Archive for 13 أغسطس, 2011

رمضان ثورة التغيير(4) – فيديو أغنية “إن شاء الله” للفنان ماهر زين عربى و English بصوتى

الفنان المتميز أحمد زين عمل أغنية “إن شاء الله” بلغات كتيرة و أنا دمجت الأغنيتن العربى و الإنجليزى و غنيتهم ورا بعض إن شاء الله تعجبكم 🙂

 إذا كان متصفحك لا يدعم مشاهدة الفيديو على هذه الصفحة إضغط هنا لتشهاده على اليوتوب

Advertisements

رمضان ثورة التغيير (3) – إرسم خريطة حياتك مع د. طارق سويدان

ربنا وفقنى و حصلت على هذه الأسئلة وقبل ما أبدأ أجاوبها حسيت إن من واجبى إنى أعرضها على قراء المدونة و يا ريت قبل ما تكملوا قراءة تدعوا لى بالخير لإنى محتاجة دعائكم بشدة 🙂

الأسئلة يا جماعة قمة الروعة  و  لو جاوبتوها ممكن حياتكم كلها تتغير. أنا إشتريت كراس مخصوص علشان اجاوب على الأشئلة دى و ناوية أسيب صفحات فاضية بين كل سؤال و التانى لإن الأسئلة دى محتاجة تأمل و إجابتها حتاخد وقت و إن شاء الله ناوية اجاوب عليها كل قبل إنتهاء رمضان و إن شاء الله حشرككم فى تأملاتى فى  الإجابات خصوصا بالنسبة للأسئلة إللى ممكن أكتر الناس تتفق على  إجاباتها.

لو نفسك رمضان يكون ثورة تغيير حقيقية بالنسبة لك, خد على نفسك عهد إنك تجاوب الأسئلة دى بعمق و صدق قبل إنتهاء رمضان. إتفقنا؟ مستنية تعليقاتكم 🙂

 

 

 

رمضان ثورة التغيير(2) – صور توجع القلب أخدتها من إسطبل عنتر مع جمعية رسالة: “متعة العطاء…غير و إتغير”

الحمد لله ربنا وفقنى و شاركت إمبارح (8/8) فى توزيع شنط رمضان التابعة  للقوافل الداخلية لجمعية رسالة فرع مدينة نصر و كان ااتوزيع  فى منطفة إسمها “إسطبل عنتر”. الحقيقة يا جماعة الناس هناك أوضاعهم مؤسفة و الصور إللى حتشوفوها أبلغ من أى كلام. أول ما وصلت المكان و شفت الحياة الغير آدمية إللى الناس عايشينها هناك أول خاطر جه فى بالى إنى حمدت ربنا ألف مرة إنى ظروفى أحسن من ظروفهم و بعد كده دعيت إن ربنا يغنيهم بحاجتين:

 

ألأولى و الأهم دعيت إن ربنا يغنيهم بالرضا عما قسم لهم مصداق للحديث القدسى: “إرض بما قسم الله تكن أغنى الناس

و الدعوة التانية إن ربنا يرزقهم من فضله و يحط فى طريقهم ناس فى قلوبهم رحمة وخير يساعدوهم علشان يعيشوا حياة كريمة.

و سبحان الله يا جماعة أنا معرفتش أوزع شنط رمضان لإن الشنطة كانت تقيلة قوى عليا و معرفتش أشيلها فجالى إحباط لإنى رايحة علشان أساهم أساسا! لكن  فضلت أدعى لهم كتير و كمان أخدت  الصور إللى حتشوفوها و عندى إحساس إنكم أكيد حتتأثروا لحالة أهل إسطبل عنتر و غيرها من المناطق الفقيرة فى مصر  و أكيد لما تشوفوا حالتهم حتتحمسوا إنكم تساعدوهم على قد ما تقدروا و لكم جزيل الثواب إن شاء  الله.

و الحقيقة فعل الخير بقى سهل جدا لأنك لو مش فاضى تساهم بوقتك ممكن تساهم بفلوس. و على فكرة جمعية رسالة و جمعية مصر الخير و جمعية الأورمان بيبعتوا مندوبين يستلموا الفلوس و التبرعات العينية من المنازل. و  بنك الطعام المصرى و مستشفى 57357 بيقلبوا التبرعات بالبطاقة الإئتمانية على مواقعهم. علشان كده بقولكم إن عمل الخير بقى سهل جدا. ده إنت حتى مش محتاج تخرج من البيت!

و طبعا المساهمة المالية مطلوبة لكن المساهمة بالمجهود لها تأثير أشد فى النفس علشان كده أنا بنشد أى حد يقرا المقالة دى إنه يساهم بأى شئ و لو حتى إنه يعمل شير للمقالة…الناس حالتهم صعبة قوى يا جماعة و لو فاض بيهم الله أعلم إيه إللى ممكن يحصل.

من ضمن أذكار و المساء دعاء يقول: “اللهم إنى أعوذ بك من الكفر و الفقر و أعوذ بك من عذاب القبر لا إله إلا أنتإقتران الكفر بالقفر سببه إن الفقر الشديد ممكن يصيب الإنسان بيأس يفقده إيمانه فإنت لما بتساعد الناس مش بس بتديهم أكل و فلوس إنت بتعمل حاجة أهم إنك بتحببهم فى ربنا و بتخليهم يحسوا إن الدنيا بخير. فياريت كلنا نساهم بإللى نقدر عليه و إن شاء الله نقدر نرسم البسمة على وجوههم. و أسيبكم تتفرجوا على الصور و مستنية تعليقاتكم 🙂

 

 

 

 

 

 

 

 

 

 

 

 

 

 

 

 

 

 

 

 

 

 

 

رمضان ثورة التغيير (1) – صور أبلغ من أى كلام! إنشرها و لك الأجر :)

زى ما إنتوا شايفين الصور كلها اروع من بعض لكن أنا منبهرة جدا بأول صورتين لأن أفكارهم جديدة و مؤثرة. إنشرها و لك الأجر 🙂