Archive for the ‘أغانى تم عرضها’ Category

فيديو شكر و عرفان لفريق المسرح العربى لإتاحة الفرصة لى لتأليف بعض أغانى مسرحية “غابة أون لاين”

هذا الفيديو تعبير بسيط منى عن شكرى و إمتنانى لفرقة المسرح العربى لإتاحة الفرصة لى لتأليف أربع أغانى لمسرحية “غابة  أون لاين” و هى مسرحية غنائية إستعراضية للأطفال (الأغانى موجودة فى مصنف أغانى تم عرضها.)

الفيديو بشمل مقاطع بعض أغانى المسرحية و قد بدأ عرض المسرحية بالفعل و هى تعرض حاليا فى مسرح مدرسة سان مارك بالشاطبى بالإسكندرية لكن من المتوقع أن تعرض فى أماكن عديدة لأنها حققت نجاح باهر من أول يوم عرض. و شرف لى أن كون ضمن فريق عمل من فنانين موهبين و متميزين.

إذا كان متصفحك لا يدعم مشاهدة الفيديو على هذه الصفحة إضغط هنا لتشاهده على اليوتوب

Advertisements

أغانى مسرحية “غابة أون لاين” من تأليفى (4) – أغنية “حكاية حيوانات الغابة”

تشرفت بالتعاون مع فرقة المسرح العربى و قمت بتأليف أربع أغانى لمسرحية “غابة أون لاين” و هى مسرحية غنائية إستعراضية للأطفال. و قد بدأ عرض المسرحية بالفعل و هى تعرض حاليا فى مسرح مدرسة سان مارك بالشاطبى بالإسكندرية لكن من المتوقع أن تعرض فى أماكن عديدة لأنها حققت نجاح باهر من أول يوم عرض. و شرف لى أن كون ضمن فريق عمل من فنانين موهبين و متميزين.

*** الأغنية المعروضة هنا هى النسخة الأصلية لكن تم حذف بعض أجزائها فى المسرحية بسبب الوقت. أجزائى المفضلة باللون الموف ***

أغنية “حكاية حيوانات الغابة

لأميرة: ياللا تعالوا تعالوا تعالوا يا شطار

الحيوانات: هييييييييه

الأميرة: إسمعوا منى إسمعوا منى آخر الأخبار

الحيوانات: إييييييييه

إزاى جدو وحيد و فارة و أرنب ويا حمار

و غزالة  و أسد زعميهم  باشا واقف زنهار

ضحك عليهم حتة تعلب خلى الغابة دمار؟!!!!

 إسمح لى يا ملك الغاب خليت عقلى إحتار

إزاى سبت التعلب يغلب؟! آه ده صحيح مكار

لو كنت مصحصح له كان طبعا كش و غار

قللى يا “أس أس” (إسم دلع الأسد فى المسرحية) إنت أسد بجد و لا حمار؟! 🙂 ههههههههههه

الحيوانات:  معلش يا حمار …متزعلش يا حمار…لامؤاخذة يا حمار…متقصدش يا حمار

الأميرة: ياللا تعالوا تعالوا تعالوا يا شطار

الحيوانات: هييييييييه

الأميرة: إسمعوا منى إسمعوا منى آخر الأخبار

الحيوانات: إييييييييه

إزاى جدو وحيد و فارة و أرنب ويا حمار

و غزالة  و أسد زعميهم  باشا واقف زنهار

ضحك عليهم حتة تعلب خلى الغابة دمار؟!!!

و إنتوا إزاى يا حيوانات الغابة يا شطار

سيبتوا التعلب يدخل بينكم و يكشف الأسرار

فضل يقول ويعيد و يزن ينخور ليل و نهار

كره كل واحد فى التانى الحب ما بينكوا إنهار 😦

 ياللا تعالوا تعالوا تعالوا يا شطار

الحيوانات: هييييييييه

الأميرة: إسمعوا منى إسمعوا منى آخر الأخبار

الحيوانات: ييييييييه!! 😦

إزاى جدو وحيد و فارة و أرنب ويا حمار

و غزالة  و أسد زعميهم  باشا واقف زنهار

ضحك عليهم حتة تعلب خلى الغابة دمار

ضحك عليهم حتة تعلب خلى الغابة دمار

ضحك عليهم حتة تعلب خلى الغابة دماااااار؟!!!

أغانى مسرحية “غابة أون لاين” من تأليفى (3) – دويتو “نقدر؟ طبعا نقدر!”

تشرفت بالتعاون مع فرقة المسرح العربى و قمت بتأليف أربع أغانى لمسرحية “غابة  أون لاين” و هى مسرحية غنائية إستعراضية للأطفال. و قد بدأ عرض المسرحية بالفعل و هى تعرض حاليا فى مسرح مدرسة سان مارك بالشاطبى بالإسكندرية لكن من المتوقع أن تعرض فى أماكن عديدة  لأنها حققت نجاح باهر من أول يوم عرض. و شرف لى أن كون ضمن فريق عمل من فنانين موهبين و متميزين.

*** الأغنية المعروضة هنا هى النسخة الأصلية لكن تم حذف بعض أجزائها فى المسرحية بسبب الوقت. أجزائى المفضلة باللون الموف ***

دويتو “نقدر؟ طبعا نقدر!

الأميرة: نقدر؟ طبعا نقدر نملا الدنيا عمار

حسين: نقدر؟ طبعا نقدر نخلى الصحرا خضار

الأميرة: نقدر؟ طبعا نقدر نملا الدنيا عمار

حسين: نقدر؟ طبعا نقدر نخلى الصحرا خضار

الأميرة و حسين :نقدر بس نقرر…إن إحنا حنتغير

و نعلى نكبر بعزيمة و إصرار

الأميرة: حياتك أغلى هدية و منة من الرحمن

ربك قالك عيشها بفرح و نور و إيمان

قد ما تزرع تحصد

قد ما تتعب تكسب

و تحقق أحلامك و توصل بر أمان

تقدر؟

حسين: طبعا حقدر أخلى ليلى نهار

الأميرة: تقدر؟

حسين: طبعا حقدر أكون للدنيا منار

حقدر لما اقرر ...إنى لازم أتحرر

من يأسى و من خوفى و لا يهزمنيش إعصار

الأميرة: نقدر؟ طبعا نقدر نملا الدنيا عمار

حسين: نقدر؟ طبعا نقدر نخلى الصحرا خضار

الأميرة: نقدر؟ طبعا نقدر نملا الدنيا عمار

حسين: نقدر؟ طبعا نقدر نخلى الصحرا خضار

الأميرة و حسين :نقدر بس نقرر…إن إحنا حنتغير

و نعلى نكبر بعزيمة و إصرار

حسين: شمس الأمل طالعة تدوب يأس سنين

و تدفى أيامنا بلهفة و شوق حنين

كل ما تضحكى ضحكة

كل ما ترسمى بسمة

تبقى حياتك بلسم يطيب كل حزين

تقدرى؟

الأميرة: طبعا حقدر ألون الأزهار

حسين: تقدرى؟

الأميرة:  طبعا حقدر أكمل المشوار

حقدر لما أقرر

إنى لازم أفجر

بقلمى و ريشتى و عملى ينابيع الأنوار

الأميرة و حسين: نقدر؟ طبعا نقدر نملا الدنيا عمار

نقدر؟ طبعا نقدر نخلى الصحرا خضار

نقدر؟ طبعا نقدر نملا الدنيا عمار

نقدر؟ طبعا نقدر نخلى الصحرا خضار

نقدر بس نقرر…إن إحنا حنتغير

نقدر بس نقرر…إن إحنا حنتغير

و نعلى نكبر بعزيمة و إصرار

و نعلى نكبر بعزيمة و إصرار

و نعلى نكبر بعزيمة و إصرار

نقدر!

أغانى مسرحية “غابة أون لاين” من تأليفى (2) – دويتو “الذكريات”

تشرفت بالتعاون مع فرقة المسرح العربى و قمت بتأليف أربع أغانى لمسرحية “غابة  أون لاين” و هى مسرحية غنائية إستعراضية للأطفال. و قد بدأ عرض المسرحية بالفعل و هى تعرض حاليا فى مسرح مدرسة سان مارك بالشاطبى بالإسكندرية لكن من المتوقع أن تعرض فى أماكن عديدة  لأنها حققت نجاح باهر من أول يوم عرض. و شرف لى أن كون ضمن فريق عمل من فنانين موهبين و متميزين.

*** الأغنية المعروضة هنا هى النسخة الأصلية لكن تم حذف بعض أجزائها فى المسرحية بسبب الوقت. أجزائى المفضلة باللون الموف ***

دويتو “الذكريات

الأميرة: فاكر لما كنا لسه صغيرين

وقلوبنا لسه خضرة

و حلمنا برىء

حسين: فاكرة لما كنا لسه صغيرين

وقلوبنا لسه خضرة

و حلمنا برىء

الأميرة و حسين: الحلم كان برئ

لكنه كان جرىء

كان سننا صغير

و الحلم كان كبير

الأميرة: فاكر لما كنا بنجرى فى الغيطان

طايرين فوق الحواجز

و حلمنا فرحان

الحلم كان برئ

لكنه كان جرىء

كان سننا صغير

و الحلم كان كبير

حسين: أنا فاكر كل حاجة زى شمس النهار

يا ما غنينا لبكرة

فى حضن الأزهار

الحلم كان برئ

لكنه كان جرىء

كان سننا صغير

و الحلم كان كبير

الأميرة: فاكر لما كنا لسه صغيرين

حسين: لأ فاكرة لما كنا لسه صغيرين

الأميرة و حسين: وقلوبنا لسه خضرة

و حلمنا برىء

الحلم كان برئ

لكنه كان جرىء

كان سننا صغير

و الحلم كان كبير

كان سننا صغير

و الحلم كان كبير

كان سننا صغير

و الحلم كان كبير

كان سننا صغير

و الحلم كان كبير

أغانى مسرحية “غابة أون لاين” من تأليفى (1) – أغنية “الناس الطيبين

تشرفت بالتعاون مع فرقة المسرح العربى و قمت بتأليف أربع أغانى لمسرحية “غابة  أون لاين” و هى مسرحية غنائية إستعراضية للأطفال. و قد بدأ عرض المسرحية بالفعل و هى تعرض حاليا فى مسرح مدرسة سان مارك بالشاطبى بالإسكندرية لكن من المتوقع أن تعرض فى أماكن عديدة  لأنها حققت نجاح باهر من أول يوم عرض. و شرف لى أن كون ضمن فريق عمل من فنانين موهبين و متميزين.

*** الأغنية المعروضة هنا هى النسخة الأصلية لكن تم حذف بعض أجزائها فى المسرحية بسبب الوقت ***

أغنية “الناس الطيبين

فى ناس الخير ماليها

تشوفها تجرى عليها

تشفيك لمسة إيديها

دول ناسنا الطيبين

تديك و جيبها فاضى

تتعب و القلب راضى

تغسل أحزان و ماضى

دول ناسنا الطيبين

الله على نور عيونهم

و دفا الحب إللى بينهم

ملناش بركة غيرهم

دول ناسنا الطيبين

فى ناس الخير ماليها

تشوفها تجرى عليها

تشفيك لمسة إيديها

دول ناسنا الطيبين

عرفتوا يبقوا مين؟

دول ناسنا الطيبين

قولولى هما مين؟

عم محمد و أمين

و جرجس و إسماعين

من كل ملة و دين

دول ناسنا الطيبين