و عجبى!(1) – جمعة القضاء على الفساد إنتهت بسرقة شنتطى و رحت القسم و….

كنت فى التحرير إمبارح (27 مايو) يا إخوانى للمشاركة فى جمعة القضاء على الفساد و بعد ما تعبت نفسى و صورت لكم صور تحفة علشان أنزلها المدونة شنتطى إتسرقت بالموبايل و الرقم القومى و شوية لحاليح ! و كان فيها حاجات تانية لها قيمة معنوية زى صور لبنتى و ميادلية عن ثورة يناير ده غير تذكرة حفلة فرقة نغم مصرى إللى كنت حدخلها إمبارح فى ساقية الصاوى لكن ربنا مقدرش كمان كان فيها كارنيهات عضوية أماكن مختلفة.

طبعا أكيد كلكم فاكرين إن ده ده حصل فى التحرير مش كده؟!

فشر! أنا كنت تعبانة طحن فنمت فى مسجد الزمالك إللى جنب ساقية الصاوى بين العصر و المغرب و فجأة صحيت  خير اللهم إجعله خير: بصيت جنبى ملقيتش الشنطة! ههههههههههههه قدر الله ما شاء فعل.

النوع ده من الطرائف لا يحدث إلا لى لإن الشنطة صمدت و سط ألوف مؤلفة فى التحرير و إتسرقت منى فى بيت ربنا علشان نومى نقيل 🙂 هههههههههههههه

و طبعا كلمت والدتى من موبايل احد المصليات و الناس عطفوا عليا و  إدونى فلوس علشان اعرف أروح يا كبد امى!  سبحان الله المواقف دى بتبين قد إيه الناس قلوبها فيها خير :).

المهم  رحت القسم النهارده الصبح عملت محضر و الحقيقة كنت خايفة ألاقى القسم فاضى بسبب الكلام إللى بنسمعه إن البوليس نايم فى بيتهم و كده لكن الحمد لله القسم كان عمران و الظباط كانوا فى منتهى الذوق و طبعا الظابط عاتبنى على إهمالى لكن بذوق و قاللى بذوق أكتر إنى أستعوض ربنا فى كل محتويات الشنطة لإن حرامية بيخافوا البوليس يلاقى بصماتهم فغالبا حيرموا اوراقى فى النيل…هو النيل ناقص؟!!!!

لكن الظابط قاللى حكمة جميلة قوى: قاللى إن إللى حصل ده خطأ للتعلم بمعنى إنى إتقرصت علشان أتعلم. لإن مهما الواحد بيسمع عن حاجات بتحصل لغيره لما يجربها بنفسه بتبقى حاجة تانية خالص.

الشئ اللافت إن كل إللى حكيت لهم القصة دى قالوا لى إنهم إتسرقوا قبل كده و إليكم العبر و العظات المستفادة من القصة:

1- إللى تطلب معاه ينام فى مسجد يحط شنتطه زى المخدة تحت دماغه علشان محدش يقدر يسرقها (خصوصا إللى دمهم خفيف و نومهم تقيل ربنا يجعل كلامنا خفيف عليهم  🙂 )

2- الموبايل ممكن يضيع بأى طريقة فلازم تخزنوا نمر اصحابكم على الكمبيوتر بإستمرار. للأسف أنا معملتش كده و بندم أشد الندم دلوقت.

بس فى ملحوظة مهمة يا جماعة: واضح إن احد زوار المدونة عينه مدورة و نق على الشنطة هههههههههههه لإنى ملحقتش اتهنى بيها. أيوة يا فندم هى هى نفس الشنطة إللى إتصورت بيها فى مقالة هأ هئة سعيدة يا أم شنطة جديدة! واضح إنى لازم أقرأ سورة الفلق من هنا و اريح قبل ما احط أى حاجة على المدونة. 🙂

بس عارفين إيه أكتر حاجة فارسانى؟ حفلة فرقة نغم مصرى إتفرجت عليها الحرامية  بنت الحرامية بفلوسى و عرقى و شقايا هههههههههه. بس عارفين غيه إللى مصبرنى ؟  بينى و بينكم أنا خايفة قوى على الحرامية ليكون جالها سكتة قلبية لما شافت صورة الرقم القومى بتاعى ههههههههههههههههههههههه

الحقيقة حزنى على حفلة نغم مصرى بيفكرنى  لما الفنان محمد هنيدى فى فيلم “عندليب الدقى” أخوه و قع كل الأكل من على الترابيزة فصرخ و قال:”والله غبى فى زتونة كنت حموت عليها” ههههههههههههههههه

بيتهيالى كفاية تهريج كده و نتكلم جد شوية: طبعا مفيش شك إنى إتسرقت لإنى كنت مهملة و مخدتش بالى من شنطتى لكن ساعات بحس إن ربنا سبحانه و تعالى بيقدر أشياء و بيكون ليها أسباب أعمق من ظاهرها. و أنا حاسة زى ما حسيت يوم ما قابلت الداعية مصطفى حسنى إن إللى حصل ده بيرمز لبداية جديدة فى حياتى حتكون إن شاء الله أجمل و أفضل. 

الإنسان لا يجب ان يسعى للكمال لإن الكمال لله وحده لكن يجب أن يسعى للتحسن المستمر إللى بيسموه فى اليابان Kaizen و زى ما قلت فى خاطرة ليه برضى بقليلى مع إن جوايا كتير حاسة إنى أقدر أكون أحسن مما أنا عليه النهارده  فى كل جانب من جوانب حياتى و كلنا نقدر على كده لو أخدنا القرار. فمش لازم شنطكوا تتسرق علشان تحسوا بالمعانى دى كفاية تستفيدوا من تجربتى و مستنية تعليقاتكم 🙂

20 تعليق

  1. Posted by زهرة البنفسج on مايو 28, 2011 at 11:57 م

    قدر الله وماشاء فعل والحمدلله إنك بخير ياحبيبتي ربنا يحفظك من كل شر وفعلا خدي بالك بعدكده وربنا ستير على عباده المؤمنين

    رد

    • الحمد لله على كل حال يا حبيبتى 🙂 بينى و بينك الموبايل كانت بطاريته ضاربة و بيطفى كل ثانية و كان نصه أسامى ناس مش فاكراهم ده غير إن لستة الهطل كانت وصلت لهطل 12 🙂 ههههههههههههه خلينى أغيره مش مشكلة بس حفلة فرقة نعم مصرى هى إللى كنت حموت عليها ههههههه (بهزر طبعا :))

      رد

  2. Posted by أمى مصر on مايو 29, 2011 at 8:06 ص

    هارد لك .عين العقل إللى عملتيه بعد ما “نمتى نوم تقيل”!!. بس مين يسمع يا كوتش !!:-D !!!! فى ناس تانية غيرك”هطله هطل السنين”!!! قال إيه بقا لهاأربع أشهر عماله “تلف حولين الجامع” معتدل مارش.. بس محلك سر 😀 طب تيجى إزاى ؟؟؟ مارش .. محله ؟! على الفلوس إللى سرقها الحرامية.و”لسته الهطل إللى وصلت هطل 100″ وإشى فئويةوطائفية وحزبية .. ويتلم عليهم بتوع الفتوى بقا ويشتغلوهم صح ههههههههههههههههه والجرايد تكتب والمحطات فى حالة إنعقاد مستمر للخوار والحزق كل ده برضو بتحويشة العمر إللى بقالها 30 سنة فى الشنطه هههههههه.. والحراميةقال إيه قاعدين فوق السطوح بيضحكو على “الهُطل” بعد ما “غرزو” فى دايرة الإستغراق الإنبطاحى إياه ..ياما البدل بتدارى سلطه ومحدش دارى .. ههع هع … ألاقيش عندك تليفون “حكيم” نفسانى .. لحسن فيه دكاتره دلوقتى بتشتغل مشتشارين لحسنا فى دماغ الشعب ههههههههههههههههههه

    رد

  3. Posted by مصطفي العليمي on مايو 30, 2011 at 4:23 م

    ; طرفه لطيفه من إنسانه خفيفة الظل

    رد

  4. انا اللى سرقت الشنطة :))
    هههههههههههه

    قدر الله وماشاء فعل ربنا يعوضك خير ان شاء الله

    رد

    • ههههههههههههههه انا مقدرة صراحتك يا سامح بس ممكن ترجع لى الزتونة إللى كانت فى الشنطة؟ 🙂 هههههههههههه
      الحمد لله على كل حال و بصراحة أنا دفعت تمن إهمالى مش بنكر بس أهه الواحد بيعيش و يتعلم 🙂

      رد

  5. معلش ربنا يعوض عليكي بس خللي بالك المره الجايه يكون نومك خفيف شويتين وبعديين تاني مره لما تشتري شنطه جديده اقرائي عليها يس وايه الكرسي وكل ايات الحفظ من السرقه والعيين اللي زي الحجر وبعدين ربنا يحنن قلب الجماعه اللي في ساقيه مكي ولما يكون عندهم حفله تانيه يهدوكي تذكره جديده في حفله جديده والف مبروك علي الشنطه الجديده اللي هتشتريها والموبايل الجديد وسلموللي علي المترو

    رد

    • هههههههههههههه مسألة إن نومى يكون خفيف مستحيلة ده فى نوادر على تقل نومى منها إن مرة واحدة صاحبتى وقفت على رجلي و أنا نايمة و برضه مصحيتش هههههههههههه الحل إنى أكتفى بالنوم فى بيتنا أو أحط الشنطة زى المخدة تحت دماغى…
      و على فكرة أنا كنت بهزر لما قلت إنى حاسة إن الشنطة إتحسدت…أنا أهملت و بس هى دى الحقيقة 🙂
      أما بالنسبة للموبايل فأنا إقتبست موبايل بنتى بطلت تستعمله و أحسن بمراحل من التانى إللى بيهيس و يطفى على الفاضية و المليانة 🙂 أما الشنطة الجديدة فلسه مجتش لإنى معنديش وقت ألف على حاجة عدلة فى طوفان الأذواق الرهيبة لإنى عمالة أحضر فى ندوات اليومين. لسه جاية من ندوة للفنان محمد صبحى حكتب عنها قريب إن شاء الله
      وسلموللى على التروماى ههههههه

      رد

  6. الدروس المستفادة من القصة او اول ما يقفز لذهن القارىء هو عدم الصلاه ودخول المساجد عشان اللى فيها حرامية دة اللى هيوصل للناس من القصة الجميلة بصرف النظر عن الطابع الكوميدى المؤثر وتفضيل ميدان التحرير عن المسجد اللى هو بالعامية المطلقة التحرير أأمن مكان عالأرض اسمحيلى اقولك دة كلام فى البطاطا وعارف انك وضحتى انها اتسرقت بسبب اهمال منك عشان دة طبعنا كبشر بس موش معاكى فى انك تتاجرى بعنوان زى دة لمجرد جذب القراء وانا لا سلفى ولا شيعى ولا اى بتنجان انا واحد مسلم عنوان مقالتك استفذه دخل يشوفة وتذكرى مايلفظ من قول الا لدية رقيب عتيد وميدان التحرير دة الحكومة كانت بتعمل مصالح على خلق الله قدام عينى ودة نوع سرقة بس بالأكراه… لو ربنا كاتبلك تتسرقى وانتى فبيتك ومع مليون بنى ادم واسرتك كلها جمبك هتتسرقى فبلاش عناوين مطرقعة وبلاش ندخل دور العبادة فى اطار كوميدى دة موش فرض رأى دة اقتراح وبدل الفرقعة دى كنتى صبرتى وقولتى الحمد لله وربنا يعوض عليكى بدل من الشكوى على الملاء واظهار المساجد بأنها مكان غير صالح عشان شنط البنات بتتسرق فيها 🙂

    رد

    • أول حاجة لفتت نظرى لحضرتك هى إن إسمك خيال علمى و الحقيقة إن تعليقك أغرب من الخيال بالنسبة لى!! و إسمح لى أرد على النقط إللى حضرتك طرحتها بحسب أهميتها:
      * فى سرقات بتحصل فى المساجد كل يوم و فى الحرم الشريف كمان للأسف لكن ده عمره ما حط من قدسيتها كأماكن للعبادة! و الناس كلها عارفة كده و كلنا بنروح نصلى فى المسجد و محدش بطل يروح للسبب ده. حضرتك محسسنى إنك أول مرة تسمع عن سرقة حصلت فى مسجد و بالتالى أبقى أنا مسؤولة عن تشويه صورة دور العبادة و أنا بصراحة مش مصدقة الحكاية دى!!! و مش مقعول لما أحكى عن واقعة حصلت لى و بتحصل لناس كتير غيرى أكون بقول للناس متصلوش فى الجامع!!! إيه الخلط و قلب الحقايق ده؟! هى موهبة فريدة عند بعض الناس إللى بيتعمدوا تصيد الأخطاء للآخرين ويؤسفنى إن حضرتك واحد منهم!!! و لعلمك انا شخصيا صليت فى نفس المسجد لما رحت الساقية بعدها بإسبوع!
      * بالنسبة لعنوان المقالة: أنا كاتبة محترفة بس بالإنجليزى و فى قواعد تشترط توافرها فى عنوانين المقالات:
      1- إنها تكون شيقة علشان تجذب القارئ
      2- إن العنوان يكون صادق بمعنى إنى مقولش معلومات غلط علشان أخلى القارئ يفتح و بعدين ميلاقيش إللى بيدور عليه
      أعتقد إنى طبقت القاعدتين دول فى عنوان مقالتى وواضح إن التشويق نجح بدليل إنك قريتها بس واضح برضه إن كان عندك توقعات مسبقة عن طبيعة القصة فلما مطلعتش زى ما إنت تخليت حسيت بخيبة امل و قررت تتهمنى إنى بشوه صورة المساجد إللى كل الناس عارفة إن بيحصل فيها سرقات كل يوم!!!
      * أما أكثر تهمك ليا إضحاكا على الإطلاق إنك بتقوللى “كنتى صبرتى و قلنى الحمد لله” هو أنا لما أحكى قصة أبقى مش صابرة و مبقولش الحمد لله؟ ده انا قلت الحمد لله بمنتهى القوة فى القصة و إعترفت بخطأى و بصيت لأبعد من المعنى الظاهرى للقصة و ناشدت كل القراء إن هم يحسنوا نفسهم و أدل دليل إنى مش متضايقة من إللى حصل و مدياله حجمه إنى أخدت الموضوع تهريج لكن فى نفس الوقت إديت نصائح جادة.
      كون حضرتك مشفتش كل الأشياء الواضحة دى, ده شئ يرجع لك و إسمح أهدى لحضرتك النكتة دى:
      عالم أمريكى كان بيعمل تجارب على ضفدعة فقطع رجل من رجليها و قال لها نطى فنطت. و بعدين قطع تانى رجل و قالها نطى فنطت. فضل يعمل كده لغاية مرة قطع كل رجليها فلما قالها نطى و منتطش بعد ما فقدت كل رجليها و صل لإستنتاج عبقرى: و عند قطع الرجل الرابعة للضفدعة فإنها تفقد حاسة السمع 🙂 ههههههههههههههههههههههههههه
      صباح قلب الحقايق!! نورت المدونة 🙂

      رد

  7. خلينا بقى نرد على الكلام اللى جابلى خلل فسيولجى فى وظائف الغدة الصنوبرية بس بالترتيب 🙂 مع العلم انى كان كلامى مفهوش هجوم كان مجرد رأى عابر ولا نهيتك عن حاجة انتى بتكتبيها بس وضحتلك احتمالية الألتباس اللى ممكن تدخل على فئة كبيرة من القراء خلينا نقوم النسبة اللى بتاخد الكلام من عنوانة ودول العوام او فئة العشرينات الجيل اللى انتى ممكن تمدية بفكر من عندك ( والعوام هم الناس البسيطة )

    1- إسمى المستعار هو اسمى وحدى ولا حق لك فى التدخل فية طالما كان غير خادش للحياء خيال علمى مهلبية بليلة انا حر ياستى طب منا مجتش علقت على اسمك وقولت اسم قديم مثلا واعملى استفتاء هتلاقى الناس بتقولك هو حرة فى اسمة طالما مجرحش بية حد 🙂

    2- معترضتش على كون السرقات بتحصل فى كل مكان وزمان وبشتى الطرق بس انتى كام مرة اتسرقى فى مكان عام او وانتى بتشترى حاجة وسبتى كل الكلام دة واختصيتى المسجد او دور العبادة ؟؟ وعايزك تنكرى ان موضوعك مكانش فية مادة سخرية واضحة فحت اللى هو متسرقتش فى الميدان اتسرقت فبيت ربنا وعجبى !!

    3- لا انا فنان فى قلب الحقائق ولا عايز اثبت حاجة ولا بهاجمك اصلا ولا بهاجم اى كائن حى على الكوكب ولا حتى فى سابق معرفة مبينا او قرأتلك حاجة قبل كدة ( برضة مسامحك على اتهامك برغم انه ملوش اساس من الصحة وموش منطقى 🙂 )

    4- تعالى اما اقولك كلمتين من بتوع الناس الكبيرة منهجك فى الكتابة معلقتش علية والدليل انك معندكيش اخطاء املائية 🙂 واعترافى الخطير ليكى مقالك مكانش مشوق ليا انا احتفظت بالتقييم جوايا منعا للأحراج بس طالما الامور وصلت لأنك تتكلمى على لسانى احب اقولك ان موضوع لا كان شيق ولا بتنجان دة استفزنى موش اكتر دخلت اشوف عشان لو فى هرطقة من اللى بتحصل اليومين دول اعرف مصدرها لا اكثر ولا اقل 🙂 …….. ( كلام سر محدش يبص علية .لا داعى لأكل تفاحة عرفت انها فاسدة من اول قضمة ) صاحب العقل يفهم

    5- طب متضايقة لية طالما اتهامتى ليكى مضحكة وحبوبة موش معترض اضحكى حتى النخاع بس لو انا كاتب ودى مهنتى وليا قراء او حد عابر دخل قرأ حاجة ليا هاخد تعليقاته على محمل الجد حتى لو كان اتهام موش هضحك علية وانا موش بملى عليكى انك تعملى كدة دة مجرد تعبير عن رأى على طريقة التيك اواى:) اما بخصوص قلب الحقائق اياه انا اخرى اقلب تى شيرت شراب انما حقائق لاء عشان الحقائق هتفضل حقائق مهما هرطق البشر

    6- استفسار جابلى احتقان وحاله صرعية مؤقتة هو اية لما انت دخلت وملقتوش زى منت عايز فأصبت بخيبة أمل بجد همووت واعرف اية اللى انا كنت متوقعه واللى دخلت عشان الاقيه لقيت عكسة وكمااااان اصبت بخيبة أمل ؟؟؟؟؟ ارجو الافادة عشان الفضول هيموتنى انى اعرف اية اللى انا كنت متوقعه قبل ميجيلى سايكزوفيرينيا

    6- اما بخصوص النكتة إذا ما تغاضينا عن التلميح المهين والساخر اللى بتحملة بعد كلامك موش هلومك عليه (و بينى وبينك نكتة فاكسة ) هبقى اصمملك واحدة جديدة احنا عايزين ننول الرضا وربنا يوفقك يا هبه 🙂

    رد

    • يا سلام سلامتك من الخلل الفسيولوجى 🙂 و أنا كمان حرد على ردك البناء بترتيب الأرقام:
      1- أنا لم أسخر من الإسم إللى إخترته لنفسك إلا فى سياق تعليقك على مقالتى بس مش أكتر. تصدق إنه عجبنى و لفت نظرى لإنه مش عادى؟ هى دى الحقيقة لكن بعد ما قريت تعليقك الغريب حسيت إنك إسم على مسمى! أنا عمرى ما علقت على الأسامى إللى القراء بيختاروها لنفسهم. دى أول مرة الحقيقة لإن تعليقك كان “منعش” و مختلف!
      2- ردا على سؤال حضرتك و تلميحك إنى سكتت عن كل السرقات إللى حصلت لى فى اماكن عامة و قررت بس أشوه صورة المسجد فأنا أقسم بالله العظيم إنى دى أول مرة اتسرق فى حياتى! أيوة كان فى سخرية من المفارقة إن متسرقتش فى مكان مليان بشر و إتسرقت فى بيت ربنا فى نفس اليوم لكن ده مش معناه إنى بقلل من قدر دور العبادة و على فكرة إنت فاهم ده كويس بس مصمم تلف و تدور فى الحكاية دى. و رغم إنك متعرفنيش حكمت عليا إنى إتسرقت ميت مرة قبل كده وقفلت بقى لكن طلبت معايا اشوه صورة المساجد فجأة و ده محصلش! يبقى بالإضافة لموهبة تصيد الأخطاء فى موهبة تأليف واضحة. إستمر 🙂
      3- إنت شايف إنك مش فنان فى قلب الحقايق. إللى يريحك طبعا لكن كفاية بس نكتة إنك بتقوللى إنى مصبرتش و مقلتش الحمد لله. مش ممكن أى حد يوصل للإستنتاج ده جتى لو قرى المقالة و هو نايم! لكن طبعا حضرتك مبتقلبش الحقايق و لا حاجة. الحقايق هى إللى بتققلب نفسها بنفسها ههههههههههههه (و إوعى ترد تقوللى إنى إسلوبى ساخر لإن سعتك البادى. أنا مش بمنعك من الرد طبعا أنا بس بسبق لإنى فهمت طبيعة شخصيتك)
      4- طبعا تعليقك ده بيوحى إن إحنا سبنا اصل المشكلة و مسكنا فى القشور! دلوقتى المشكلة إنحصرت فى اخطائى الإملائية! نا معترفة بكده بس دى مدونة مش جريدة بعبر فيها عن نفسى بلغة عامية و شكل غير رسمى و بعتمد على إن القراء حيفهوا إللى أقصده لإن الأخطاء بسيطة.
      تهكمك على مقالتى و إنك بتقول إنها “مش شيقة و لا بتنجان” خلانى أدركت جزء من مشكلتك معايا. واضح ن حضرتك مش بتقرا بنركيز لأن أنا لما كنت بتكلم على عنصر التشويق كنت بتكلم على التشويق فى عنوان المقالة مش المقالة نفسها و كونك قررت تقراها من حيث المبدأ, ده معناه إن العنوان شدك أو إستفزك على حد قولك (و ياريت ترجع لتعليقى و حتلاقى إنى متكلمة على العنوان مش المقالة نفسها). أما كونك شايف إنى إسلوبى فى الكتابة مش حلو فده رأيك و إنت حر فيه لكن قراء المدونة الدائمين لهم راى تانى و ده يكفينى. (إللى بيعجب كل الناس منفاق)
      5- أحلال على بلابله الطير حرام على الطير من كل صنف؟ مين قالك إنى متضايقة؟ هو أنا لما ارد على حد علق على مقالة فى مدونتى أبقى متضايقة؟ أنا كنت مسخسخة من الضحك و خصوصا إنى ختمت مقالتى و أنا بدعو القراء يتأملوا فى مغزى القصة و إن كلنا نحسن من نفسنا. لقيتك بادئ تعليقك بتقوللى الدرس المستفاد من القصة إننا منصليش فى المسجد علشان حنتسرق! هههههههههههههههههههههههههههههههههههههههههههههههههههه و مما يضحك الثكلى إنك مستغرب ليه أنا بقولك إنك بتقلب الحقايق! أما أنا مفترية بشكل هههههههههههههههههههههههههههههههههههههههههههههههههههههههههههه
      6- إلحق خد مضاد ل سايكزوفيرينيا لحسن دى بعيد عنك و عن السامعين معدية :). أنا مش ححكم عليك و لا حألف قصص بإسمك زى ما إنت عملت معايا لكن إنت حسستنى فى تعليقك السابق إنك كنت متوقع تلاقى حاجة و مليقتهاش فعشان كده أنا قلت الكلام ده. إنت أدرى بنفسك و بالسبب إللى خلاك إرتكبت جريمة لا تغتفر فى حق نفسك و قريت مقالتى:)
      7-رغم وصفك لنكتتى إنها فاكسة فأنا مش قادرة امنع نفسى إنى أهديك نكتة بعنوان “تلاكيكو عجب”:
      النمر كان حاقد على التعلب لإنه ذكى فكل ما يشوفوه يضربه بالقلم على وشه و يقول:إنت مش لابس الطاقية ليه؟
      الأسد خد النمر على جنب و قال: أنا كمان متغاظ من التعلب بس كده ممكن الغابة تتعاطف معاه. أحسن حاجة إطلب منه يجيب تفاح فلو جابه اصفر قله:مجبتش تفاح أحمر ليه يا غبى و إضربه زى ما إنت عايز و لو جاب تفاح أحمر قله:مجبتش تفاح اصفر ليه يا غبى و إضربه زى ما إنت عايز.
      النمر عجبته الفكرة و قرر ينفذها فنده للتعلب و قال: إجرى يا تعلب جيب لى كيلو تفاح لكن التعلب كان ذكى فقاله: “عايزه أحمر و لا اصفر” فالنمر رد و قال:إنت مش لابس الطاقية ليه؟ وضربه بالقلم على وشه:) ههههههههههههههههههههههههههههههههههههههههههههههههههههههههههههههههههه

      إنت لا تتخيل مدى إستمتاعى بالرد عليك أنا قربت أقع على الأرض من كتر الضحك…يا ريت لما طروفك تسمح تبقى تقرى لى مقالات تانية و تنقدها بنفس إسلوبك البناء. لكن طبعا لو كان إسلوب مقالتى إللى مفيهاش تشويق ولا بتجنان مش حيشجعك إنك تعمل كده, أنا حمسح دموعى وحرضى بالأمر الواقع و كفاية عليا إنك شنفت آذانى و أمتعتنى بتعليقك على هذه المقالة…نورت المدونة 🙂

      رد

  8. هبتدى كلامى بقانون الفيزياء العتيق
    (لكل فعل رد فعل مساو له فى المقدار ومضاد فى الأتجاه) وكلامى دلوقتى هو رد الفعل على ردك الشخصى وعشان برضة أكون واضح أكتر ومبقاش ممل وممكن تعتبرية كلام عابر لو موصلش المغزى منه بشكل مباشر بس انا توسمت فيكى إنك لماحه وبتاخدى الكلام من كذا زاوية و بعتبارك كاتبة او دة مضمون دراستك او ماشابه ذلك قولت عندك خلفية (بالكناية او المجاز) او ما يطلق علية تشبيه تقريبى من الممكن حدوثة لأى شخص ولم اخص بالذكر حضرتك او غيرك… 🙂
    وهحاول قدر الامكان انى أخليكى تشوفى بعينى نفسها نفس اللى انا شايفة ولو انى غير مضطر لذلك لأن كلامى لا يحتمل حدين إذا ما تغاضينا عن اسلوبك الساخر فى كلامك الموجه على ردى الشخصى…مبحبش الامثال الشعبية وخصوصا اللى من طراز (اللى بيته من ازار ميحدفش الناس بالطوب ) مع العلم انى عندى المقدره ارد بردود ساخره لا حصر لها وعن شرط ردى لن يحمل الفاظ جارحه بس انا هبتلع كلامى مؤقتا عشان محتاج ارد على كلامك الاول والتعليق ربما يأخذ شكل فقرات 🙂

    درس مستفاد/ طبعا فاهم انك موش قصدك ..انا اتكلمت على صياغتك للعنوان والا اصلا مكنتش علقت على كلامك انا علقت على الكلام عشان اوضحلك حاجة وللأسف انتى موش قبلاها ..وللمرة المليون حاولت قدر الامكان اقولك الموضوع موش شخصى ولا بهاجمك ولا بهاجم اى كائن حى فى المجموعه الشمسية 🙂 وانا لو فهمتك صح ربما موش كل الناس هتفهمك صح وقولت انك ممكن تمدى ناس بفكرك والأنسان بيتفاعل مع المحيط بتاعه بيأثر فى اللى حواليه واللى حواليه بيسيبو أثر فيه اللى هو توخى الحذ. .قشطة ؟…قشطة.

    وبالعكس كنت بتمالك نفسى عشان مردش بأسلوب ساخر فكنت بقفش نفسى على غرار جالى خلل فسيولوجى وسايكزوفيرينيا ومازلت بحاول بس للأسف مقدرتش سامحينى على الجاى دة 🙂

    نظره ذات ابعاد سرى دى / لما قولت انك سيبتى كل مرة اتسرقتى فيها مكنتش بخصك او بخص شخص معين أى مجازا والدليل انى قولت مفيش سابق معرفة مبينا يبقى اوتوماتيكى نستنتج انى بتكلم عن اكتر من مليون حالة سرقة بمليون شكل مع مليون شخص ومليون مكان مختلف عن المساجد بس انتى اخترتى الواقعه بتاعت المسجد على حد كلامك لأنها حصلت معاكى وبتقولى انها بتحصل منذ بدء الخليقة …. طب طالما كدة بقى !! ردى عليكى من نفس كلامك يبقى مفيش مفر ولا اوبشن تانى افهمك بية غير انك كنتى بتحاولى احياء ذكرى سرقة الشنط فى المساجد على طريقة الأحتفال بالالفية الجديدة والفالانتين :)…

    وللمرة التريليون انا اعترضت على ربط السخرية بالقضية والمعنى الخفى فى المكانين محل المقارنه … ومستعد اخرس خالص لو موصلش قصدى ليكى او مستعد افهمك حتى لو كلفنى الأمر 4 مجات قهوة و3 علب سجائر من النوع الردىء 🙂

    كلمتين على انفراد / تخمينك سليم انا خدت نظرة على مقالك وانا مأنتخ ومتزحلق على الكرسى وأديته ما يستحق من وعيى الشخصى ما يستحقة اى 10 % ودى نسبه بجد يوسف وهبى لو كان عايش كان طلع وقال ( ياااالااا الهووول) 🙂 وأتحداكى يا هبه انك عرفتى شخصيتى او انا مين فى وسط الناس زى مبتقولى.!.. ولو فاكرة انك عرفتى من مجرد ردودى اسمحيلى اقولك….( بجد انتى فى ورطة ) 🙂

    ادينى عقلك / (مع الأعتذار لصاحب البرنامج الكوميدى) الأن ولفترة محدودة اكبر دليل على انى موش الوحيد اللى بيسيب تعليقات وهو مأنتخ وموش مركز ====> هو انك مفهمتيش جزئية انى موش معترض على منهجك فى الكتابة لأنك معندكيش اخطاء املائية …دة بأعتبار ان الكاتب يتم تقييمه من اخطاءه الأملائية وليس فكره ومفرداته وطريقة صياغته للموضوع !! وذمتك هل الرد بتاعى ليه علاقه بالقشور وشامبو هيد اند شولدرز بعد موضحته ؟ 🙂 تعليقى كان نوع من انواع المداعبه ليس إلا 🙂

    فقره علميه / هفهمك زى مفهمتينى فى النقطة السابق ذكرها …السايكزوفيرينيا هو الأنفصام فى الشخصية وموش معدى وملوش مصل معين غير مخدرات بتخلى الوعى فى حالة ثبات مؤقت واستقرار عقلى وبتلغى القدرة على التخيل وانا برشح مصل بنتوثال الصوديوم مصل الحقيقة.. عندى اعانى من سايكزوفيرينا انتى السبب فيها احسن معانى من حالة بارنويا فى اخطر مراحلها ههههههههههههههههههههههههه 🙂

    المسامح كريم / اه ..ايوه ..فعلا ده انا…بالضبط كدة..معنديش مانع ابقى مسامحك وأبقى كريم 🙂 بس بعد التركيز على حتة سعادتك البادىء انا اعرف امتى اعمل كنترول وامتى ابقى ساخر ازاء موقف يستحق ذلك وفى فرق بين سخرية لايت غير مؤذية وبين سخرية مهينة لمجرد السخرية 🙂 شكل النكت بتاعتك…وده ردى عليها 1 + (-1) = 99.5 % complete

    كلمة محشورة فى زورى / صياد اخطاء وقلب حقائق وموهبة تأليف أقولك …انا اللى اكلت الجبنه !! ولا حاجة من اللى انتى قولتيها صح… اصبتى فى مصطلح واحد بس مؤلف ( مؤلف الحان ومهندس صوت غير اكاديمى) يعنى مليش علاقة بالليلة بتاعت الكتابة دى بس دة ميمنعش انى عندى رأى لكل قضيه فى مجتمعنا الشرقى .

    اخر حاجه شكلها / انا موش هعلق على مواضيع تانى حفظا لأراقة الدماء وعشان حالة البارانويا اياها وعشان انا وانتى من مصر انا خلصت مج القهوه بتاعى حالا وحاسس انى بنام على نفسى شكله بن مغشوش.! ربنا يوفقك يا هبه والمدونه منوره بناسها واللى بيكتبوا فيها.:)

    رد

    • أنا إديتك الخلاصة فى نكتتى التانبة إللى معجبتكش: إللى قاصد يتلكك لغيره مش حيعدم الوسيلة.
      إنت معاك حق إن أنا معرفكش بس بعد ما خلصت تعليقى إمبارح راهنت نفسى إنك حترد عليا بسرعة و بتعليق أطول من إللى قبله و قد كان! فطبعا انا معرفكش على المستوى الشخصى لكن إلى حد ما قدرت افهم حتتعامل معايا إزاى.
      ردودك على متناقضة تناقض لا يغتفر بصراحة لإنى لو سلمت جدلا إنك مصاب بفقدان الذاكرة تقدر تقرا التعليقات إللى كتبتها فى الأول قبل ما تعلق تانى. إنت لما تقوللى “كنت حمدتى ربنا و صبرتى” إنت كده مش بتهاجمنى على المستوى الشخصى؟!
      و سبحان الله ألف مرة! فجاة إتضح إنك فاهم إنى مش قاصدة أشوه صورة المساجد لكن خايف أحسن الناس التانيين يفهموا غلط! إطمن لو قريت كل التعليقات إللى سبقتك حتلاقى إن الناس فهمونى صح فأشكرك على إهتمامك المفاحئ بسؤ فهم البشرية و إفتراضك إن هما أغبيا و حيفهمونى غلط و إنت الذكى الوحيد إللى فهمنى صح! مش بقولك عندك موهبة؟
      الفرق الصارخ و بينك و بين القراء إللى علقوا قبلك إن إنت دخلت تدور على سلبيات و إللى بيدور على سلبيات بيلاقيها. ده كلام علمى يؤكد مضمون نكتتى إللى طبعا محازتش إعجاب سعتك!
      الحقيقة أنا بعد ما خلصت التعليق على كلامك المرة إللى فاتت قريت دعاء اللغو لإنى حسيت إنى ضعيت وقتى ووقت أى قارئ حيفكر يقرا سلسلة الترهات إللى دخلت نفسى فيها من غير ما أحس. و إسمح لى بثانية أأقوله قبل ما أختم هذه السلسلة من الهرطقة :
      إنت دحة و أنا كخة و إذا كانوا السلفيين إنتصروا فى معركة الصناديق فإحنا الإتنين لازم تاخد وسام السفسطة من الدرجة الأولى! لكن بما إنى إكتشفت بعد فوات الأوان إنك دحة و أنا كخة فأنا برفع الراية البيضا و بعلن إنتصارك و المرة دى تخمينى إنك مش حترد على التعليق لإن القهوة خلصت! 🙂 و لا يمكن تتعمد ترد علشان تثبت لى إن تخمينى مش محله؟ وارد برضه طيب يبقى انا ححط إحتمال 50% إنك حترد و 50% إنك حتشرب جنزبيل بالقرفة فى مدونات ناس تانيين. بس كده أنا فى السليم! ورينى بقى حتغلطنى إزاى المرة دى ههههههههههههههههههههههههههههههه
      واضح إنى محتاجة أأقول دعاء اللغو مرة تانية :)….نورت المدونة رغم إنك متطولتش خسارة إنى معنديش قهوة أقدمها لك! ربنا يهدى الجميع …قول آمييييييييين 🙂

      رد

  9. تحذير ممنوع لأقل من 19 سنه

    بالنسبه للـ 50 % الأولى انا مدفوع على الرد عشان انتى اللى فتحتى باب المساحه دى واللى انا قفلته قبل مخرج ومكانش فيه نيه تانى بكل صدق انى ادخل هنا او اعلق على حاجة ليكى او لغيرك ودعيتلك بالتوفيق (سرا وعلانيه) ولكن موش هنا دلوقتى عشان ارد واغير حقيقة زى مبتقولى …بالعكس انا لو اعرف من البداية انك شخصيه نمطيه وقافله دماغك على فكر معين حتى لو جالك براهين الدنيا على حاجه عمرك ما هتقبليها حتى لو جسدتها كلمة كلمة وبالتفصيل الممل كالأتى …وكل ده حصريا فى …..تن تراتن تن تتاتااااا

    *** الــــــمـــــــــواجـــــــهــــــــه ***

    هبه / أنا إديتك الخلاصة فى نكتتى التانبة إللى معجبتكش: إللى قاصد يتلكك لغيره مش حيعدم الوسيلة.

    انا / لا موش هعدم الوسيله استخدمى ما شئتى فى التعبير وليس لمجرد التلكيك وخصوصا انها كانت ومازالت تحت عنوان اخر مره .

    هبه / ردودك على متناقضة تناقض لا يغتفر بصراحة لإنى لو سلمت جدلا إنك مصاب بفقدان الذاكرة تقدر تقرا التعليقات إللى كتبتها فى الأول قبل ما تعلق تانى. إنت لما تقوللى “كنت حمدتى ربنا و صبرتى” إنت كده مش بتهاجمنى على المستوى الشخصى؟!

    أنا / لاء يا هبه انا قولت قبلها ده موش فرض رأى ده مجرد اقتراح والكلمتين دول عائدين على مجمل الكلام ! راجعى الكلمتين دول فى التعليق ! مع مراعاه انه كلام عفوى وليس كلام كاتبه محترفه مثلك واخدتيه من باب الهجوم بدلا من باب النصيحه 🙂 بالأضافه لأنى بشوف الكاتب ده عباره عن رمز يتجاوز حدود الماديات احيانا بإبداعاته.

    هبه / و سبحان الله ألف مرة! فجاة إتضح إنك فاهم إنى مش قاصدة أشوه صورة المساجد لكن خايف أحسن الناس التانيين يفهموا غلط! إطمن لو قريت كل التعليقات إللى سبقتك حتلاقى إن الناس فهمونى صح فأشكرك على إهتمامك المفاحئ بسؤ فهم البشرية و(( إفتراضك إن هما أغبيا ))و حيفهمونى غلط و إنت الذكى الوحيد إللى فهمنى صح! مش بقولك عندك موهبة؟

    انا / من اول وجديد قولنا اول كلامى فاهم وقولنا بلاش نتاجر بعناوين ووضحتلك الانطباع اللى ممكن يوصل لناس معينه والدليل انى مقولتش انى بطلت ادخل المساجد ولا دخلت وقولتلك انى موش هصلى فى المساجد بسببك كل اللى عملته انى سبت رؤيه معينه لعنوانك وشرحت معاييرها وبتلقائيه وده موش تناقض منى دة بس سوء فهم منك..وانتى عارفه انى موش فاقد للرأى عشان ارتب ردودى او استمد فكرى من غيرى كمان انتى اللى افترضتى الغباء فى القراء وليس انا شكرا لتوريطك ليا والكلام على لسانى مرة اخرى .مجبتش سيرة الغباء فى كلامى ابداااا ولا من مفرداتى اللى كلمتك بيها بس قولت كلمه ارقى وهى الالتباس على فئه معينة من الناس ولم اتهمهم بالغباء والعياذ بالله…لو قصدك تسخنى القراء عليا …استمرى هتبقى بارعه فى الجزئيه دى !!! وانا لا الذكى الوحيد ولا رمزى عبيد انا اسمى احمد..اهلا وسهلا ازى الصحه عامله ايه 🙂

    هبه / الفرق الصارخ و بينك و بين القراء إللى علقوا قبلك إن إنت دخلت تدور على سلبيات و إللى بيدور على سلبيات بيلاقيها. ده كلام علمى يؤكد مضمون نكتتى إللى طبعا محازتش إعجاب سعتك!

    انا / لم ادخل هنا عمدا كان عن طريق المصادفه موش ميولى جو المدونات ومكنتش بدور على اى حاجة هنا والدليل انى مقرأتش ولا علقت على حاجة غير العنوان دة يعنى موش حاطط كسروله على دماغى ولابس فانله حمالات واخد فيها طلقه وداخل انكد وادور على سلبيات المدونات واللى بيكتبو فيها !! متلازمة النكت بتاعتك تؤكد انك نمطيه زى متفقنا !! وسبتلك الرد عليها وكان واضح.

    هبه / الحقيقة أنا بعد ما خلصت التعليق على كلامك المرة إللى فاتت قريت دعاء اللغو لإنى حسيت إنى ضعيت وقتى ووقت أى قارئ حيفكر يقرا سلسلة الترهات إللى دخلت نفسى فيها من غير ما أحس. و إسمح لى بثانية أأقوله قبل ما أختم هذه السلسلة من الهرطقة :

    انا / الطبيعى عندنا اننا نقول الدعاء دة بعد اى مجلس يعنى موش فكلامنا انا وانتى وبس !!. وانا بعد مخلصت التعليق على كلامك لقيت ورقة بمتيين جنيه كانت ضايعه منى 🙂 اسف على ضياع وقتك ووقت القراء واسف على ضياع وقتى قبل منك. وحل المعضلة دى هتلاقيه فى الاسفل.

    هبه / إنت دحة و أنا كخة و إذا كانوا السلفيين إنتصروا فى معركة الصناديق فإحنا الإتنين لازم تاخد وسام السفسطة من الدرجة الأولى! لكن بما إنى إكتشفت بعد فوات الأوان إنك دحة و أنا كخة فأنا برفع الراية البيضا و بعلن إنتصارك و المرة دى تخمينى إنك مش حترد على التعليق لإن القهوة خلصت! 🙂 و لا يمكن تتعمد ترد علشان تثبت لى إن تخمينى مش محله؟ وارد برضه طيب يبقى انا ححط إحتمال 50% إنك حترد و 50% إنك حتشرب جنزبيل بالقرفة فى مدونات ناس تانيين. بس كده أنا فى السليم! ورينى بقى حتغلطنى إزاى المرة دى ههههههههههههههههههههههههههههههه

    انا / ايه دحه دى ؟ هو لازم اهانه فى الليله والسلام ؟ قاسيه جدااا زى متعودت منك فى الكام تعليق اياهم وانا عمال اسامح..موش فاهمك كويس فى اخر سطرين دول.. انا حالتى معاكى لا هزيمه ولا انتصار( حاره سد ) واللى عايز اقوله قولته من اول كلمتين ووصل بس انتى شجعتى الطريقه الصعبه وسبتى السهله ! فعلا فى السليم = معكوسه افقى مكونه من سته احرف ( لفظة وداع انجليزية / حرف جر / ال ) ترتيب وسط اخيره اولى 🙂

    الحل المرجح ==> تعملى ريموف لردودى على مقالك لانها مغيرتش حاجه ولا خلتك شفتى ايجابيات فيها واعتبرتيها ترهات وهرطقه (ميرسى) وعشان متضيعيش وقت قرائك فى المدونه لو انتى فعلا بتراعى النقطه دى ! وده هتعمليه لو انتى صادقه فكلامك ومؤمنه انى على خطأ قلبا وقالبا..اعتقد حل منطقى وعين العقل وما خالف ذلك من حلول سواء بالرد على كلامى او بالاحتفاظ بيه على الصفحه هعتبره نوع من انواع الدعايه المجانيه:)
    ووعد منى لو اقتنعتى بالحل موش هتشوفى الاى بى بتاعى على المدونه بتاعتك تانى والسلام ختام .

    رد

    • معقولة يا باشا أنا يهون عليا أحذف الدرر دى؟
      إزاى بس أعمل جريمة زى دى فى حق القراء بعد ما إعترفت لك إنت دحة و أنا كخة؟!!!!
      أنا خدت على نفسى عهد إنى مش حشيل أى تعليق ما دام لم يتضمن ألفاظ تخدش الحياء لإن مدونتى منبر لحرية الرأى و إنت عبرت عن رأيك بحرية و أنا رديت عليك بنفس الحرية. خليه موجود للذكرى الخالدة و القراء الفاضيين حيلاقوا مادة لذيذة من الفكاهة الفارغة المضمون. ربنا يكون فى عونهم 🙂
      و طبعا كلامك كله حكم و يخرب بيت إللى يزعللك و شخبطة ولاد سيداتك تخطيط لمستقبل مصر يا فندم و إحنا عينينا طفايات سجاير سعتك يا فندم
      و”إن المنافقين فى الدرك الأسفل من النار” فمش حقدر أمسح لسعتك جوخ أكتر من كده…نورت المدونة 🙂

      “سبحانك اللهم و بحمدك أشهد ألا إله إلا أنت أستغفرك و اتوب إليك” – تمت

      رد

  10. بعد تفكير عميق قررت ان هناك امر هام جدا يستحق النقاش بيننا وربما يكون فيه الافاده للقراء داخل مصر وخارج مصر وفى جميع الدول العربيه مسلمين ومسيحين ولكنه متوقف على طريقة الصياغه والعرض وعسى ان يكون مفيد وذلك لأنه يحمل الكثير من الدروس المستفادة والعديد من النقاط التى فيها جذب لا ارادى للقارىء وعن شرط نقاط غير مبتدعه نقاط واقعيه وبالأدله الحيه والملموسه إذا اضطر الأمر ( منى الموضوع وعليك بالصياغه والعرض) اذا اردت التواصل لا اجد وسيله اخرى غير البريد الاليكترونى لأنى لن ارسله لك من خلال صفحة التعليقات.. يمكنك مراسلتى على البريد الذى احدثك به على المدونه فأسمحى لى بالأضافه على بريدك الاليكترونى.لنقل الموضوع كاملا ومناقشة الاستفسارات مباشرة.

    رد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s