أحيى جدا مسيرة “الشارع لنا” و رسالتها القوية و أرقام حملة “ميدان آمن للجميع” و صفحتهم على الفيس…

— بنات مصر خط أحمر —

أنا سعيدة حدا بالجهود المنظمة لمكافحة التحرش و كان آخرها حملة “ميدان آمن للجميع” التى بدأت فعاليتها يوم الجمعة الماضى فى التحرير و هذه المقالة بها تفاصيل كتر عن الحملة: http://www.almasryalyoum.com/node/1290786

harassment-resistance

حاليا أعضاء الحملة 150.هى دى بياناتهم:

  • صفحة الفيس: https://www.facebook.com/opantish

  • تويتر: https://twitter.com/opantish

  • الخطوط الساخنة (تستخدم فى حالات الطوارىء فقط و فى المظاهرات التى ستعلن الحملة عن المشاركة فيها): 01157892357/01016051145/01202390087

إستمرارا لردود الأفعال المشرفة ستقام وقفات إحتجاجية على العنف ضد المرأة فى مصر فى 24 دولة اليوم الثلاثاء 12 فبراير أمام القنصليات المصرية فى هذه الدول الساعة 11 صباحا بتوقيت كل دولة.

إمبارح أنا كتبت مقالة بالإنجليزية ونشرتها فى موقع أمريكى  سجلت فبها هذا الموقف العالمى المشرف  و قمت  بترجمة اللافتات التى حملتها بنات مصر الأبطال كى يرى العالم كله أننا سنظل نقاوم للنهاية! هى دى لينك المقالة: http://searchwarp.com/swa866606-Egypts-Revolt-Eye-Witness-2-The-Shout-Out-Against-Women-Harassment.htm

و الحقيقة قبل هذه التطورات الرائعة إنتابتنى مخاوف عرضتها فى هذه المقالة يوم 8 فبراير لكن هذه المخاوف تبددت بعد هذه التطورات و بالتالى حسحب الكلام إللى حتلاقوه فى آخر المقالة (و أنا سايباها كتأريخ للماضى) و بقول بعلو صوتى لكل بنات مصر إنزلوا الميدادين  مرفوعين الرأس.

 ****** بقية المقالة هى مقالتى السابقة و سأتركها للتاريخ  ******

سعادتى لا توصف بمسيرة  الشارع لنا التى إنطلقت يوم 6 فبراير من مسجد السيدة زينب و للتحرير وكنت أتمنى اشارك فيها لكن ظروفى مسمحتش للاسف.

منظر نساء مصر الأحرار و هما متمسكين بحقهم فى نزول الميدان و الإخوة إللى كانوا محاوطين المسيرة علشان يحموها رجع لذاكرتى شهامة و رجولة الشاب المصرى إللى الأحداث المؤسفة الأخيرة خليتنا ننساها.

لا للتحرش

الرسالة فى حد ذاتها كانت قوية و مؤثرة لكن المهم هو إنه يكون فى آلية فى المستقبل تضمن بيها اى بنت حتنزل الشارع إن محدش يلمسها. أنا من متابعتى فهمت إن فى المستقبل حيكون فى جهات بتلبس ملابس مخصوصة علشان البنات تستعين بيهم و تكون فى حمايتهم فى أى فعاليات فى المستقبل. الجهات دى محتاجة تعلن عن نفسها بوضوح و أماكن وجودها لازم تكون معروفة للجميع.

لو ده محصلش يبقى نزولنا الشارع غلط من باب “و لا تلقوا بأيديكم إلى التهلكة” بمعنى إن أى بنت تمشى فى شارع ظلمة و تتعرض للإغتصاب أو التحرش  بتكون مسؤولة بشكل ضمنى لإنها حطت نفسها فى الموقف ده.

women-march.100

هى دى كل الفكرة  و أنا مش بقول الكلام ده من فراغ: أنا نزلت التحرير فى الذكرى الثانية للثورة بعد الظهر و كان المشهد جميل لكن للأسف فى ست كبيرة قالت لى إن حصل لها تحرش بس زعقت لما حست بالتحرش و قالت:  إنتوا بتتحرشوا بينا علشان تمشونا طيب إحنا مش ماشيين!

و دخلت بعد المغرب بيتزا هت محمد محمود أغسل إيدى و إتحبسنا جوة  و دخل بنات مضروبين فى وشهم و دايخين من الغاز و فى ناس قالوا إن حصل لهم تحرش فدخلوا المحل يستخبوا و العاملين قفلوا الباب الأمامى بس كان فى خبط جامد على الباب و خرجونا من الباب الخلفى أنا و كذا بنت و كان معانا واحدة فوق الستين.

أنا لما لقيت الوضع كده قررت أروح مش جبن منى و الله العظيم لكن لما أشوف بعينى ناس تانيين إتعرضوا للتحرش مينفعش أرجع الميدان تانى لإن إللى بتعمل كده بتلقى بإيديها للتهلكة. طبعا انا متفهة وجهة النظر إللى بتقول إننا لو مشينا حنحقق هدفهم و على فكرة الست العظيمة إللى خرجت معانا من الباب الخلفى رجعت الميدان تانى و مهمهاش.

لكن بعد كده سمعنا عن حوادث الإغتصاب الجماعى الممنهجة المؤسفة إللى حصلت فى التحرير. يبقى إيه الحل؟

لا للتحرش

الحل إننا نشارك فى المسيرات بس يكون فيه وسائل كافية و معروفة سلفا لحمايتنا. لازم المنظمات الحقوقية تلعب دور واضح و تقول لنا مناطق تجمعها ساعتها ممكن ننزل أى مسيرات من غير ما نخاف أن نكون من أهل الآية الكريمة: “و لا تلقوا بأيديكم إلى التهلكة

فى فرق كبير بين الشجاعة و التهور و الإخوان دلوقت عاملين زى الحيوان الجريح و بيتعاملوا مع المعارضة بشراسة شديدة و منطق البقاء للأقوى. أنا قريت فى سيرة سيدنا عمر بن عبد العزيز إن لما حصل فتن و قتل فى المدينة آل بيت النيى لزموا بيوتهم. أكيد هما مكانوش جبناء لما عملوا كده.

أنا حكرر طلبى تانى: ياريت اى بنت من هنا ورايح متنزلش اى مسيرة إلا لما تعرف أماكن تواجد المنظمات الحقوقية المعنية بمكافحة التحرش و بالتالى لازم المنظمات دى يكون لها زى معروف و تعلن فى كل مرة عن اماكن تواجدها و كمان تطمننا على الوسائل الفعالة إللى حتستخدمها لحمايتنا. لو ده محصلش يبقى عدم النزول أصح من وجهة نظرى.

إنتوا شايفين إيه؟ فى إنتظار تعليقاتكم…

2 تعليقان

  1. Like
    أنا بتفق مع حضرتك ف عدم نزول أى بنت مظاهرة دلوقتى لحمايتها ولحين توفير الية تكون معنية بالمحافظة عليها وضمان عدم ترضها للتحرش .

    رد

    • أنا الحقيقة يا عبد الله نفسى يكون فى آلية للحماية فى أسرع وقت لإنى عايزة أنزل بصراحة و حسيت بقهر شديد لما إضطريت أسيب التحرير فى الذكرى الثانية للثورة!!! المسألة ممكنة إن شاء الله

      رد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s