا عن الضغط من الاهل او الاقارب او الاصدقاء والجيران والكلمة المستفزة جدا (عقبالك ياحبيبتي ، وهنفرح بيكي إمتى ، ومافيش جديد ) وطبعا كل ده بالنظرة اللي بالي بالك ههههههههههههه كأن ياحرام إنتي صعبانه عليهم أوي ههههههههه وصدقيني اللي قريته واتعلمته هو اللي فادني كتير في اختياري والحمدلله اختيار موفق ولازم نعرف ان التوفيق من عندالله احنا دورنا نجتهد ونعمل وبشكرك جدا جدا جدا بشكرك بالتلاته ههههههههههه على الموضوع الراااااااائع ده

    رد

    • ربنا يبارك فيكى يا زهرة و دايما بتسعدينى بتعليقاتك الجميلة 🙂 كامك بيعكس نضج شديد لإنك إستوعبتى إن الجواز قرار مصيرى فلازم تبذلى مجهود و تقرأى و تتعلمى علشان تاخدى قرار صح.
      مع كامل تشجيعى لموضوع إن الواحدة تقرا و تاخد دورات, أهم حاجة إنك تكونى صادقة مع نفسك وعارفة مزايكى و نقط ضعفك و فاهمة نوعية الشخصية إللى تناسبك و تكونى مستعدة تتقبليه على بعضه و متغيريش فيه حاجة. دى أهم خطوة من وجهة نظرى.
      و إستكاملا لموضوع الحب الغير مشروط حابة أوضح إن تقبلك لعيوب شريك الحياة بيكون سهل جدا لما تكونى دايما قاكرة مزاياه. يعنى لو جوزك هب فى وشك الصبح من غير سبب و بصيتى على يمينك حتلاقى الدبدوب الفحلقى إللى جابهولك فى عيد الحب ههههههههههه. فساعتها ممكن تتقبلى”جعيره” 🙂 بهدؤ لإنك شايفةالصورة كاملة. فدى نقطة مهمة حبيت أوضحها و أشكرك على تعليقك 🙂

      رد

  4. كلامك واقعي جدا وربنا يزيدك من علمه وننتفع بيه

    رد

    • ربنا يكرمك يا محمد 🙂 بس أخدت بالك من تعليق زهرة؟ هى قرأت كتير و إهتمت إنها تحسن الإختيار و ربنا كافئها بيك :).
      نفسى كل البنات تكون زيها و نصيحة مخلصة ليك: متنساش الدبدوب الفحلقى فى عيد الحب إللى الجاى 🙂 ههههههه

      رد

  5. Posted by أمى مصر on مايو 18, 2011 at 11:37 ص

    فى فيلم جه أول إمبارح على إم بى سى ماكس إسمه PROOF إللى شافه كويس هايلاقى فيه حاجات كتيرة جميلة جدا.وكلها دروس.. وإللى ماشفوش أنصحه يشوفه.. فيه أهم شرط لشريك الحياة. وكله فكر.لقيته فى الفيلم ده …”الإيمان” بمفهومه الواسع هوا ده مظلة شروط الإختيار .. أن تقول / تقولى : أنا بحبك أروع منها كتير أن تقول/تقولى أنا بأؤمن بيك.إحنا يمكن الكلمة مش متداولة فى ثقافتنا بس موجوده وهى “إنى بأصدقك دايما” كثقة لكن ما بتتنطقش..حضرو نفسكو ليها.. بس لو طلبتوها كشرط..لازم تتوفر عندكو أصلا!قد تبدو مستحيلة أو صعبة ولكنها تتحق بالمعرفة والعشرة لو إتحطت كمبدأ It’s amazing to say I believe in you than to say I love you !!!شوفو بقا كلمة آى لاف يو دى كتبو فيها قد قدإيه!!! وهايكتبو فى آى بيليف إن يو قد إيه .. لأنه مفيش إيمان من غير صدق

    رد

  6. Posted by أمى مصر on مايو 18, 2011 at 12:24 م

    أنتونى هوبكنز بطل الفيلم مشهور بالأدوار الصعبة والمركبة .. ههههههههه إستعدو .. رياضيا ونظريا سيكتشف العالم – وده خطاب دينى – إن الدنيا موت فى كل ثانية !! والآخرة هيا الحياه… فكرو كده فى الآيات دى هاتساعدكو.. ” قتل الإنسان ما أكفره… الآية”.. و “يخرج الحى من الميت ويخرج الميت من الحى”… فيه لقطة عملها بشكل مذهل بيتكلم مع بنته بيقولها … I’m also dead, dont I??

    رد

    • إنت شوقتنى إنى اشوف الفيلم ده 🙂 حدور عليه و إن شاء الله حلاقيه. أنا معاك تماما إن كلمة “أنا مؤمن بيك” مهمة جدا. انا الحقيقة بعتبرها مرداف لكلمة الحب لإن إللى بيحب حد بجد لازم يثق فيه و فى قدراته و يقبله زى ما هو لإنه مؤمن بيه أساسا.
      و على فكرة أغنية: nothing’s gonna change my love for you
      فيها أجزاء جميلة بالمعنى ده زى:
      You don’t have to change a thing. love you just the way you are

      I will NEVER ask for more than your love

      المعانى الجميلة دى ممكن تحقق فى أى علاقة بشرط إن الطرفين يؤمنوا بيها. على فكرة تعليقاتك على المقالة دى بالذات تتميز بالوضوح و قلة الخزعبلية … إستمر 🙂 هههههههههههه

      رد

  7. Posted by أمى مصر on مايو 18, 2011 at 9:15 م

    أنا عشان مراعى التوبك مفيش خزعبيلة .. مع إن مقولة أنتونى هوبكنز دى .. جنانية لوحدها هههههههههه .. أشوفك بقا عند أبو النجوم. فيه مفاجأة. عشان من عند أبو النجوم هاتكون البداية إللى تخليكى ماترضيش بقليلك … غيرنا الخطة ياكبتن 😀

    رد

  8. هههههههههههه يا سلام طيب سلملى على أبو ال”نجوم” بس متنساش تجوله يبقى ساعات “يجعد” هههههههههه…من كتر زرافتى رقبتى طولت ههههههههههههههه 🙂

    رد

  9. Posted by غير معروف on فبراير 10, 2013 at 12:15 ص

    انا كنت عاوزة اعرف في مشكلة لو الانسان حط في مواصفات شريك حياته غير المواصفات المعروفة انه يكون عاوز مثلا طويل او كده مواصفاته الشكلية ولا بلاش خالص

    رد

    • الحقيقة أنا شايفة إن من حق الإنسان يحط أى مواصفات تعجبه فى شريك حياته المهم تكون واقعية و متوازنة. يعنى مثلا أنا بتغاظ جدا لما ناس تتهم شباب بيهمهم شكل الخطيبة إنهم تافهين! دى مش تفاهة لإن من حقه تماما إن شريكة حياته تكون جميلة بمقايسيه هو للجمال لكن “الهيافة” بتحصل لما يكون الشكل هو كل إللى يهمه! لازم يكون حاطط صفات تانية لها علاقة بشخصيتها و جوهرها كإنسانة لإن إللى بيحصل فعليا إننا بنتعود على شكل شريك الحياة بعد يومين!
      كمان يعنى لازم يكون فى شىء من المرونة لإن لو حد حط صفات كتيييير قوى و تمسك بيها ممكن ده يخلى فى صعوبة فى إنه يلاقى الشريك المناسب. أنا عاجبانى نصيحة د.احمد عمارة إننا نحط 7 صفات أساسية لازم كلهم يتوفروا فى شريك الحياة هو بينصح إننا منتخيلش شكل معين بس أنا شايفة إن مفيش مانع نحط صفات شكلية من ضمن الصفات خصوصا إن مثلا لو واحدة عايزة شريك حياتها يكون طويل فالطوال كتير يبقى دى صفة سهل تلاقيها. المهم تكون حاطة صفات تانية لها نفس الأهمية فلو ظهر فى حياتها حد طويل و أهبل 🙂 لازم تقدر ترفضه حتى لو كان شكله عاجبها لإن بقية الصفات لها نفس الأهمية.
      فى كاريكاتير أنا عملته عن أهمية التوازن فى إختيار مواصفات شريك الحياة دى لينكه https://ba7ebmasrbegad.files.wordpress.com/2013/02/1-slide-19.png
      هى دى الفكرة أتمنى أكون قدرت أفيدك 🙂

      رد

  10. Posted by بنت الاسلام on فبراير 11, 2013 at 11:58 م

    بجد شكرا اكيد طبعا افددتيني والكاركتير حلو قوي ربنا يكرمك

    رد

  11. Posted by بنت النيل on أبريل 21, 2014 at 8:12 م

    انا عايزه اسال انا لازم اكتب الورقه كل يوم ولا بس مره وحده

    رد

  12. Posted by غير معروف on أغسطس 25, 2017 at 12:17 ص

    رائع جدا

    رد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s