بحب اللون الرمادى (1) – شروط الحجاب الصحيح من وجهة نظرى و إشمعنى دلوقت بناقش الموضوع ده؟!!!

إزيكو يا بناتيت 🙂

  ~*~ إضغطى هنا لقراءة تقسير الشيخ الشعراوى رحمة الله عليه لآية الحجاب (آية  31 من سورة النور) ~*~

قبل ما أدخل فى موضوع المقالة الأساسى أحب أأقولكم الأسباب إللى دفعتن لكتابتها فى هذا التوقيت. الحقيقة فى  الأيام الماضية رأيت و سمعت أشياء كثيرة جعلتنى أقرر أن أكتب هذه المقالة اليوم:

* سمعت عن  الحادثة البشعة التى قام فيها عم شاب بإغتصاب إبنة أخيه البالغة من العمر 12 سنة و لما صرخت لتستنجد بالجيران خنقها ثم جعل الأمر يبدو و كأنها إنتحرت بشنق نفسها لكن البوليس إكتشف الحقيقة!! بغض النظر عن شناعة الحادثة أول سؤال ممكن يجيى فى ذهنكم إيه علاقة الحادثة دى بموضوع الحجاب؟

الحقيقة إنى لما تأملت فى هذه الحادثة وجدت أن العم أقدم على إنتهاك عرض طفلة بريئة لإن هى دى إللى قدر عليها للأسف!! بمعنى إنى حسيت إن البنات المتساهلين فى لبسهم فى الشوارع و الفضائيات ساهموا فى قتل هذه  الطفلة البريئة دى و غيرها كثيرين بشكل غير مباشر لإنهم بيحركوا  مشاعر الشباب و الكبت يولد الإنفجار. و خطر فى بالى ساعتها إنى أ كتب مقالة أناقش فيها شروط الحجاب الصحيح و أحذر البنات من عواقب التساهل فى هذ الأمر

*  يوم الأربعاء الماضى شاهدت جزء من برنامج  2X2 و كانت الضيفة هى د.نوال السعدواى و كانت تعارض الحجاب (على فكرة رغم ختلافى مع د.نوال فى كثير من الأمور فأنا بحترم صراحتها و ثباتها على أفكارها التى سجنت بسببها فى وقت من الأوقات. أكيد هى أحسن بمراحل من ركاب الموجة إللى بيتلونوا زى الحرباية  على طريقة عاش الملك مات الملك!). المهم إن معارضتها للحجاب زودت رغبتى فى كتابة المقالة.

* يوم الخميس الداعية مصطفى حسنى كان ضيف برنامج واحد من الناس و تناول موضوع الحجاب

* أما إللى حصل النهارده (أو قولوا إمبارح لإن الساعة عدت 12) فكان الفتيل إللى أشعل حماسى لسرعة كتابة المقالة كنت فى المسجد و بعدين الأخت إللى بتدى الدرس طلبت من كل واحدة فينا إنها تفتح المصحف بشكل عشوائى و تقرأ صفحة من القرآن بخشوع و تدبر و سبحان الله الصفحة إللى فتحتها كانت سورة النور و كان فيها آية الحجاب! فساعتها قلت لازم أكتب المقالة لكن أول حاجة عملتها إنى قرأت تفسير الشيخ الشعراوى إللى موجود فى الرابطة إللى فوق علشان أكون على بينة من أمرى و أتأكد إن المعلومات إللى حقولها لكم صحيحة إن شاء الله. تمام كده؟ ياللا ندخل فى الموضوع…

ما هى شروط الحجاب الصحيح؟

الحجاب الصحيح هو إللى يكون واسع و مغطى كل شئ فيكى ما عدا الوجه و الكفين. حقققى الشرطين دول بأى طريقة حيكون حجابك صحيح إن شاء الله. يعنى مثلا أنا برتاح فى الطرح الطويلة لكن بشوف داعيات بيلبسوا طرح قصيرة لكن بيكون لبسهم واسع بالقدر الكافى و بالتالى أنا مش حفرض عليكى تطولى الطرحة لكن لازم فى النهاية تكونى مصفحة 🙂  بمعنى إن إللى يبص عليكى ميقدرش يعرف معالم جسمك إيه. ده المطلوب مش أكتر.

و بالتالى أى ألوان تلبسيها مفيهاش مشكلة إن شا الله تلبسى ألوان الطيف و إن شا الله تلبسى أحمر فى أحمر ما دام واسع. طيب ليه أنا عندى قناعة راسخة إن الألوان مش مشكلة؟

السبب إن جه عليا وقت كنت مستهبلة! فى حجابى!!! بمعنى إن اللبس مكانش واسع بالقدر الكافى. و قتها  كنت بسمع أقذر الألفاظ إللى ممكن تتخيلوها فى الشارع. من ساعة ما بقيت ألبس واسع بطلت أسمع الكلام ده تماما رغم مهرجان الألوان إللى أنا عملاه فى الصورة إللى فوق و حتلاقوه برضه فى مصنف لفات الطرح الطويلة. بالعكس الناس بقت تحرتمنى جدا و فى أحيان كتير الشباب بيقفوا علشان يخلونى أأقعد فى المينى باص.

لكن برضه أحب أكرر إن  ده رأيى و مش بفرضه على حد. إللى مش بتحب المشجر تلبس سادة كل واحد حر ما دام مفيش مخالفة شرعية. و هدفى الساسى من الكلام ده إن ى بنت حاسة إن الحجاب يتعارض مع الشياكة تغير رايها.

إيه الحاجات التانية إللى أنا بحس إن اى محجبة مينفعش تعملها؟

* مفيش مشكلة إنك تحطى مكياج خفيف و خصوصا كحل لكن أنا ضد  وضع الروج لبنت محجبة أيا كان لونه. أقصى حاجة ممكن تعمليها إنك تحطى زبدة كاكاو لما تكون شفايفك مقشفة. غير كده أنا بعتبره غلط تماما لأسباب واضحة مش حنخوض فيها. و طبعا نظام “فورشة و فورشة هنا “و فيضان ال eye shadow مش صح برضه بالنسبة  لبنت محجبة

* إلبسى خواتم و غوايش زى ماتحبى لكن أنا ضد الأحزمة تماما حتى لو لابسة واسع

* أنا شخصيا مش بحب البنطالونات الواسعة (الجيب شورت) لإنك لما بتقعدى أو بيكون فى هوا رجليكى بتتحدد و ده مش صح طبعا  و كمان على فكرة البنطالونات الواسعة بتتخن جدا. أحسن لك جيب سك.

* منظر شحمة الودن و الحلق خارج منها مع الطرحة بيكون غريب جدا و الحديث قال الوجه و الكفين فحكاية إنك تبينى حتة من ودنك  مش صح و كمان غريبة و ملهاش لازمة من وجهة نظرى.

و فى الختام أحب أأكد إنى مش بفرض رأيى على حد و بحاول على قد ما أقدر إن حجابى يكون فيه جمال و شياكة لكن دون مخالفات شرعية.

أتمنى إن أى بنت قريت المقالة دى و كانت  متس محجبة أو متساهلة فى حجابها إنها تعيد النظر لإن ده أمر مش هين و حسابه كبير عند ربنا خصوصا فى ظل ظروف مجتمعنا الراهنة و الضغوط إللى بيعانى منها الشباب. ربنا يوفقنا جميعا لكل ما يحبه و يرضاه ومستنية تعليقاتكم و أسألكم الدعاء 🙂

Advertisements

2 تعليقان

  1. ما شاء الله عليكى يا م. هبه . بتروحى دروس ف المسجد ولاءات ف ساقيه الصاوى ..وموضاعاتك بتشمل كافه نواحى الحياه ,.. والله انتى بصراحه مثال للمسلمه المتدينه المحجبه المتحضره . ربنا يوفقك وللافضل دوما .
    ممكن تقولى طيب انته ايه اللى مدخلك يعبدالله ف مقال زى ده مش هيفيدك ..لكن اقولك انى موضوعاتك كله بتشدنى وطريقه سردها جميله جدا ..فده اللى خلانى اقرا المقاله .
    وما شاء الله على دماغك الكبيره ف الربط بين حادث اغتصاب البنت وبين الحجاب … والله دماغ كبيره .
    ماشاء الله طبعا ..
    وياريت كل بناتنا يلبسوا الحجاب الصح ويهيديهم ربنا ليه ..
    اللهم ارزق بنات المسلمين العفاف .

    رد

    • ربنا يكرمك يا عبد الله 🙂 بس حابة أوضح لك إن دخولك المقالة دى ممكن يكون مفيد جدا و مش مجرد للإستمتاع بالقراءة لإنك ممكن تعرض الأفكار المطروحة هنا على معارفك البنات و أنا الحقيقة حرصت إنى أوصل مسألة إن الحجاب لايتعارض مع الشياكة و ده السبب الرئيسى لعزوف بعض البنات عن الحجاب لكن فى نفس الوقت حرصت أنه لا يخل بالأصول الشرعية و ده أهم إعتبار طبعا.
      أما بالنسبة للربط بين واقعة الإغتصاب و الحجاب فهو ليس ذكاء منى بقدر أنه كان التفسير الوحيد الذى إستطعت أن ابرر به شناعة الجرم الذى إرتكبه العم فى حق إبنة أخيه الطفلة!! أكيد هى لم تساهم فيما إرتكب فى حقها من جرم شنيع و إن شاء الله تكون الآن منعمة فى الجنة و ربنا يصبر أهلها.
      و مينفعش نترك أحداث مزلزلة كهذه تمر مرور الكرام دون التأمل فى معانيها و مغزاها و لعلها تكون صرخة مدوية تفيق الكثير من بناتنا اللاتى لا يقدرن عواقب الإستهتار فى الحجاب و خصوصا فى هذه الظروف الإجتماعية العصيبة. و ربنا يهدينا أجمعين لما يحبه يرضاه. اللهم آمين

      رد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s