Archive for 4 ديسمبر, 2015

ناقوس الخطر (6) فى متطرفين مش منضمين لداعش إوعى تكون منهم!!

عااااااجل و حصرى لكل مصرى بيحب مصر بجد و إللى مش متأكد من حبه لمصر ممكن يطنش المقالة دى….

الصدق و الموضوعية النابعين من حبنا لمصر بيفرضوا علينا إننا لما نحلل أى أحداث نشوف إيجابياتها و سلبياتها و المشكلة إن أغلب المصريين يا إما يمين قوى و شايقين الحياة وردى يا إما شمال قوى و شايفين الدنيا سودة … انا بحاول أتحلى بالموضوعية فمثلا بعد تجربة الإنتخابات البرلمانية نشرت على مدونتى مقالة بعنوان “الإنتخابات البرلمانية إيجابيات و سلبيات لكن الإيجابيات أكتر …” دى رأيى إللى فندته فى المقالة و تقدروا تشوفها فى اللينك ده:

https://ba7ebmasrbegad.wordpress.com/2015/12/03/%D8%A7%D9%84%D8%A5%D9%86%D8%AA%D8%AE%D8%A7%D8%A8%D8%A7%D8%AA-%D8%A7%D9%84%D8%A8%D8%B1%D9%84%D9%85%D8%A7%D9%86%D9%8A%D8%A9-%D8%A5%D9%8A%D8%AC%D8%A7%D8%A8%D9%8A%D8%A7%D8%AA-%D9%88-%D8%B3%D9%84%D8%A8/ …

أغلب الناس بلاقيهم يا إما مؤيدين تماما يا إما معارضين تماما و الإتنين بيتعاملوا مع الأمور بشكل عاطفى ملوش دعوة بالحقيقة … على سبيل المثال فى واحدة علقت على البرلمان إنه “برلمان عكاشة و مرتضى” فأنا رديت عليها بالإحصائيات إن البرلمان الحالى شهد لأول مرة وجود حوالى 40 شاب فى التلانيات و حوالى 85 إمرأة و الأقباط كسبوا بنسبة غير مسبوقة و إن نسبة كبيرة من الفائزين مستقلين و بعدين سألتها لما نركز على السلبيات و نتجاهل الإيجابيات ده ممكن يفيد مصر بإيه؟و العكس بالعكس إللى شايفين الحياة وردى عى طول و مش قابلين أى حد ينتقد أى حاجة حتى لو كان النقد بناء و نابع من حب صادق للوطن ممكن يفيدوا مصر بإيه؟

لجميع الأطراف بقول بأعلى صوت: حذار من التطرف…شفتوا بفى إن فى متطرفين بيننا أخطر من داعش إوعى تكون واحد منهم!

3

 

الإنتخابات البرلمانية إيجابيات و سلبيات لكن الإيجابيات أكتر …

تحيا-مصر-عزيزة-أبية

أهم إيجابيات الإنتخابات البرلمانية: 

  • حوالى 40 شاب فى التلانيات
  • حوالى 85 إمرأة
  • الأقباط كسبوا بنسبة غير مسبوقة
  • أغلبية الفائزين مستقلين

بإذن الله حنشر الأرقام الفعلية لما النتايج الرسمية تطلع 

الحمد لله انا أفخر بإنتمائى لدايرة مدينة نصر الحمد لله المال السياسى مكانش له أى تأثير عندنا …فاز عندنا اللواء حمدى بخيت من أبطال حرب أكتوبر و اللواء تامر الشهاوى و قبلهم دكتور سمير غطاس فى المرحلة الأولى كلهم تاريخهم مشرف و مؤهلين تماما لحمل عبء البرلمان خصوصا فيما بتعلق بالتشريع و وضع القوانين لإنه حيكون من أولويات البرلمان فى المرحلة الحالية.

إنما المفاجأة إللى بجد فى دايرة مدينة نصر هى إنه بالرغم إن قايمة حزب النور كانت فى المركز التانى على مستوى القاهرة و الدلتا قايمة حزب النور فى مدينة نصر خدت حوالى 3% من إجمالى أصوات القوائم ده شىء يدعو للفخر و التأمل لإن مدينة نصر كانت مليانة إخوان … الحمد لله انا سعيدة جدا إن رغم إن نسبة المشاركة كانت ضعيفة إللى شاركوا بالفعل كانوا حريصين على إختيار الأفضل و فى دواير كتير قوى المال السياسى مكانش له تأثير و نجح شباب و نساء مستقلين 🙂 #‏تحيا_مصر‬

انتخابات-برلمان-مصر-2015-صور-معبرة-الجشي-الشعي-ايد-واحده

تضمنت الإنتخابات صور مضيئة تستحق الإشادة  … الصور مش محتاجة كلام…أفراد الجيش بيصلحوا تختة مدرسية و بيساعدوا كبار السن و كله علشانك يا مصر يا غالية 🙂 #تحيا_مصر

افراد-الجيش-يصلحون-تختة-مدرسة

 

افراد-الجيش-يساعدون-كبار-السن-فى-الغنتخابات

أهم سلبيات الإنتخابات البرلمانية:

الرشاوى الإنتخابية كانت أبرز سلبيات الإنتخابات و رغم الفيديوهات إللى مالية اليوتيوب ووصلنا فيها لمرحلة “الفسيخ!” اللجنة الإنتخابية متقدرش تحقق فيهم علشان مجالهاش بلاغات رسمية! إنما حيحصل مسائلة لكل النواب إللى تجاوزت نفاقتهم الإنتخابية الحد المطلوب و ده إجراء مهم جدا لضمان عدم التجاوز فى المستقبل

جابر القرموطى ترامادول

الحمد لله أخدت درس خصوصى فى الفرق بين الترامادول المصرى و الصينى و شكل الحشيش بفضل الإعلامى جابر القرموطى 🙂 لكن المؤسف إنه كان بيفرجنا الحاجات دى كأمثلة للرشاوى الإنتخابية فى إنتخابات البرلمان الأخيرة! أنا كنت دايما براهن على ذكاء المصرى البسيط إللى ممكن يضحك على مرشح بيرشيه وياخد منه إللى فيه القسمة و يصوت للإللى يعجبه لكن المرة دى حصل تطور مؤسف جدا: آخر موضة إنهم بيصوروا إنهم علموا على المرشح المطلوب فى ورقة الترشيح بكاميرا الموبايل و يوروها كدليل بعد ما يخلصوا إنتخاب عشا ياخدوا إللى فيه القسمة! ده غير سمسارة الإنتخابات إللى بيروحوا للناس فى البيوت … دى كلها سلبيات ذكرها الإعلامى جابر القرموطى نقلا عن تحقيقات صحفية و أتمنى من قلبى ييكون فيها مبالغة و فى النهاية القضاء على الفقر هو الحل الجذرى للموضوع ده بدليل إن الأماكن إللى فيها المستويات التعليمية و الإجتماعية مرتفعة إلى حد ما زى مصر الجديدة و مدينة نصر مكانش للمال السياسى أى تأثير فى نتايج الإنتخابات فيها و شفنا نجاح لشباب مستقلين و نساء و أقباط 🙂 فالحمد لله إحنا بنتقدم بخطى واسعة فى الطريق الصحيح و كله علشانك يا مصر يا غالية 🙂 #تحيأ_مصر

مصرى-وأفتخر-تحيا-مصر