Archive for 31 مارس, 2016

ما تيجوا نرسم (7) إرسم مكان ميلادك بطريقة إبداعية #لا_للأستيكة

رسمت لوحة عن يوم ومكان ميلادى وهى لوحة تعمدت فيها ان تكون إبداعية بمعنى:

1- إنى قررت إنى مهما عملت غلطات مش حستخدم الأستيكة

2- معملتش تخطيط للوحة قبل ما أرسمها يعنى محددتش أماكن الرسومات ومكنتش عارفة حرسم إيه بالظبط قبل ما أرسم يعنى مثلا فكرة ربط العصافير بشعاع الشمس جت لى وانا برسم مفكرتش فيها قبل كده

3- لما لقيت نفسى مش فاكرة شكل أبو الهول محاولتش أدور على صورته ورسمته من خيالى فطلع كاريكاتير 🙂

الرسم الإبداعى التلقائى بيكون فيه درجة عالية من التحرر والاستمتاع بالرسم بغض النظر عن أى قواعد…

والسؤال طبعا إيه علاقة الأهرامات بيوم ميلادك؟ والإجابة ببساطة إنى اتولدت فى الجيزة جنب الأهرامات 🙂 والطريف إنى إتولدت يوم أربع وكان يوم 4 الساعة 4 الصبح الدور الرابع غرفة رقم 4 سبحان الله 🙂 فطبعا وضع طبيعى إن 4 عصافير تجيبنى من السما وإنى أكون ماسكة رقم 4 فى إيدى …

لغاية دلوقت مفيش تجليات “واضحة” لرقم 4 فى حياتى إنما بإذن الله يكون للرقم مدلول إيجابى … اللهم آمين 🙂

أدعو الجميع للإستمتاع بالرسم الإبداعى دون التقيد بأى قواعد وانا طبعا مش ضد إتقان الرسم ولا إتباع القواعد إنما ميزة الرسم الإبداعى إن أى حد ممكن يستمتع بيه مش شرط يكون بيكاسو 🙂

نفسك تكون سعيد؟ إرسم 🙂

الرسم-الابداعى-يوم-ميلادى-صورة-معبرة-هبة-حسنى

 

Advertisements

بهدووووء (1) صبحت على مصر بجنيه أول ما سمعت خبر الطائرة المخطوفة لقبرص :) #لا_للأفورة

‫#‏فخوووورة_بنفسى‬ النهارده أول ما صحيت ماما قلت لى بلهفة: السياحة انضربت وحكيت لى حكاية الطيارة المخطوفة فكان رد فعلى لهذا الحدث التاريخى إنى:

أولا صبحت على مصر بجنيه 🙂

ثانيا قلت لماما بكل هدووووء يجب أن يدرس فى مدارس الثبات الإنفعالى: حستنى لغاية بالليل أشوف الأخبار علشان تكون الأمور إتضحت 🙂

مين استعجل وأفور؟ الحمد لله مش أنا 🙂

عدم التسرع والأفورة وعدم تصديق أخبار غير موثقة من أهم الدروس اللى اتعلمتها من كتر إللى شفناه بعد الثورة…يا ما دقت عالراس طبول!

فالحقيقة أنا فخورة برد فعلى النهارده جدا …كفاية تسقيف يا جماعة أخجلتم تواضعى 🙂  هههههههههههههههههههههههههه

وختاما لازم أقدم تحية واجبة للطيار وطاقم الطائرة ونشكر السيد المختطف لإن على حسه تم إذاعة فيديو يؤكد دقة الإجراءات الأمنية فى المطار عشرات المرات 🙂 #تحيا_مصر

وحمد لله على سلامة الخاطفين والمخطوفين 🙂  هههههههههههه

طائرة

صور حتغير حياتك (5) كتاب “إشراقة روح” فى صورة أنيمشن مجمعة…

يمكنكم تصفح وتحميل النسخة الإلكترونية من  كتابى الأول “إشراقة روح” على موقع كتبنا:

http://kotobna.net/Book/Details?bookID=816

 

سلسلة كتب “إشراقة روح” هى أول سلسلة لكتب تفاعلية توظف الكاريكاتير والشعر والتنمية البشرية فى التعمق فى فهم ودارسة آيات القرآن الكريم. وهذا الكتاب هو الأول فى هذه السلسلة بتوفيق الله: إشراقة روح (1) – تأملات فى قوله تعالىفلا اقتحم العقبة

إضغطوا على الصورة لمشاهدة وتحميل الكتاب … أتشرف بمتابعتكم وأسألكم الدعاء

 

كتاب-إشراقة-روح-هبة-الله-حسنى-صورة

استخدمت موقع http://gifmaker.me/  المجانى فى عمل الصورة أون لاين 

ناقوس الخطر (9) للنابغة الذبيانى فى الاعتذار…حقك علينا يا سيادة المستشار! (الزند)

تعرفوا يا جماعة إن ديننا بيأمرنا إننا “لاااازم”نقبل إعتذار أى حد يغلط فى حقنا ويعتذر؟ حتى لو كنت حساس ومش قادر تسامحه من جواك لازم تتظاهر إنك سامحته لإننا مش معقول نفضل “نجلد!” الآخرين علشان غلطوا فى حقنا حتى إذا كان عندهم شجاعة الإعتذار!

يبقى فبول الاعتذار من صميم الدين ورسولنا الكريم ياما عفا عن ناس غلطوا فى حقه ومعتذروش أساسا…بعد كل المقدمة دى حسألكم سؤال إفتراضى إجابته معروفة:

لو الرسول عليه السلام كان عايش معانا النهارده كان حيقبل اعتذار المستشار الزند عن زلة لسانه الغير مقصودة ولا كان حيرفده من منصبه؟

أى حد رفض قبول اعتذار المستشار الزند خالف سنة الرسول عليه السلام مخالفة صريحة..والمضحك المبكى إنه بيعمل كده تحت زعم محبة السول عليه السلام و الغيرة عليه!!!

وطبعا انا حمقتى على الموضوع ده أكبر من موضوع المستشار الزند تحديدا…إللى بيحصل ده دليل على إننا بقينا مجتمع شديد القسوة يفتقر لقيم التراحم وثقافة قبول الاعتذار…فكان لازم أدق ناقوس الخطر لإن فينا قيم جميلة عمالة تنهار…ربنا يصلح الأحوال  

المستشار الزند

 

خاطرة-شعرية-هبة-حسنى

فى يوم الشهيد 9 مارس ندعو الله تعالى بالرحمة لشهدائنا الأبرار الأبطال

رحمة الله على شهدائنا الأبرار بمناسبة يوم الشهيد الذى تم اختياره يوم 9 مارس تحديدا لإنه يوافق ذكرى استشهاد البطل عبد المنعم رياض فى 9 مارس 1969 أثناء تفقده لكمين تم قصفه من قبل العدو الصهيونى فى فترة حرب الاستنزاف …رحمة الله على جميع شهدائنا الأبرار الأبطال

يوم-الشهيد-عبد--المنعم-رياض