Archive for 31 ديسمبر, 2013

فيديو كاريكاتير مصر 2014 – إدى خوفك بالشلوت و فكر فى معدومى الدخل! سنة 2014 مصر قمر 14 :)

كل سنة و إنتوا طيبين و مصر و الأمة الإسلامية كلها بخير و سعادة. هدفى الأساسى من الكاريكاتير ده إننا لازم نفكر فى المواطنين البسطاء إللى الموجات الثورية فى 25 يناير و محمد محمود و 30 يونيو زودت معاناتهم. سنة 2014 لازم تكون سنتهم هما و علشان تقدر تساعدهم إدى أى حاجة معجبتكش فى 2013  بالشلوت! إيه رأيكم؟ مستنية تعليقاتكم 🙂

و فى الفيديو ناقشت أهم حاجتين إحنا محتاجينهم علشان نحقق أهدافنا فى 2014 بتوفيق الله:

أولا عدم المبالغة فى لوم أنفسنا لإن العبرة ليست بالسقوط وسط الطريق لكن العبرة بقدرتنا على سرعة القيام مصداقا لقوله تعالى: “ويدرؤن بالحسنة السيئة”

ثانيا لما تكتب أهداف لازم تكتب أسبابها. إيه قيمة هدفك؟ و ليه هو مهم بالنسبة لك؟ كتابة أسباب قوية لتحقيق الأسباب حافز هام لتحقيقيها. بالتوفيق للجميع إن شاء الله 🙂

كاريكاتير-مصر-2014

Advertisements

Completed Introductory and Advanced Psychodrama Courses

psychodrama-course-certificate

psychodrama-introductory-course-certificate

رسالة لكل حكومات مصر من عهد عبد الناصر حتى اليوم: كفايكم إرتجال و عشوائية!!!

كاريكاتير-إبراهيم-عيسى

معرفتش أفرح الحقيقة بإعلان حكومة الببلاوى بإعتبار الإخوان جماعة إرهابية لإن القرارإتأخر بشكل مستفز و على رأى الإعلامى إبراهيم عيسى: “أسوأ حاجة فى قرار حكومة الببلاوى إن الإخوان جماعة إرهابية إن نفس الحكومة هى إللى حتنفذه!” له حق يقلق من طريقة تنفيذ الإعلان لإن تاريخ الحكومة القصير فى وقته المحبط فى أدائه غير مبشر على الإطلاق!

و نيجى للموضوع التانى إللى فى منتهى الخطورة: إغلاق أكتر من ألف جمعية خيرية يشتبه إنها تابعة للإخوان فكانت النتيجة إيه؟ آلالاف الفقراء إللى كانوا بيتلقوا معونات صحية و مالية “بيحسبنوا!” على الحكومة دلوقت!

أنا مش بحب النقد الغير بناء بمعنى إنكم لو سألتونى أنا لو مكان الحكومة أعمل إيه علشان أقفل حنفية تمويلات الإخوان؟ الحل ببساطة إنى لازم أوجد أى بديل من أى نوع للأسر المستفيدة من هذه الجمعيات و أعلن الحل البديل بوضوح قبل ما أقفل الجمعيات لإن لو ده محصلش منقدرش نلوم الأسر المستفيدة من الجمعيات لو لعنوا سنسفيل الحكومة و طبعا السفلة إللى بيتاجروا بدماء الأموات لن يتورعوا عن المتاجرة بإحتياجات الفقراء و آلامهم! شىء مؤسف جدا!

و السؤال إللى إجابته واضحة للأسف هو: يا ترى الحكومة فكرت فى نتايج و تداعيات قرارها قبل ما تاخده؟ مأظنش للأسف!!! من أى أيام الزعيم الراحل جمال عبد الناصر و إحنا حكومة ردود أفعال! لما إتفرجت على فيلم ناصر 56 لفت نظرى إنه بعد ما أخد قرار تأميم القناة “إتفاجىء!” بإستقالة ظباط البحرية الأجانب إللى كانوا بيرشدوا البواخر فى القناة لكن عرف يتصرف و جاب مرشدين بحريين من اليونان. هو ده إللى الفيلم بينه و مش عارفة مدى دقته تاريخيا لكن الصح إنه يكون “متوقع” إن النتيجة المنطقية لتأميم القناة هى إستقالة المرشدين من فرنسا و بريطانيا و يكون جاهز بالبديل  قبل ما يعلن قرار التأميم أساسا! الحمد لله إنه قدر يلاقى حل لكن ماذا لو كانوا المرشدين اليونانيين رفضوا العمل فى القناة؟ طبعا قرار التأميم قرار جرىء و تاريخى و من إنجازات الزعيم عبد الناصر التى لا ينكرها منصف و جايز الظروف الملحة إقتضت إنه ياخده بسرعة دون دراسة لعواقبه.

لكن  خلاصة القول إن الإرتجال و العشوائية و ردود الأفعال بدل من المبادرة أصبحت هى السمات الغالبة على أداء الحكومات المصرية المتعاقبة! و من الحاجات بتذهلنى إنهم ساعات بيتفاجئوا بأحداث لها سوابق و إرهاصات واضحة! على سبيل المثال تصريح وزير الداخلية بعد فض إعتصامى رابعة و النهضة إنهم “إتفاجئوا” بحرق الكنايس كان مذهل جدا بالنسبة لى لإنهم حرقوا كنايس فى الصعيد قبل فض الإعتصام يبقى إيه عنصر المفاجأة؟

و سؤال تانى على سبيل المثال لا الحصر: لما مرشد الإخوان و الشاطر و غيرهم من القيادات يبلطجوا فى المحكمة و يعملوا شوشرة مرة ياترى  فى حد عاقل ممكن يتفاجىء لو كرروها؟ الإجابة الواضحة هى لأ طبعا لكن تبصوا تلاقوا قاضى يرفع الجلسة علشان الإخوان بيبلطجوا فى المحكمة للمرة الألف و فى نفس الوقت القاضى إللى بينظر قضة حازم أبو إسماعيل يستعمل سلطته كقاضى و يخرج أبو إسماعيل برة لما يشوشر! إيه الفرق بين أبو إسماعيل و قيادات الإخوان؟ بسم الله الرحمن الرحيم الإجابة معرفش لكن عارفة إن التباطؤ فى محاكمة قيادات الإخوان مش فى صالحنا!!!

كفايكم إرتجال و عشوائية!  ربنا ينعم علينا بحكومة مبادرة لها رؤية و ياااااارب 2014 تكون أحسن من 2013! اللهم آمين.

 

كلمتين و بس يبردوا نارنا على شهداء الغدر و الإرهاب فى المنصورة: الله أكبر

رحمة الله على شهداء الغدر و الإرهاب من الشرطة و المدنيين فى المنصورة…
لكن موقف أهل المنصورة ناصع و أبلغ من أى كلام و إن كنت معترضة طبعا على تخريب ممتلكات إخوانية لكن الناس طهقت! هو ده عيب العدالة البطيئة لما الناس مش حتلاقى القانون بيحميها هما إللى حياخدوا حقهم بإيدهم يقوموا السفلة التانيين “يتلككوا” علشان يشتبكوا أكتر مع الناس! ربنا ينور بصريتنا و يلهمنا الإسلوب الامثل للتعامل مع ناس منحطين و غدارين و مش رجالة أصلا!
إنسوا يا إرهابيين
دى إيد الغدر مبتورة
يا عملاء الشياطين

الله أكبر…الله أكبر…الله أكبر

المجد-للشهداء

فيديو إلهمنى شكرا (4) – 5 أقوال مأثورة ل نيلسون مانديلا و غاندى و هتلر و ميكافيللى و إسلام البحيرى :) #دعوة_للتأمل

 

المقولات المأثورة التى تضمنها الفيديو:

“الحرية يطلبها العبيد و يصنعها الأحرار” – نيلسون مانديلا

“كن أنت التغيير الذى تتمنى أن تراه” – مهاتما غاندى

المهزوم إذا إبتسم أفقد المنتصر لذة الفوز” – أدولف هتلر

الغاية تبرر الوسيلة” – نيكولو ميكافيللى

ميكافيللى ينحنى ركوعا أمام السلفيين 🙂 ” – إسلام البحيرى

الزعيم_الراحل_نيلسون_مانديلا

فى إنتظار تعليقاتكم… 

بالصور إسبوع الإنجازات و الخسائر: فقدنا الحاضر الغائب أحمد فؤاد نجم و شرفنا عمر سمرة أول رائد فضاء مصرى

لم تمض ايام قليلة بعد أن شاء العلى القدير أن يختار شاعرنا العظيم الفاجومى أحمد فؤاد نجم إلى جواره  حتى اسعدنا عمر سمرة بإنجازه الرائع و سيشرف مصر كلها بأن يكون أول رائد فضاء مصرى عام 2014. مصر و لادة…

الشاعر-الراحل-أحمد-فؤاد-نجم

 

عمر-سمرة-أول-رائد-فضاء-مصرى