ما أروع الجرأة على الحق! حاجات مبخافش منها و حاجات مضحكة بترعبنى:)

فى حاجات كتير بحمد ربنا إنى مبخافش منها لإن الخوف فيها بيكون غلط و بالعكس فى حاجات مضحكة جدا بخاف منها و حاجات كنت بخاف أعملها زمان و ربنا وفقى إنى أتغلب على خوفى. تعالوا نمسكهم واحدة واحدة:

أولا حاجات مبخافش منها:

1- مبخافش أأقول لسواق التاكسى المدخن بأدب إنه يطفى السيجارة لإنى مش مستعدة أضر نفسى و فى نفس الوقت بدعليه فى سرى إن ربنا يتوب عليه من السجاير و يهدينا أجمعين للخير (ساعات لما بندعى لغيرنا ممكن باخد سيئات بدل ما تاخد حسنات لو كنا بندعيلهم بإستعلاء و إحنا  حاسين إننا أحسن منهم و دى غلطة كبيرة! فعلا أنا ربنا معافينى من آفة التدخين لكن ممكن الراجل ده يكون عند ربنا أحسن منى بمراحل علشان كده بختم الدعاء بإنى أأقول “ربنا يهدينا أجمعين للخير” علشان أشيل من جوايا الإحساس الخاطئ إنى أحسن منه).

خلاصة الحكمة: مفيش حد أحسن و لا أاقل من حد و إللى يفترض غير كده بيكون مريض نفسيا بدرجات متفاوتة. إللى حاسس إن الناس أحسن منه بيكون عنده مركب نقص و إللى حاسس إنه أحسن من غيره بيكون عنده جنون عظمة. إنما الإنسان السوى عارف تماما إن كلنا بشر متساويين فى بشريتنا لكن مختلفين فى توجهاتنا مصداقا لقوله تعالى :“إن سعيكم و لشتى و “و لا يزالون مختلفين

2- مبخافش من الميه و دى حاجة والدتى لها الفضل فيها لإنها رمتنى فى البحر ة أنا عندى 6 شهور! فطلعت بعشق الميه و بحب الرياضات المائية جدا و من كتر عدم خوفى من الميه حصلت على بطولة فى رياضة الغطس و أنا عندى 13 سنة  و كنت بنط من إرتفاع 5 متر بكل سلاسة (متفرحوش قوى لما تشوفوا الحاجات إللى بترعبنى حتقولوا دى لاسعة رسمى ههههههههههه)

3- مبخافش لما أغلط فى حق حد إنى أعتذر له و كمان مبخافش إن لو حد غلط فى حقى إنى أأقوله فى وشه. طول عمرى صريحة لكن ساعات كانت صراحتى بتقلب لواقحة لكن لما  شخصيتى نضجت بقيت أأقول كل إللى فى نفسى بهدؤ و بإسلوب غير مستفز. و ساعات بحس فى بعض المواقف إن الأفضل إنى امثل إنى مش فاهمة من باب “إن الذكى فى قومه المتغابى 🙂” لكن فى الحالة دى بحتفظ برأى لنفسى. و الحمد لله أنا حتى قبل ما أعرف إن الغيبة (الكلام على الآخرين بما يكرهوا فى غيبتهم) من الكبائر طول عمرى مبحبش أضرب إنسان ورا ظهره و بعد كده أبتسم فى وشه إبتسامة صفراء لإنى كنت و ما زلت بعتبر السلوك ده خسيس و منحظ!

4- مبخافش أجرب حاجات جديدة بالعكس أنا بستمتع بتجربة الحاجات إللى معرفهاش و ساعات ده طبعا بيكون سلاح ذو حدين :). يعنى مثلا لما كنت فى لندن رحت مطعم و لقيت أكلة معرفهاش فلما سألت الجرسون عن مكوناتها قاللى إنها نوع من أنواع السمك فقلت أجربه فطلع طعمه شنييييييييييييييييييييع و إتدبست فيه ههههههههههههههههه 🙂

و لما كنت فى كندا واحدة صاحبتى كانت شخصية مغامرة جدا و كان لها مبدأ إنها تجرب الحاجة مرة واحدة الأول لو عجبتها تستمر و لو معجبتهاش يبقى يا دار مدخلك شر و شرف التجربة يكفيك 🙂 ههههههههههههههههههه. أنا كان عاجبنى المبدأ ده بس عندى سقف إنى مش بجرب أى حاجة ربنا محرمها هى بقى مكانش عندها أى سقف فلكم أن تتخيلوا الحاجات إللى كانت بتجربها! الحمد لله ألف مرة على نعمة الإسلام لإنى حاسة لو لا قدر الله إنى لو كنت غير مسلمة بنفس روح شخصيتى المغامرة كنت اكيد ححب أجرب طعم البانجو 🙂 هههههههههههههه بس الحمد لله كل أصحابى بيشهدوا إن دماغى متكلفة من غير أى معونات خارجية 🙂

5-  مبخافش إنى  لما أغلط فى حق نفسى إنى أصلح غلطى. و ميزتى الأساسية إنى صريحة مع نفسى و ده بيكون مؤلم جدا ساعات لكن بيكون بداية للإصلاح فى نفس الوقت.

6- مبخافش من أى نوع من أنواع الحشرات و مش بعوز أموت غير الدبان و الناموس علشان مضرين لكن لما بشوف عنكبوت و لا نملة أو حتى صرصار بيتمختر فى البيت بتأمل فى بديع صنع ربنا و مبحاولش أموتهم لمجرد إنى أأقدر! يعنى هى النلمة علمت لى إيه؟ ما أسيبها فى حالها 🙂  بس مامتى و بنتى بيخافوا من الحشرات فكل ما يعوزوا يموتوا حاجة يصدرونى أنا فآجى  و تطلب معايا تأمل و أقول سبحان الله ده الصرصار بيطير فماما تهب فى و شى و تقول: مش وقته إهبدى الصرصار بالشبشب ههههههههههههههههههههههههههههههههههههههه 🙂

7- مبخافش أوقف الناس إللى بتبلطج عن حدها بمعنى إننا لو وافقين فى طابورمثلا  و حد إستهبل! و حب ياخد دورى يبقى وقعته سودة! لإنى رافضة المبدأ نفسه. أنا مرة رحت البنك الظهر و كان زحمة على آخره لكن رجل الأمن إللى هناك عارفنى كويس فجه و قال لى بصوت واطى إنه حيشوف لى حد يخلص إجراءاتى بسرعة فأنا إبتسمت فى وشه و قلت له:  أنا مرضاش إنى أتعامل معاملة إستثنائية و آخد دور غيرى حتى لو كنت مستعجلة لإن الحق حق.

ثانيا حاجات مضحكة بترعبنى:

1- بترعب من السواقة و زمان أول ما كنت أمسك الدريكسيون و أحط رجلى على البنزين يجيلى إضطراب رهيب و أعرق و قلبى يدق و بعد ما عملت الرخصة و طلعت بالعربية أول طلعة رحت مخيشة! فى عربية الجيران و دى كانت أول و آخر مرة أسوق ههههههههههههههههه 🙂 (وبينى وبينكم أنا شايفة إن عدم السواقة بالذات فى مصر نعمة لإن إلى بيسوقوا دمهم بيتحرق فعلى إيه يعنى؟ 🙂 )

2- أنا كنت إنتحارية! فى تعدية الشوارع زى كل المصريين قبل ما أسافر كندا لكن علشان فى هناك إحترام للمشاه و أماكن مخصصة للتعدية من ساعة ما رجعت و أنا بترعب لما آجى أعدى شارع و بستنى لما ألاقى ناس إنتحاريين تانيين معديين و أمشى معاهم و بيكونوا هما حائط صد بينى و بين العربيات :). و مرة مكنتش عارفة أعدى الشارع خالص علشان طوفان العربيات مش عايز يقف فلما سألت الناس إللى على الرصيف التانى إنتوا عديتو إزاى قالوا لى: إحنا إتولدنا الناحية دى 🙂 ههههههههههههههههههههههههههههههههههههههههههههههههه

حاجات كنت بخاف أعملها زمان و ربنا وفقى إنى أتغلب على خوفى:

سبحان الله رغم إنى طول عمرى بغنى على المسرح إلا إنى كنت بخاف لدرجة الإرتعاش من الكلام قدام ناس كتير بس الموضوع ده كان غايظنى قوى و كنت بفضل أأقول لنفسى إن هما ناس زيى زيهم فليه أخاف منهم؟!!! و صممت أغير الموضوع ده فى نفسى  و أنا فى كندا و الحمد لله بتوفيق ربنا أولا و بالإصرار ثانيا أخدت جوايز فى ال Public Speaking و زادت جرأتى فعملت Standup Comedy قدام الجمهور  و الحمد لله الناس ضحكت ههههههههههههههههههههههه

ياريت إنتوا كمان تحكولى على نفسكم: إيه الحاجات إللى مبتخافوش منها? و بتخافوا من إيه? و قدرتم تتغلبوا على خوفكم من إيه؟ مستنية تعليقاتكم 🙂

Advertisements

6 تعليقات

  1. بصراحه يا هبه لو سمحتيلى يعنى اناديلك باسمك انتى ماخليتيلناش اى حاجه ما نخافش منها بعد كل اللى قلتيه ده وعلشان كده احب اهنيكى على شخصيتك القويه والجميله فى نفس الوقت …ما اروع الجراه فى الحق وما اروع المجازفه والتجربه وده لان التجربه والمجازفه فى العلم بالاشياء التى لم نجربها او نفعلها من قبل هى التى تزيد من علومنا ومعارفنا بالاشياء وتصقل خبراتنا بالتجارب المفيده لنا من بعد ولذلك كانوا وما زالوا يقولون بان التجربه هى ام الاختراع ولولا التجارب ما كانت الاختراعات ولكن يجب على الانسان المجازف والمغامر فى العلم بالاشياء ان يتصف بالصبر وبالذكاء حتى يستطيع ان يستخرج من التجارب السيئه التى من الوارد والمحتمل ان يمر بها ذلك الانسان الذى يملك هذه الشخصيه المعانى والدروس المستفاده حتى يستطيع تحويل التجارب السيئه التى مر بها لخبره تحول بينه وبين هذه الامور من بعد ويمكن له ايضا ان ينصح غيره حتى لا يقع فى هذه التجارب السيئه حتى يستطيع ان يكفر عن ذنوبه التى اقترفها عند وقوعه بمثل هذه التجارب السيئه … مش مهم ان احنا نغلط لان ده شىء وارد وطبيعى وفى بعض الاحيان يحدث الخطا رغما عنا ولكن المهم ان نتعلم من اخطائنا حتى نستفيد ونفيد غيرنا من الناس والمساله كلها تتعلق فى النهايه بقدرة الانسان وذكائه فى تحويل الاخطاء الناتجه عن التجارب السيئه الى اعمال جيده وحسنات يكتسبها من بعد.

    رد

    • ربنا يكرمك يا أمجد و ألف شكر على تعليقك الجميل 🙂
      سبحان الله كلامك أثار تأملاتى إن من أورع الغرائز الإنسانية إللى ربنا سبحانه و تعالى أودعها فينا هى الفضول و هى وسيلتنا لمعرفة الله و محبته و معرفة الدنيا من حولنا. فروح المغامرة و التجربة صفة أصيلة فى كل الناس لكن بدرجات متفاوتة. أحيانا بتوصل لدرجة التهور و على النقيض الخوف الزايد من الفشل ممكن يخللى الإنسان يتجمد فى مكانه و ميجربش أى حاجة جديدة.
      طبعا خير الأمور الوسط و لازم الإنسان يتعلم من أخطائه و ساعتها حيحول أى فشل لنجاح. ربنا يوفقنا للخير دايما 🙂

      رد

  2. Posted by zizo on يونيو 14, 2011 at 9:35 ص

    ههههههههههه موضوع رائع واحييكى على صراحتك دى بجد
    اولا بالنسبة لسواق التاكسى فانا مابركبش تكوسة 😀 ولو ركبت هعمل نفس الكلام بس فى فرق فى الميكروباصات مابفتحش بقى مش خوف طبعا انما عارف ان كلامى مالوش لزمة تلاقى السواق منفض ولا كأنه سامع حاجة بس انا بريح دماغى وبقعد جنب الشباك 😀
    اما بالنسبة للمية رغم انى بخاف منها جداااا الا انى بردو بنزلها وببقى حزر زيادة عن اللزوم
    لما بجرب حاجة جديدة بجربها بينى وبين نفسى بتحرج انى اعملها قدام الناس وعندى رهبة انى اتكلم قدام ناس كتيير خصوصا لما يكون فيهم بنات يعنى ممكن لو كلهم رجالة اتكلم شوية و المشكلة دى مش عارف اتغلب عليها للأسف
    وبالنسبة للحشرات مافيش خوف نهائى منهم وبردو مابحبش اموتهم بأثتثناء الصرصار وساعات الناموس بس ببقى عملت اللى عليا وحظرته وقولتله يحل عن دماغى 😀 اما الدبان فبخرجه لأنى مابعرفش اموته اصلا بيطلع عينى ههههههههه انما غير كدة بكره انى اموتهم ساعات بحس ان ده حرام وبعدين ممكن تكون النملة اللى مرضتش اموتها دى سبب ان ربنا يرحمنى
    والحيوانات بردو مابخفش منها بأستثناء الكلاب هههههههه والسبب ان ليا مغامرات خاصة معاهم بس اه صحيح انتى ماقلتيش بتخافى من الفئران ولا لأ
    وبالنسبة للضلمة مش بخاف منها اطلاااااقا بس ده مايمنعش انى كنت بخاف لما كنت صغير من قصص ابو رجل مسلوخة وامنا الغولة بتاعة زمان دى هههههههه اصلى خيالى واسع شوية وبتخيل مناظرهم اللى بتبقى قد ايه بشعة ههههههههههههه

    رد

    • ههههههههههههههههههههههه لذيذ قوى تعليقك يا زيزو إنت كده ساعدتنى إنى أعرفك أكتر 🙂
      بالنسبة للميكروباص انا بعتبره غير آدمى الحقيقة لإن السواقيين بيكونوا مستعجلين طحن! بس طبعا بركبه ساعات خصوصا لما بكون مأشفرة 🙂 بس برافو عليك إنك بتقعد جنب الشباك ده حل حلو. بس ممكن أطلب منك طلب؟ جرب تقول لسواق الميكروباص لو سمحت إطفى السيجارة علشان ريحة الدخان بتتعبنى. هو ده إللى أنا بقوله لسواقيين التاكسات. بجد جرب و متخافش يعنى إيه أقصى حاجة حتحصل؟ يا إما حيسمع كلامك يبقى خير و لو نفض لك أهه شرف التجربة يكفيك ههههههههههههههههه :). بجد جرب و متخافش و إحكى لى على إللى حيصل.
      بالنسبة للخوف من الكلام قدام البنات فده حاجة طبيعية وبتحصل مع بعض البنات برضه بس التغلب عليها سهل جدا. كل المطلوب إنك تتكلم قدام بنات كذا مرة فى أوقت متقاربة أول مرة حتبقى قلقان تانى مرة قلقك حيقل شوية و تالت مرة هما إللى حيقلقوا منك 🙂 هههههههههههههههه
      إحنا زى بعض فى موضوع الجشرات بس أنا بحب الكلاب لكن ببعد عنهم علشان لسانهم ممكن ينجس لبسى و معرفش أصلى بسببهم لكن مبكونش خايفة منهم. شفت بقى ميزة جعلص؟ 🙂 ههههههههههههههه
      أنا مشفتش فيران على الطبيعة فى حياتى تقريبا بس مأظنش إنى حخاف منهم لإن شكلهم غبى قوى لكن مثلا لو ربنا قدر و رحت الصحراء حكون مرعوبة من التعابيين و العقارب ههههههههههههههههههههههه
      أنا برضه مبخافش من الضلمة. واضح إن بيننا حاجات كتير مشتركة. إنت برجك إيه يا زيزو؟ أنا بفخر بإنتمائى لبرج الدلو. أجدع ناس 🙂

      رد

  3. Posted by zizo on يونيو 14, 2011 at 1:49 م

    ههههههههه ماشى هجرب اسأله واقولك ولو انى مابحبش احط نفسى فى مواقف محرجة بس هجرب
    وبالنسبة للأبراج تقريبا برج الثور مواليد 25/4 😀

    رد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s