Archive for the ‘بإيدينا بكرة أحلى’ Category

أغنية “سامح” مستوحاه من أغنية داري للفنان حمزة نمرة #المبدعة_الربانية

 

أغنية “سامح” مستوحاه من أغنية “داري” للفنان حمزة نمرة من تأليفي وغنائي…بإذن الله رسالتها تسعدكم وتلهمكم  
#المبدعة_الربانية

سامح سامح… يا قلبي حب وسامح
قلوب الناس حضنها مفتوح
وعادي عادي محدش في الدنيا دي
بيجرح ويقسى إلا إذا كان مجروح

ما تيجوا نطبطب على إللي قات
بالحب نحلي الذكريات 
الحزن يسيبنا من سكات
نفرح ونعيش

سامح سامح… يا قلبي حب وسامح
في آهة ليل القمر بيلوح
وعادي عادي ده حتى الطير الشادي
بقسوة يدبح لو من الألم مدبوح

ما تيجوا نطبطب على إللي قات
بالحب نحلي الذكريات 
الحزن يسيبنا من سكات
نفرح ونعيش
سامح سامح… يا قلبي حب وسامح
سامح سامح… يا قلبي حب وسامح
سامح سامح… يا قلبي حب وسامح
سامح سامح… يا قلبي حب وسامح

يمكنكم مشاهدة وتحميل ورشة “التربية الإيجابية” من موقع SlideShare #المبدعة_الربانية

حاليا محتوى ورشة “التربية الإيجابية” متوفر على موقع SlideShare  #المبدعة_الربانية

للتيسير على الجميع قمت بوضع ملف ورشة “التربية الإيجايبة” على موقع SlideShare يمكنكم مشاهدته وتحميله من خلال هذه الرابط:

https://www.slideshare.net/HebaHosny6/ss-114539102

محتويات الورشة:

* مفهوم التربية الإيجابية

* سكتش تربوي: الكباية اتكسرت!

* الأسس التي تقوم عليها التربية الإيجابية

* فوائد وثمرات التربية الإيجابية

* احتياجات الطفل منذ الميلاد حتى سن السادسة

* احتياجات الطفل من سبع إلى عشر سنوات

* القواعد العشرة للتربية الإيجابية الناجحة

* أهم استراتجيات التربية الإيجايبة

* أمثلة وتطبيقات عمليه من الحياة

أتشرف بمتابعتكم وفي انتظار تعليقاتكم…

أسألكم الدعاء  💚🙏
#المبدعة_الربانية

[

يمكنكم تحميل ورشة “سامح نفسك أولا” من على موقع SlideShare #المبدعة_الربانية

حاليا محتوى ورشة “سامح نفسك أولا” متوفر على موقع SlideShare  #المبدعة_الربانية

للتيسير على الجميع قمت بوضع ملف ورشة “سامح نفسك أولا على موقع SlideShare يمكنكم مشاهدته من خلال هذه الرابط: https://www.slideshare.net/HebaHosny6/ss-106323313

أتشرف بمتابعتكم وفي انتظار تعليقاتكم…

أسألكم الدعاء  💚🙏
#المبدعة_الربانية

ورشة “سامح نفسك أولا” روووعة التسامح العميييق from Heba Hosny </div

فيديو للبنات فقط (7) الحب شنكلة! تعملي إيه إذا وقعتي في “العشق الممنوع”؟ #المبدعة_الربانية

بمناسبة الفلانين حبيت أفكر كل البنات الحلوين إن الحب شنكلة! بس الخبر السعيد إن كل شناكل الكون متقدرش تقيدك أول ما تستوعبي إن الماضي سجن في ايديكي مفتاحه… رغم إن أنا مؤخرا اتفرجت على مسلسل “حكايات بنات” الجزء التاني على اليوتيوب وده كفيل إنه يدي لأي حد بيشوفه جرعة كآبة مكثفة 😦 بس أنا عملت المعجزة وطلعت من المسلسل بتأملات مفيدة ورغم إن عنوان الفيديو يوحي بالنكد الأزلي إلا إنك إن شاء الله هتلاقي فيه كلام إيجابي جدا وواقعي في نفس الوقت… ياللا يا بناتيت سيبوا كل إللي في إيديكم وتعالوا نقعد مع بعض قعدة حب وفضفضة ونجاوب مع بعض على أسئلة مهمة:

*  تعملي إيه إذا وقعتي في العشق الممنوع؟

* إزاي تقدري “تعذري!” إنسان ملك عليكي كل مشاعرك ورغم كده مبادلكيش نفس المشاعر وتخرجي من تجربتك معاه بأروع الدروس؟

* تأملات راااائعة في قصة زليخة مع سيدنا يوسف عليه السلام

*  إزاى تكوني حرة وسعيدة ومنفتحة؟

* إزاي تدركي إن الماضي سجن في ايديكي مفتاحه؟

  *سر السعادة والروقان يكمن في الثقة بالله وتوقع أن أي شىء (تعرفيه أو معترفيهوش) ممكن يحصل وإنك هتكوني سعيدة مهما يحصل…فتعيشي حياتك كلها تستقبلي مفاجأت ربك بشغف واستمتاع مصداقا لقوله تعالى: “رب إني لما أنزلت إلي من خير فقير”  صدق الله العظيم

* هنعيش مع بعض تأملات في معاني جميلة تضمنتها الآية الكريمة “ربنا هب لنا من أزواجنا وذرياتنا قرة أعين واجعلنا للمتقين إماما

وختاما هنتناول بالشرح والتفصيل الفرق الشااااسع بين أغنية “هتمناله الخير” وأغنية “أصعب حب“!!! وكمان هنعيش مع معاني عمييييقة تناولتها أغنية الفنان إسماعيل يس والفنان شكوكو “الحب بهدلة”  🙂

فيما يتعلق بروعة الانفتاح وانتظار المفاجأت الربانية بشغف واستمتاع ألفت الخاطرة الشعرية “شهرزاد وشهر طار” وبعتبرها من أروع ما كتبت…

إن شاء الله الفيديو والخاطرة الشعرية يعجبوكم ويلهموكم 🙂 في انتظار تعليقاتكم…

صور دمها خفيف (16) “أرجوك تفضفض لى وإوعى تنفض لى!” #حملة_اعمل_للهيافة_بلوك #المبدعة_الربانية

 “أرجوك تفضفض لى وإوعى تنفض لى” 🙂 ههههههههه دى آخر حلقة فى سلسلة التلوث السمعى إللى لازم يحصل لأى حد بيركب مواصلات عامة…الغنوة الراقية دى سمعتها وأنا راكبة “أوبر” لا تقوللى توك توك ولا ميكروباص! والحقيقة الغنوة دى رجعت لذاكرتى مجموعة من الأغانى الهابطة إللى شنفت أذناى فى المواصلات منها مثلا:

أولا أغانى البلطجة النسائية:

=================

انت دخلت التاريخ علشان عجبيتنى…إللى تبص لك “تتعور!!” علشان انت تخصنى” …إيه الرقة دى كلها؟

وواحدة حبت تعبر عن استقلاليتها فقالت له بكل ثقة: “إخبط راسك فى الحيط” فإذا كانت دى الكلمات إللى بيقولها الجنس “اللطيف”يبقى محدش يتفاجىء بأغانى البلطجة الرجالية زى “طلع سلاحك متكامل“!!!

ثانيا أغانى النكد الأزلى:

===============

الدنيا دوامة ومفيش عوامة” … عمييييقة بجد وزى ما انتوا ملاحظين تتسم أغانى النكد الأزلى بعبقرية فى السجع إللى ينقط زى أغنية “اتخرجت من كلية الأحزان ومعايا دكتوراه فى الآه!!” يا نكد السنين ده غير إللى ضلمها خالص من زمان وبلانا بتحفته الخالدة “جرحونى وقفلو الأجزخانات” …يا لهوووى!

ومن كتر ما النكد الأزلى مـأصل فى حياتنا عملت مقالة مخصوص كان عنوانها المعبر “يا عينى على المصريين فى الغنا الحزين!

تمام طيب إيه علاقة #حملة_اعمل_للهيافة_بلوك بكل ده؟

العلاقة إنى لما بروح البيت عندى اختيار إنى أسمع موسيقى وأغانى راقية تلهمنى وتثرينى وتغذى عشقى للجمال…اليوتيوب ملياااان ورينا يحفظ تراثنا الموسيقى الشرقي الأصيل … ساعات بعوز أسمع موسيقى خااالصة وساعتها بتكون تقاسيم العود والقانون وموسيقى عمر خيرت والموسيقى الكلاسيكية الغربية هى خير رفيق … أنا مش بطيق سماعات الودان خالص فمش حقدر أقاوم التلوث السمعى برة البيت بإنى أحط سماعات وأسمع إللى يناسبنى …إللى بيحب السماعات حيقدر يعمل للهيافة بلوك جوة البيت وبرة أنا للأسف معنديش رفاهية الاختيار ده وبالتالى كان لازم أعبر عن دهشتى بتعبيرات الوشوش لأنها أبلغ من أى كلام!

 

ولا كل لغات الدنيا تقدر عن إزبهلالى تعبر!!!

#حملة_اعمل_للهيافة_بلوك بدأتها #المبدعة_الربانية ووصلت إليك … لا تجعلها تقف عندك ..لن ينفجر حاسوبك إذا عملت لايك وشير…كتر شيييييرك وفى انتظار تعليقك…

للبنات فقط (7) – إزاى تحبى نفسك “بجد!” فى الفلانتين؟ 3 نصايح حيغيروا حياتك…

إزيكوا يا بناتيت 🙂

وحشتووووونى جدا دى أول مقالة بناتى أكتبها السنة دى!

كل فلانتين وانتوا سعداء ومتهنيين سواء كنتم سناجل أو مرتبطين …شفتوا السجع العبقرى ده 🙂  فى بنوتة سنجل دمها زى العسل كاتبة فى بروفايلها على تويتر “محجوزة لإبن المحظوظة” 🙂 هههههههههه طبعا وهو يطول؟

سنة 2012 عملت فيديو عنوانه ..”جبتى إيه لنفسك فى الفلانتين؟” واتكلمت فيه بالتفصيل على حاجات محددة تعمليها علشان تحبى نفسك بجد…

ياريت تشوفى الفيديو وتكتبى النقط المهمة إللى فيه لإنه فعلا ممكن يغير حياتك للأحسن بإذن الله…

النهارده حقولك 3 نقاط إضافية تقدرى تعلميهم لنفسك يوم الفلانتين علشان تحبى نفسك بشكل عملى … وإذا وقتك مسمحش إنك تعملييهم كلهم بكرة من فضلك اجتهدى إنك تنجزيهم فى القريب العاجل: 

1- تخيلى إن معاكى مصباح علاء الدين وإنك تقدرى تحققى أى حاجة بتتمنيها فى اللحظة دى …أكتبى كل أمانيكى من غير تردد ولا تفكير …وصدقى من جواكى إنها حتحقق بتوفيق الله…وافتكرى دائما المقولة الراااائعة لدكتور أحمد عمارة: “مع الله كل شىء ممكنفاهمة يا نفسى؟ كل شىء

 

2- جيبى ورقة كبييييييييرة و اكتبى عليها “طريقى لتحقيق أحلامى بتوفيق الله” و اكتبى فيها العادات إللى انتى محتاجة تنميها والمهارات إللى انتى محتاجة تكتسبيها  علشان تحققى أحلامك…

يعنى مثلا أنا اكتشفت إنى إذا ربنا وفقنى لتطبيق سنة البكور إنى أنام بدرى وأصحى بدرى ساعتها ممكن درجة إنجازى تكون أعلى بكتير وبالتالى حقدر أحقق طموحاتى بشكل أسرع والأهم إنى حكون طبقت سنة مؤكدة…فأنا بإذن الله بكرة حكتب إنى محتاجة أكتسب هذه العادة الرااائعة (وعلى فكرة الأجانب إللى ميعرفوش لا تهجد ولاقيام ليل بيصحوا الساعة 4 الصبح … أنا بتكلم عن الناجحين والمميزين منهم …العالم دول عقدونى فى عيشتى مسمين نفسهم the four clock club يعنى نادى الصحيان الساعة 4 صباحا!!!! … الأجانب عقدووونى يا خووواتى…عقبالى ياااا رب لما أنام بدرى وأصحى بدرى…على طريقة الفنانة زينات صدقى الله يرحمها هههههههههههههه)

 

الخلاصة إنك تكتبى كل العادات إللى محتاجة تنميها فى نفسك علشان تحققى أحلامك وتختارى أسهل أو أهم عادة منهم وتبدأى تخططى لتنفيذها من بكرة بإذن الله…مهم قوى التدرج فى الموضوع ده…سهلى الأمور على نفسك …خير الأعمال أدومها وإن قلت … اختارى عادة  واحدة عايزة تنميها أو مهارة واحدة عايزة تكتسبيها واشتغلى عليها…ولما فعلا تتحول لعادة بتعمليها بسهولة وانتظام إبدأى اشتغلى على حاجة تانية فى لستتك الرااائعة “طريقى لتحقيق أحلامى بتوفيق الله

وطبعا ممكن ياخدك الحماس كام يوم وبعد كده يحصل أى عوراض تخليكى مش مركزة فى أهدافك الحقيقية علشانن كده الصورة دى مهمة جدا إنك تقريها بتركيز و أهم جزئين فيها فى رأيى:

أولا إن مهم إنك تدركى إن النجاح محتاج مثابرة وإنك ممكن تواجهى عوائق فإذا حصلت تتقبليها ومتستسلميش وتصممى على الاستمرار فى طريقك

ثانيا إذا أخذت بالأسباب …تزلت عليك عطايا الوهاب 

%d9%85%d9%87%d8%a7%d8%b1%d8%a9-%d8%a7%d9%84%d8%a5%d8%b5%d8%b1%d8%a7%d8%b1-%d9%88%d8%a7%d9%84%d9%85%d8%ab%d8%a7%d8%a8%d8%b1%d8%a9

3- اكتبى لنفسك جواب غرامى ❤ عارفين أغنية “جواب” بتاعة عبد الحليم؟ حاجة كده علشان تنعنش نخاشيش أحاسيسك ومشاعرك وتخليكى حاسة إنك طايرة …

شفتوا التعبير الرقيق ده “تنعنش نخاشيش أحاسيسك” ههههههههه

وفى النهاية حنصحك من قلبى أروع نصيحة ممكن تسمعيها فى حياتك …حبى نفسك لإنها تستاهل إنها تتحب ❤ 

على فكرة أنا كتبت لك آخر جملة باللون الأخضر لإن الأخضر هو لون الحب الغير مشروط …لو عايزة تتغيرى للأحسن لازم تحبى نفسك وتتقبليها زى ما هى النهارده…تقبل الوضع الحالى لا يتنافى مع الطموح والرغبة فى التحسن…إذا حبينى نفسك النهارده دى حتكون خطوة مهمة للتغيير للأفضل بكرة بإذن الله … 

 

%d9%81%d9%84%d8%a7%d9%86%d8%aa%d9%8a%d9%86-2

 

%d9%81%d9%84%d8%a7%d9%86%d8%aa%d9%8a%d9%86-1

فى انتظار تعليقاتكم 🙂

حملة عالمية للتبرع أون لاين للاجئين السوريين فى أوروبا #شيييير #TheCompassionCollective

“مش معنى إنك متعرفش حاجة تبقى مش موجودة” أنا بقول الجملة دى كمقدمة مهمة إنى مسمعتش عن أى مبادرة عربية للتبرع للاجئين السوريين فى أوروبا …جايز يكون فى حملات وانا إللى مسعمتش عنها …

الحمد لله ربنا ووفقنى ولقيت حملة عالمية للتبرع أون لاين للاجئين السوريين فى أوروبا فإللى يحب يشارك له جزيل الثواب وطبعا الشييييييير مطلوب بشدة …

http://thecompassioncollective.org/

#TheCompassionCollective

TheCompassionCollective