Archive for 21 سبتمبر, 2011

فيديو فضفضفة من القلب فى مواضيع دينية و سياسية و فنية و… 5 مقالات فى قلب بعض يا رب تعجبكم :)

إذا لم يدعم متصفحك مشاهدة الفيديو على هذه الصفحة إضغط هنا لتشاهده على اليوتوب

إزيكم يا قرائى الأعزاء 🙂

لأاول مرة عملت فيديو فضفضة  من القلب فى  مواضيع دينية و سياسية وفنية و شخصية. إن شاء الله تعجبكم و تستفيدوا منها و مستنية تعليقاتكم 🙂

ناقوس الخطر(1) – كاريكاتير و نكتة مضحكة مبكية عن مصرى “إستكرد” إسرائيلى…

إزيكم يا قرائى الأعزاء 🙂

الكاريكاتير إللى إنتوا شايفنيه فى الصورة من تأليفى و إستوحيته من النكتة إللى حقولهالكو دلوقت. و الحقيقة أنا بعتذر إن النكتة فيها شئ من الإبتذال لكن قيمة عرضها عليكم أهم جزئية الإبتذال من وجهة نظرى.

نكتة يا مصرى يا كبيييير!

كان فى مصرى و إسرائيلى و بنت شابة و إمرأة عجوزة قاعدين قدام بعض فى القطر و بعدين القطر عدى تحت نفق مظلم فمكانش حد شايف التانى و فجأة سمعوا صوت قبلة و حد بيتضرب بالقلم على وشه فلما القطر عدى النفق لقوا الإسرائيلى بيهرش فى خده.

الست العجوزة قالت فى سرها: أما إسرائيلى سافل بجد حاول يقبل البت فلطشته بالقلم

الإسرائيلى قال لنفسه: أما راجل مصرى محظوظ هو يقبل البت و أنا أتضرب بالقلم

المصرى قال لنفسه: يا سلام عليا بست إيدى و بعدين ضربت الإسرائيلى بالقلم على وشه يا مصرى يا كبيييير!

النكتة دى جت لبنتى على الموبايل و أول ما حكيتهالى كان رد فعلى إن ضحكت جامد لكن بعد كده إتضايقت لما تأملت فيها بعمق:

للأسف إحنا قيمنا الجميلة عمالين نفقدها و الغدر ده سمة خسيسة و منحطة من سمات اليهود على مدار تارخهم المخزى و عمرها ما كانت فينا! إزاى نقلدهم فى صفاتهم الذميمة و كمان نفخر بكده؟ أنا لسه كنت بتفرج على محلل سياسى كان بيحكى إن النظام الرأسمالى ساعات بيكرس قيم إستهلاكية على قيم أخلاقية فمثلا هو قال إن الفيفا أهم قيمة عندها قيمة الإثارة علشان كده ممكن مباريات تكون نتيجتها مش عادلة لإن قيمة الإثارة بقت أهم من قيمة الفوز العادل!

و من ناحية تانية ربنا سبحانه و تعالى ذم اليهود لما قالوا: “نحن أبناء الله و أحبائه” و رد على حججهم الباطلة بقوله تعالى :”قل فلم يعذبكم بذنوبكم بل أنتم بشر ممن خلق

اليهود بيعتبروا نفسهم طبقة راقية و ما عاداهم يعامل معاملة الحيوانات و علشان كده إستحلوا دماء و أعراض غير اليهود و بيسمونا الأممين! فى بروتوكلاتهم . للأسف الشديد بعض المسلمين المتشددين إبتدوا يحسوا إنهم معاهم الحق المطلق فبقوا هما كمان بيسفهوا أى حد غيرهم و هما فى فعلهم الشائن ده بيقتدوا باليهود! دى كانت ملحوظة هامة سمعتها من الدكتور أحمد عمارة و هى فى محلها للأسف. مع إن ربنا سبحانه و تعال نهانا عن هذا الفعل نهى صريح فى القرآن بقوله:”فلا تزكوا أنفسكم هو أعلم بمن اتقى

و لما حضرت درس لدكتورة سوزان الشافعى شرحت فقه الإسلام فى الحرب و إن الرسول نهى بشكل صريح عن الغدر. يبقى إحنا فين من سنته؟!!! 

ويا ريت محدش يقول لى  دى مجرد نكتة! لإن النكت لها أهمية كبيرة و بتعكس قيم الشعوب. أنا ححكى لكم حاحة أول مرة أأقولها على المدونة: أنا طبعا بشوف إحصائيات الصفحات إللى إتشافت على المدونة و تفاصيل تانية كمان. ففى مرة حد ترجم صفحات من مدونتى ب الEnglish عارفين ترجم أنهى صفحات؟ صفحة النكت و مصنف المبادرات التنموية فقط!

ده بيعكس إيه؟ ده دليل إن نكت أى شعب بتقول حاجات كتير قوى عنه و أنا علشان كده انا بدق ناقوس الخطر لإنى شايفة إن نكتة المصرى إللى بيفخر! بغدره بإسرائيلى تعكس إنحراف مخيف عن قيمنا الأصيلة. إنتوا شايفين إيه؟ مستنية تعليقاتكم 🙂

مغامرات أم عسولة (1) – وجبات طوييييييييييل جدا منخارها إخترعتها لبنتى بمناسبة السنة الدراسية الجديدة :)

إنا لله و إنا إليه راجعون! بدأ العام الدراسى الجديد 😦

فأنا قلت أهون على بنتى مصابها الأليم و أعمل لها و جبات مفرحة  طوييييييييييل جدا منخارها 🙂 ههههههههههه

لما جت من المدرسة أول يوم أتحفتها بالوجبة المبينة فى الصورة إللى تحت و هى الحقيقة عبارة عن سندوتشات شاورمة فراخ (و على فكرة العيش المدور ده توست أنا قطعته بكباية علشان يدى شكل الوش 🙂 و دى فكرة أخدتها من على النت أما باقى الأفكار الهلامية للوجبات فكلها من تصميم و إبداعات المغفور لها إللى هى أنا 🙂 قولوا إن شاء الله)

قدمت لبنتى الوجبة و أنا فى منتهى الحماس لكن هى فجرت لى قنبلة إنها مبقتش تحب شاورمة الفراخ! فرسيت إن أنا إللى شلت الليلة 🙂 لكن طبعا ميأستش! و عنها يا ريس….

جيت تانى يوم عملت الوجبتين التحفة إللى إنتو شايفينهم 🙂 ههههههههه

و لما قدمت لبنتى وجبة المكرونة طويلة المنخار قلت لها إن البنت الجميلة إللى فى الطبق هى بطلة إعلان ترو شيبسى و إن لما البطل إتخض من طول منخارها ضربها بالبوكس فى وشها علشان كده عينيها ورمت 🙂 (خلوا بالكوا أنا كان عندى هدف إستراتيجى إنها تاكل الخرشوف و قد كان 🙂 هههههههههههه ) و برضو وضحت لها إن النبت سنانها صفرا علشان مغسلتش سنانها بسيجنال تو النهارده ههههههههههههههههه.

و عملت لها جنبه طبق جنينة السلطة زى ما إنتوا شايفين و أحب أوضح إن البطاطس المحمرة هى الشمس لكن باقى محتويات الحديقة واضحة جدا زى الشمس مش كده 🙂 قلبى إتقطع لما قطفت الورد و كلته ههههههههههههههههههه

الحقيقة الهدف الأساسى  من المقالة بخلاف إنى أهزر زى العادة إنى أأقولكم إن رغم كراهيتى الشديدة لكل ما بتعلق بشغل البيت من طبخ و مواعين و غيره (و قصيدة حوضى القذر تشهد!) إلا إنى إستمتعت جدا لما قررت إن الطبخ يبقى فيه شوية إبداع.

و طبعا أنا مؤمنة جدا إن العين بتاكل قبل الفم علشان كده تزويق الطبق بيفتح الشهية و علشان كده هى الحمد لله إنبسطت و اكلت أحسن من العادة.

و بصفة عامة فى حاجات كتير الإنسان مش بيحب يعملها لكن ممكن يخليها ممتعة لو قصد. مثلا أنا مش بطيق أاقف فى الطوابير و كنت بزهق جدا لكن لإن مفيش فى إيدى حاجة أاقدر أعملها علشان أغير الوضع ده فقررت أتقبل الأمر و أستغل الوقت فى أى شىء ممتع. ممكن مثلا أذكر الله أو أسبح و ساعات بغنى فى سرى و ساعات بعلى صوتى و أغنى نشاز على أمل إن إللى واقفين قدامى يطفشوا 🙂 هههههههههههه

و الخلاصة إن  ما دام حتعمل الحاجة كده و لا كده يبقى العقل و الحكمة بيقولوا إنك تعملها و إنت راضى. مهما تكون الحاجة مملة و خنيقة نقدر نخليها ممتعة لو قصدنا.

و اسيبكم مع إعلان ترو شيبس إللى ألهمنى فكرة هذه الوجبات اللوزعية 🙂

محبتكيش و لا دقيقة

و حخطب واحدة مش بيئة 🙂  

فكوينى منكى أرجوكى

لو حتى تزقلطينى من فوق

طوييييييييييل جدا منخارك 

و إللى إتجنن و إختارك 

ينساك سريعا و بفلق (الحقيقة أنا مش فاكرة آخر كلمة فحطيت يفلق من دماغى 🙂 ههههههههههه)

ما شاء الله على رقة إحساس الشاعر! حاجة تدوب الحجر بصراحةهههههههههههه

ما رأيكم دام فضلكم؟ مستنية تعليقاتكم و إللى عنده أفكار أكلات سريعة و مبتكرة يا ريت يقوللى 🙂

حقيبة الذكريات (1) – إزاى أحداث 11 سبتمبر أثرت على سفرى لأمريكا و كندا سنة 2002

بمناسبة الذكرى العاشرة لأحداث 11 سبتمبر الدامية إسمحوا لى أفتح حقيبة الذكريات و أأقولكم إزاى الكارثة ى أثرت عليا بشكل شخصى.

الحقيقة أنا سافرت كندا  فى يوليو سنة 2002 و لسؤ حظى مريت على نيويورك ترانزيت! رغم إننا كنا حنكمل على كندا فى نفس الطيارة و كنا بس حنقعد ساعات بسيطة فى المطار لكن هما صمموا يفتشوا شنطنا و أنا كواحدة محجبة كانوا باصين لى بقرف شديد  نظرات كلها كراهية رعبتنى و طبعا كان فى سؤ معاملة و طريقة سيئة  فى تفتش شنطنا رغم إننا مش داخلين أمريكا أساسا.

طبعا أنا إلتمست لهم العذر لإن مكانش عديت سنة على أحداث سبتمبر و الجرح كان لسه مخفش (هو الحقيقة مخفش لغاية النهارده لكنه أأقل حدة بكتير عن سنة 2002!)

الموقف ده رعبنى لإنى خفت لما أوصل كندا أتعامل بنفس الطريقة المهينة لكن من كرم ربنا و فضله إن الكنديين كانت معاملتهم مختلفة خالص زى ما يكونوا من كوكب تانى 🙂

و الحقيقة أنا سافرت كندا لوحدى تماما و مكانش ليا قرايب فى تورونتو خالص! يعنى كانت مغامرة بكل المقاييس لكن كانت مغامرة محسوبة من ناحية إن تخصصى كان مطلوب جدا قبل الأحداث لدرجة إن إللى كانوا فى نفس تخصصى كانوا بيتعينوا خلال إسبوعين من وصلوهم لكندا. و كمان كانت مغامرة محسوبة من ناحية إنها بلد أمان جدا و معدل الجريمة فيها شبه منعدم.

لكن سبحان مغير الأحوال أنا كنت جاية بقول إنى حلاقى شغل تانى يوم لكن مبقاش فى أى شغل بسبب أحداث سبتمبر و حفيت علشان ألاقى شغل لغاية ما فلوسى خلصت و إضطريت أشتغل جرسونة فى كافيتريا!

لكن عسى ان تكرهوا شيئا وهو خير لكم. لما معرفتش ألاقى شغلى فى أى شركات خدت كورس مجانى بيعلمنى إزاى أفتح شركة من البيت و أعمل بيزنس و فعلا فتحت شركة من البيت بعمل فيها تصميم مواقع على النت و بدرس فيها كورسات كمبيوتر. فالحمد لله كانت تجربة مفيدة لإنى إتعلمت التسويق و بقى هو ده مجال عملى دلوقت. و طبعا الدرس إللى إتعلمته بقوة إن دوام الحال من المحال و إن مفيش مسلمات و إن مهما الإنسان خطط و فكر ممكن أى حاحة تحصل فى لحظة تهد كل إللى بناه فى سنين.

و طبعا كنت متابعة المجازر إللى عملها بوش الإبن فى العراق!!  و كمان كنت هناك لما أعيد إنتخابه و كنت بضرب أخماس فى أسداس إزاى زعيم بالغباوة دى يعاد إنتخابه!

مفيش شك إن الأعمال الإنتقامية الوحشية إللى قامت بيها أمريكا كلفتها مليارات و دفعت تمنها غالى فى  الأزمات الإقتصادية الطاحنة إللى مرت بيها! 

و السؤال إللى بيطرح نفسه: هل قتل اطفال العراق شفى غليل الأمريكان؟ و ده يجرنا لسؤال أهم:  هل كان بن لادن العدو الوحيد لأمريكا أم كانت هى عدوة نفسها؟!!!

بيتهيألى الإجابة واضحة…داين تدان!!! مستنية تعليقاتكم.

فيديو قصيدة “حوضى القذر :)” ب الEnglish مرفقة بصورة حقيقية للحوض هههههههههههههههههههه

إزيكو يا جماعة 🙂

لما لقيت الحالة جيم و العملية مأشفرة و ال 20 فيديو العربى إللى عملتهم على اليوتوب مأكلونيش عيش (لغاية دلوقت لازم نتفائل برضه 🙂 ) قلت يا بت إعملى لك فيديو إنجليزى جايز الأجانب يكون ناصحين و يستغلوا جنانك الرسمى 🙂

و عنها يا ريس عملت فيديو لشعر حلمنتيشى إنجليزى كنت ألفته السنة إللى فاتت بيتكلم عن حوضى القذر 🙂 يا بخته إللى حكون من نصيبه هههههههههه

أنا الحقيقة مترجمتش الكلمات لكن الخلاصة إنى بقول إن المواعين بتتراكم بسرعة مخيفة جوه الحوض و إن فى مخلوقات فضائية غريبة سكنته و إن مش طالبة معايا أغسل المواعين و أفضل إنى أهيس و أعيش حياتى 🙂

و بعد كده إتكلمت عن نفسى و عن مهاراتى العلمية المعملية الفذة فى مجال  الكتابة و التسويق الإلكترونى و نصحت الناس إن هما يشغلونى علشان ياخدوا من خبراتى و أنا آخد من جيوبهم 🙂 هههههههههههههه

مين عارف يمكن الفيديو ده يكون سبب فى لقمة طرية تجيلى أو سبوبة 🙂 قولو إن شاء الله و حتلاقوا صورة الحوض منورة فى الآخر 🙂

و إذا كنت مش عارف تشوف الفيديو من هنا إضغط هنا على تشوفوه على اليوتوب

Humorous poetry written and recited by : 
Heba Hosny - http://www.HebaHosny.net
My Stinky Sink
==============
I can nearly sink
in my Stinky sink
With a 4th pyramid of dishes
Typical Egyptian what you think?!
It's happening so fast...
it's making me sick
SCARY dishes piling up in a blink!
Give me a hand here pal...
do something QUICK!
Alien creatures are growing at my sink
Should I clean them up? Is that what you think?
I'd rather write this poem and sip my drink
Screw the dishes I'm much busier than you think!
Wanna take a cold shower and dress in pink
Yes, I'm sparkling clean but my sink STINKS!

Holly Waaw
==========
Sober up bro
Here comes the pro
Yo yo yo I run the show
What's up y'all?
I have it all
Holly waaw! chick so fine
Yeah baby she's divine
Big time hustler did you know?
Telling the world hustle and flow
Canadian Egyptian East hugs the west
Hire me and forget the rest
No bias dude! I'm keepin it real
For killer branding, I am the winning deal :)

OMG! Who is that bombshell?
Look at me stealin Salma Hayek's title!
Here I am in a nutshell...

Award winning marketing pro
Killer copywriter who digs SEO
Authentic branding is what I know
Hire me and cashin the dough $$$

فى إنتظار تعليقاتكم 🙂 و محدش يقوللى أغسل المواعين لو كان حابب يحتفظ يصداقتى 🙂 هههههههههههه

رمضان ثورة التغيير (5) – نصائح عملية للثبات على الطاعة بعد رمضان يقدمها دكتور عمرو خالد

كل سنة و إنتم طيبين 🙂

دى أول مقالة بكتبها بعد رمضان و كنت ناوية أكتبها ليلة العيد لكن منعنى المرض و الشغل المتلتل إللى كان لازم أخلصه 🙂 فأنا بعتذر عن التأخر فى كتابة المقالة لكن قد يكون ده للخير علشان لو كان حد فينا مش راضى عن أداؤه بعد رمضان إن شاء الله يستفيد بالنصايح دى.

الصورة إللى فوق هى غلاف الكتيب إللى إشترتيه  و هو من تأليف دكتور عمرو و أنا شايفة إنه قيم جدا. أنا ن شاء االله حلخص أهم ما جاء فيه لكن أنصح بشراء الكتيب الأصلى إن أمكن لتمام الفائدة.

مقدمة أساسية عن أهمية فهم طبيعة العلاقة بين الإنسان و الشيطان حتى لا يتسرب الياس لنفوسنا:

* تكون الشياطين مسلسلة فى رمضان علشان كده أول ما بيحى العيد الشيطان بيهاجمنا بضرواة علشان ييأسنا و يحسسنا إن كل إللى عملناه فى رمضان زى قلته و إن مفيش فايدة فينا! مصداقا لقوله تعالى:”و لقد صدق علهم إبليس ظنه” .

طبعا كل ده كلام فارغ و أى طاعة عملها فى رمضان حتاخد أجرها كامل بإذن الله حتى لو ضعفت شوية بعد رمضان. إحنا بشر و البشر بيغلطوا و إبليس أكد إنه مش حيسيبنا :”لأقعدن لهم صراطك المستقيم” يبقى إبليس هدفه الأساسى إنه ييأسنا من رحمة ربنا و طبعا سهل قوى الإنسان  يحس بكده لو كان ماشى مستقيم فترة طويلة و فجاة راح عامل حاجة بعيدة قوى. لكن الحل بسيط: إعرف إن إبليس هدفه ييأسك و متنولوش غرضه و خايك دايما فاكر قوله تعالى:”قل يا عبادى الذىن أسرفوا على أنفسهم لا تقنطوا من رحمة الله” (لا تقنطوا معناها لا تيأسوا).

يبقى لما ربنا يوقلنا منيأسش و إبليس يقولنا إيأسوا نسمع كلام مين؟ اللحظة إللى تكون متضايق فيها قوى من نفسك هى نفس اللحظة إللى لازم تحسن فيها الظن بالله و تسارع بالإستغفار و العودة للطريق المستقيم مصداقا لقوله تعالى: “و يدرؤن بالحسنة السيئة

و أنا ليا مع الشيطان قصص و حكايات ساعات بيعرف يضحك عليا زى ما حصل فى قصة سندريللا الخيبة! و ساعات تانية بكون مصحصحة له.

مثلا لما أخدت على نفسى عهد إنى كل ما أتوضا أصلى ركعتين زى سيدنا بلال رضى الله عنه, جاللى عم إبلبيس و قاللى بس إنت كده حتضيعى وقت و ووراكى شغل و إلتزامات فأنا غظته و بقيت اصلى الركعتين بنية إن ربنا يبارك لى فى الوقت 🙂 غيظة غيظة يا إبليس إلعب غيرها! ساعات بكون حويطة و مش سهلة برضه لإنى مقتنعة تماما إن ذكر الله عمره ما بيكون مضيعة للوقت بالعكس أى حاجة تانية بنعملها فى يومنا هى إللى ممكن تقلقنا لكن لما أصلى ركعتين خفيفتين مبياخدوش 5 دقايق  ممكن هما دول إللى يعملوا بركة فى يومى كله و أقدر أعمل حاجات  أكتر بكتيرمن إللى كنت ناوية أعمله. فأنا من هذا المنبر بأعلن إنتصارى على إبليس فى هذا الأمر. تصفيق حاد 🙂 هههههههههههه

بعد مافهمنا إزاى ننتصر فى حربنا مع الشيطان فى 5 أشياء عملية و سهلة جدا يؤكد دكتور عمرو خالد إننا لو إلتزمنا بيهم حنقدر نثبت على الطاعة بعد رمضان بتوفيق الله:

1- صلى فى المسجد (للرجال) و صلى فى أول الوقت مهما تكن الظروف و النساء يحاولوا يصلوا جماعة إن أمكن

2- إذكر الله كل يوم ولو 5 دقائق:

أنصح بشدة بأذكار الصباح و المساء لأن بها أدعية متنوعة و معظمها ماثور عن الرسول عليه السلام. الأذكار لها 3 فوائد رائعة من وجهة نظرى:

     *  أن تكتب من “الذاكرين الله كثيرا و الذاكرات”

     * أن تحيى سنة الرسول عليه السلام بذكر أدعيته المأثورة

     * وقاية للإنسان من الحسد و السحر و غيرها من الشرور

3- إدعو الله كل يوم و لو دقيقتين (أذكار الصباح و المساء تشمل أذكار و أدعية فلو واظبنا عليها حناخد فضل الأمرين و بالنسبة للدعاء مش لازم تقعد تدعى بأدعية مأثورة أو مكلكعة من الناحية اللغوية! ممكن تتكلم مع ربنا بالبلدى خالص من غير تكليف 🙂 المهم تكون مخلص فى دعائك و عندك يقين إن ربنا حيستجيب لك و أنصح بقراءة مقالتى عن صالون الدكتور أحمد عمارة لمزيد من المعلومات)

4- إبدأ ختمة جديدة للقرآن وواظب على قراءة و لو صفحة واحدة من المصحف كل يوم ( و زى ما قلتلكم فى مقالة دورى رمضان قراءة صفحة واحدة بتدبر و فهم لمعانى الكلمات أفضل بكتير من قراءة جزء متفهمش منه حاجة! طبعا أحسن حاجة إنك تقرا جزء كامل بتدبر. طيب أعمل إيه معنديش وقت؟ إقرا إللى تقدر عليه  لكن بتدبر و ياريت  تجربوا “وصفة سيدنا بلال السحرية” للبركة فى الوقت. فاكرينها؟  يييييييييييه إيه الزهايمر ده؟! إطلعوا شوفوها فوق حتلاقوها منورة باللون الموف 🙂 سبحان الله مفيش فايدة! انا لازم أهزر بأى طريقة ههههههههههه

5- الصحبة الصالحة: الصاحب ساحب زى ما بيقولوا فإحرص إن يكون لك أصدقاء صالحين يعينوك على الطاعة لإن وجودهم حيفرق كتير جدا و حيسهل عليك المهمة و ده شئ أنا عارفاه عن تجربة.

و ختاما ينصح دكتور عمرو خالد أن تحرص على خدمة الإسلام و ألا تكون عبادتك لله عبادة موسمية تنتهى بإنتهاء رمضان 😦 لإن ده حال كتير من الناس للأسف الشديد فلا تكن واحد منهم لكن إحرص أن تحول الإسلام من شئ طارئ إلى شئ دائم فى حيات وده سهل جدا. مثلا إذهب لحضور درس معين فى المسجد بصفة دورية. إعمل أنشطة خيرية و تطوعية كل إسبوعين و هكذا. المهم تواظب على إن الدين يكون له مكان دائم فى حياتك و النيتجة الرائعة إن ربنا سبحانه و تعالى سيكون له مكان دائم فى قلبك و ستنال سعادة الدارين بإذن الله.

اللهم آمين. أسألكم الدعاء و فى إنتظار تعليقاتكم 🙂