مغامرات أم عسولة (1) – وجبات طوييييييييييل جدا منخارها إخترعتها لبنتى بمناسبة السنة الدراسية الجديدة :)

إنا لله و إنا إليه راجعون! بدأ العام الدراسى الجديد 😦

فأنا قلت أهون على بنتى مصابها الأليم و أعمل لها و جبات مفرحة  طوييييييييييل جدا منخارها 🙂 ههههههههههه

لما جت من المدرسة أول يوم أتحفتها بالوجبة المبينة فى الصورة إللى تحت و هى الحقيقة عبارة عن سندوتشات شاورمة فراخ (و على فكرة العيش المدور ده توست أنا قطعته بكباية علشان يدى شكل الوش 🙂 و دى فكرة أخدتها من على النت أما باقى الأفكار الهلامية للوجبات فكلها من تصميم و إبداعات المغفور لها إللى هى أنا 🙂 قولوا إن شاء الله)

قدمت لبنتى الوجبة و أنا فى منتهى الحماس لكن هى فجرت لى قنبلة إنها مبقتش تحب شاورمة الفراخ! فرسيت إن أنا إللى شلت الليلة 🙂 لكن طبعا ميأستش! و عنها يا ريس….

جيت تانى يوم عملت الوجبتين التحفة إللى إنتو شايفينهم 🙂 ههههههههه

و لما قدمت لبنتى وجبة المكرونة طويلة المنخار قلت لها إن البنت الجميلة إللى فى الطبق هى بطلة إعلان ترو شيبسى و إن لما البطل إتخض من طول منخارها ضربها بالبوكس فى وشها علشان كده عينيها ورمت 🙂 (خلوا بالكوا أنا كان عندى هدف إستراتيجى إنها تاكل الخرشوف و قد كان 🙂 هههههههههههه ) و برضو وضحت لها إن النبت سنانها صفرا علشان مغسلتش سنانها بسيجنال تو النهارده ههههههههههههههههه.

و عملت لها جنبه طبق جنينة السلطة زى ما إنتوا شايفين و أحب أوضح إن البطاطس المحمرة هى الشمس لكن باقى محتويات الحديقة واضحة جدا زى الشمس مش كده 🙂 قلبى إتقطع لما قطفت الورد و كلته ههههههههههههههههههه

الحقيقة الهدف الأساسى  من المقالة بخلاف إنى أهزر زى العادة إنى أأقولكم إن رغم كراهيتى الشديدة لكل ما بتعلق بشغل البيت من طبخ و مواعين و غيره (و قصيدة حوضى القذر تشهد!) إلا إنى إستمتعت جدا لما قررت إن الطبخ يبقى فيه شوية إبداع.

و طبعا أنا مؤمنة جدا إن العين بتاكل قبل الفم علشان كده تزويق الطبق بيفتح الشهية و علشان كده هى الحمد لله إنبسطت و اكلت أحسن من العادة.

و بصفة عامة فى حاجات كتير الإنسان مش بيحب يعملها لكن ممكن يخليها ممتعة لو قصد. مثلا أنا مش بطيق أاقف فى الطوابير و كنت بزهق جدا لكن لإن مفيش فى إيدى حاجة أاقدر أعملها علشان أغير الوضع ده فقررت أتقبل الأمر و أستغل الوقت فى أى شىء ممتع. ممكن مثلا أذكر الله أو أسبح و ساعات بغنى فى سرى و ساعات بعلى صوتى و أغنى نشاز على أمل إن إللى واقفين قدامى يطفشوا 🙂 هههههههههههه

و الخلاصة إن  ما دام حتعمل الحاجة كده و لا كده يبقى العقل و الحكمة بيقولوا إنك تعملها و إنت راضى. مهما تكون الحاجة مملة و خنيقة نقدر نخليها ممتعة لو قصدنا.

و اسيبكم مع إعلان ترو شيبس إللى ألهمنى فكرة هذه الوجبات اللوزعية 🙂

محبتكيش و لا دقيقة

و حخطب واحدة مش بيئة 🙂  

فكوينى منكى أرجوكى

لو حتى تزقلطينى من فوق

طوييييييييييل جدا منخارك 

و إللى إتجنن و إختارك 

ينساك سريعا و بفلق (الحقيقة أنا مش فاكرة آخر كلمة فحطيت يفلق من دماغى 🙂 ههههههههههه)

ما شاء الله على رقة إحساس الشاعر! حاجة تدوب الحجر بصراحةهههههههههههه

ما رأيكم دام فضلكم؟ مستنية تعليقاتكم و إللى عنده أفكار أكلات سريعة و مبتكرة يا ريت يقوللى 🙂

14 تعليق

  1. لا بس بصراحه انتى طباخه هايله وفى سحر غريب كده فى الاطباق الى انتى عملها قلب معدتى
    مش عارف ازاى بس اكيد دى حاجه حلوه 🙂 هيا بنتك لسه عايشه !

    يعنى افتكر زمان امى كانت بتعملى طبق ابو رجل مسلخوه والنداهه والحجات دى
    دلوقتى الزمان اتغيير

    رد

    • ههههههههههههههههههههههه أنا جايز مكونش طباخة شاطرة بالمقارنة بجدتى بس الشئ المؤكد إن إبتكارى خلى بنتى (إللى الحمد لله لسه عايشة 🙂 ) تاكل بشهية و إن كانت تعبيرات وشها كان فيها كم كبير من الإندهاش 🙂 هههههههههههه

      و بعدين أنا حرصت على تقديم اكل صحى فلازم تحيينى على كده 🙂 و لا إيه؟

      ملحوظة هامة: سلامة معدتك من القلبة 🙂 ههههههه و على فكرة انا شايفة صورة بنوتة جميلة يا ترى دى بنوتتك 🙂 لو نفسك تحببها فى الأكل الصحى إبقى جيبها تتعرف على بنتى 🙂 ههههههههههههه و لو إنى حاسة إنك حتخاف على حياتها ههههههههههههههههه

      رد

      • لا طبعا دى حاجه جميله اوى التواصل مع الابناء و انا كنت بهزر وياريت كل عقول البنات تبقى زيك كده

        وعلى فكره الصوره بتاعة البنت الى فى بروفيرى دى بطله اعلان كوكاكولا !!

      • ههههههههههههه ربنا يكرمك ده بس من ذوقك 🙂 أنا بالنسبة لى التواصل مع بنتى سهل جدا لإنى “أعيل” منها 🙂 هههههههه أنا بحب نقاء و بساطة و تلقائية الأطفال بس بنتى داخلة على مرحلة المراهقة …دعواتك 🙂

    • هههههههههههههههههههههههه الحقيقة كان نفسى أاقولك إتفضل بي ال”يع” بتاعتك سدت نفسى أنا شخصيا ههههههههههههههههههههههههههههههههه ساعات بتجيلى تعليقات ملهاش أى حل 🙂 هههههههههههههههههههههههههههههههههههههههههههههههه

      رد

  2. Posted by غير معروف on سبتمبر 21, 2011 at 5:07 ص

    هههههههههههههههههههههههه هههههههههههههههههههههههه طب السندوتشات وفتحت نفسى وكانت جميلة وزى الفل
    انما انا كرهت المكرونة بمناخيرها دى 😀
    وبعدين ليه دايما المناخير بتبقى جزرة 😀 ليه مثلا ماتبقاش خيارة او كريزاية كدة تفتح النفس
    لأ والا العنين المفقوعين فكرتنى بأفلام مصاصين الدماء ههههههههه
    لأ وكمان الفم زى مايكون الواحد رجع كل اللى فى بطنه ههههههههههههههه
    كل واحد وخياله بئة
    ااااااااااااااه يابطنى : D
    عموما الفكرة حلوة اوى والاكلات شكلها حلو ماعدا المكرونة اللى مناخيرها وارمة دى
    المرة دى مش هقول انا مين حظر فزر 😀 انا مييييييييين

    رد

    • ههههههههههههههههه منور يا زيزو 🙂 كلمة “بئة” كشفتك 🙂
      أعتقد الجزرة دايما بتكون مناخير علشان لونها و علشان و بتكون نازلة على ضيق زى مناخير السحرة فى أفلام الكرتون 🙂
      و إنت معاك حق إن وجبة المكرونة شكلها مش عاطفى بس أنا كان أهم حاجة عندى إن بنتى تاكل الخرشوف لأنه مغذى جدا و بعدين هى ضجكت على منظر البنت و ده إللى فتح نفسها و خصوصا بعد القصة إللى حكيتهالها إن البنت عنيها ورمت علشان الولد ضربها بالبوكس لما إتخض من طول مناخرها ههههههههههههههه

      رد

      • Posted by غير معروف on سبتمبر 22, 2011 at 4:47 ص

        هههههههههههه ياااااااااه ماتوقعتش ان كلمة بئة هتكشفنى هو مافيش حد غيرى بيكتبها ولا ايه
        بس كويس وفعلن انتى تخيلتى القصة بطريقة تفتح النفس على الاكل انما انا تخيلتها بطريقة مش لطيفة خالص 😀
        ههههههههه بس برضو مايمنعش ان ممكن نجيب خيارة ونخلى طرفها زى الجزرة ونحطها 😀

      • هههههههههههه الحقيقة يا زيزو محدش غيرك أعرفه بيكتب “بئة” 🙂
        و أنا عاجباانى جدا فكرة الخيارة ياريت تعملها و تبعت لى الصورة بس ساعتها ممكن نغير القصة شوية قتبقى الرجل الأخضر طويييييييييييييييييل المنخار و أهى كمان لونها يليق على الخرشوف 🙂 هههههههههههههههههههه

  3. Posted by غير معروف on أغسطس 19, 2015 at 1:11 م

    😘😍😍😍😍😍😍😘😘😘😘😘😘😘😘😘👱🎃حلو

    رد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s