Archive for the ‘للبنات فقط’ Category

أدعية وأذكار للرشاقة والجمال #المبدعة_الربانية #أنوثة_وجمال

فيديو للبنات فقط (7) الحب شنكلة! تعملي إيه إذا وقعتي في “العشق الممنوع”؟ #المبدعة_الربانية

بمناسبة الفلانين حبيت أفكر كل البنات الحلوين إن الحب شنكلة! بس الخبر السعيد إن كل شناكل الكون متقدرش تقيدك أول ما تستوعبي إن الماضي سجن في ايديكي مفتاحه… رغم إن أنا مؤخرا اتفرجت على مسلسل “حكايات بنات” الجزء التاني على اليوتيوب وده كفيل إنه يدي لأي حد بيشوفه جرعة كآبة مكثفة 😦 بس أنا عملت المعجزة وطلعت من المسلسل بتأملات مفيدة ورغم إن عنوان الفيديو يوحي بالنكد الأزلي إلا إنك إن شاء الله هتلاقي فيه كلام إيجابي جدا وواقعي في نفس الوقت… ياللا يا بناتيت سيبوا كل إللي في إيديكم وتعالوا نقعد مع بعض قعدة حب وفضفضة ونجاوب مع بعض على أسئلة مهمة:

*  تعملي إيه إذا وقعتي في العشق الممنوع؟

* إزاي تقدري “تعذري!” إنسان ملك عليكي كل مشاعرك ورغم كده مبادلكيش نفس المشاعر وتخرجي من تجربتك معاه بأروع الدروس؟

* تأملات راااائعة في قصة زليخة مع سيدنا يوسف عليه السلام

*  إزاى تكوني حرة وسعيدة ومنفتحة؟

* إزاي تدركي إن الماضي سجن في ايديكي مفتاحه؟

  *سر السعادة والروقان يكمن في الثقة بالله وتوقع أن أي شىء (تعرفيه أو معترفيهوش) ممكن يحصل وإنك هتكوني سعيدة مهما يحصل…فتعيشي حياتك كلها تستقبلي مفاجأت ربك بشغف واستمتاع مصداقا لقوله تعالى: “رب إني لما أنزلت إلي من خير فقير”  صدق الله العظيم

* هنعيش مع بعض تأملات في معاني جميلة تضمنتها الآية الكريمة “ربنا هب لنا من أزواجنا وذرياتنا قرة أعين واجعلنا للمتقين إماما

وختاما هنتناول بالشرح والتفصيل الفرق الشااااسع بين أغنية “هتمناله الخير” وأغنية “أصعب حب“!!! وكمان هنعيش مع معاني عمييييقة تناولتها أغنية الفنان إسماعيل يس والفنان شكوكو “الحب بهدلة”  🙂

فيما يتعلق بروعة الانفتاح وانتظار المفاجأت الربانية بشغف واستمتاع ألفت الخاطرة الشعرية “شهرزاد وشهر طار” وبعتبرها من أروع ما كتبت…

إن شاء الله الفيديو والخاطرة الشعرية يعجبوكم ويلهموكم 🙂 في انتظار تعليقاتكم…

للبنات فقط (8) أروع بوستات نسائية شفتها فى رمضان “دورت عليكى فى الجنة” و “سعاد الواعية وسعاد مشاكل” (منقول) #عيد_سعيد #المبدعة_الربانية

إزيكن يا بناتيت 🙂 كل سنة وأنتن طيبات وربنا يجعل كل أيامكن سعادة وأعياد بإذن الله. وبمناسبة انتهاء شهر مضان الكريم حبيت أشرككن معايا فى أروع بوستات نسائية شفتها فى رمضان…يا رب تعجبكن وفى انتظار تعليقاتكن 🙂 #المبدعة_الربانية

دورت عليكى فى الجنة (منقول) 

أروع ما فى البوست ده إنه بيتخيل فعلا حياة المؤمنين فى الجنة …ربنا يجعلنا جميعا من أهلها …اللهم آميين…إقرى البوست ده بتلذذ واستمتاع أكتر من مرة وأطلقى لخيالك العنان وبإذن الله تذوقى حلاوة جنتى الدنيا والآخرة … اللهم آمين ولى بمثله 🙂
ايه يا بنتي انا لفيت عليكي الجنة كلها مش لاقياكي .. انتي ايه اللي جابك هنا 😃 !
★ اصلي عرفت ان هنا بيت السيدة فاطمه بنت النبي .. فجيت اقعد قصاده لحد ما تطلع عشان نفسي اوووي اشوفها واتكلم معاها 😍 !
★ الله 😍😍 طب خديني جنبك 😃🙈
★ تعالي اتفضلي ✋😃 .. مش كنتي جبتي بقية الشلة معاكي .. احنا اتفقنا النهاردة نتمني امنيه واحدة ونشترك فيها سوا 😍
ها فكرتي هنتمني ايه ؟! 😍
★ بصراحه اول يوم في الجنة ده مخليني مش عارفة اختار ايه ولا ايه 😍😍 !
★ طب ايه رأيك نتمني انهار من الشيكولاته وشلالات من الايس كريم ونعوم فيها 😂❤✋ ؟!
★ اه يا طفسه انتي همك علي بطنك علطول .. لا لا احنا نتمني فساتين جمييييلة قصيرة وطويلة ونكون اجمل من اجمل حور عين ونفضل نقيس في الفساتين ونتصور ونعمل شعرنا ونهيص 😍😃 !
★ امممم فكرة بردوا .. اصلا اليوم مبيخلصش .. احنا مش هنبقي عارفين نعمل ايه ولا ايه 😍😍 !
★ ايه ده .. الحقي الحقي .. البنات صحابنا جاين يجروا علينا من هناك 😂 تفتكري زعلوا اننا طنشناهم ✋😃 ؟!
★ ايه يا هانم منك ليها انتوا ايه اللي مقعدكوا هنا .. مش اتفقنا النهاردة هنقضيه طيران في سماء الجنه ؟! ✋
★ ايوه يا بنتي ان شاء الله هنعمل ده كله بس اختك كانت منتظرة السيدة فاطمه الزهراء تشوفها وتسلم عليها وبعدين نروح 😍😍
★ يا بنتي السيدة فاطمه عند النبي في وسط الجنه واهل الجنه كلهم قاعدين يسمعوا القرءآن بصوت الصحابة وزمان ابو بكر بيقرأ دلوقتي واحنا جينا نندهكم 😍😍
★ الله الله الله 😍😍 طب احنا جايين اهو يلا جررررري 😃😃
★ جري ايه يا بنتي .. احنا نتمني ربنا يرسلنا طيور جميلة ملونه تطير بينا لحد ما نوصل 😍😍 احنا في الجنه يا بنااااات انتوا نسيتوا ؟! 😃
★ اييييه ده .. بالسرعه دي !! ده مفيش لحظة بين الامنيه والتحقيق ❤❤ بس الطائر ده جميل اوي .. ايه الجمال ده انا مش عايزة انزل 😃✋
★ وصلنا يا بنات .. امسكوا ايدي كويس عشان الدنيا زحام .. هندخل وسط الزحام عشان نقعد قريب من النبي ❤ 🌚
يلا امسكوا ايد بعض ونقول ١..٢…٣… وندخل .. يلا بينا 😉❤
★ ايييه ده .. الحقوا يا بنات .. مش دي ماما ؟! انتي جيتي قبلي يا ماما ؟! بقي كده بردوا يا ست الحبايب 😃❤ ؟!
★ الله ! ده الامهات كلها هنا ..ماشاء الله .. منورين 😍😍
خدونا جنبكم بقي بس قعدونا احنا جنب النبي .. انتوا الكبار بقي خلوها عليكم 😂✋
★ كبار مين دول . احنا في نفس الأعمار والشكل كمان 😃 ولا ايه يا حاجة ماتردي علي بنتك 😂 ؟!
★ علي فكرة انتوا لازم تركزوا لان النبي عليه الصلاة والسلام هيقرأ قرءاااااااان دلوووووقتي 😍😍😍😍😍😍
★ الله !! 💖😍 هنسمع قرءآن بصوت النبي 🌚❤ !
★ انا في حياتي ما كنتش اتصور ان فيه صوت بالجمال ده :’) :’)
الله اكبر الله اكبر ❤❤❤
★ ايه النور اللي سطع فجأة ده .. استنوا كده ✋😃
★ لا اله الا الله .. ربنا يا ماما .. ربنا .. ربنا رزقنا بالنظر لوجهة يا بنات ❤❤❤ :””)))
★ ياااااارب يااااارب رضينا ياااارب .. ❤❤
ياااارب لم نذق بؤساً قط ❤❤
يااااااااااارب لك الحمد حمداً كثيراً طيباً مباركاً فيه ❤❤❤
★ انا مكنتش متصورة ان النظر لوجه الله الكريم باللذة دي .. انا حاسة ان مفيش اي متعة في الدنيا تضاهيه .. انا روحي كلها مليانه فرح يكفي لحد الأبد ومايخلصش 🙂 ❤
★ بس عارفين .. احلي حاحة في الجنه اننا #صحبة فيها ❤🌸
وماسبناش بعض في اي #عبادة_في_الدنيا فربنا رزقنا بالجنه سوا عشان مانسبش بعض بعض في اي متعة فيها ❤❤
★ ايه ده احنا نسينا البنوته الفلانيه ؟! دي كانت بنوته طيبه بردوا ؟! حد فيكم شافها ؟! 😔
★ لا … طب ما تيجوا نسأل ربنا عنها ❤ 😊 !
وبمجرد سؤالهم عنها لقيوها جنبهم …. وقالتلهم ربنا ادخلني الجنه بفضل اني كنت رفيقتكم .. كنتم صحبة صالحه فربنا سامحني وسؤالكم عني شفعلي ❤❤
#الحمد_لله_اني_كنت_رفيقتكم_في_الدنيا ❤
ابعتيها لصديقاتك اللي مش هتدخلي الجنة غير معاهم

سعاد الواعية وسعاد مشاكل (منقول)

ياريت وانتى بتقرى البوست ركزى فى إنك تطبيقه على كل جوانب حياتك …سعاد ركزت على ثمرات إخلاص النية لله فى حياة الزوجة وأد إيه حتكون “حرة بالله” ومبتهجة وسعيدة دايما ومستغنية بالله فلا تنتظر الشكر ولا الثناء من أى إنسان حتى أقرب الأقربين …إزاى تكونىى حرة بالله فى كل جوانب حياتك؟ شوفى سعاد الواعية بتعمل إيه وقلديها…
 
سعاد الواعية وسعاد مشاكل 👇👇
 
💚🌙في المطبخ🌙💚
 
في أول يوم من نهار رمضان ورحلة تجهيز وجبة الإفطار الشهية للأسرة الكريمة
 
⭕️سعاد مشاكل ⭕️
 
🔹المطبخ غير مرتب. ..صحون كتيير في حوض المطبخ
🔹لم تحدد ماذا ستطبخ. ..لم تجهز شئ من قبل
🔹ليس عندها نية لما تفعله هي فقط تطبخ وتجهز الفطور
🔹ساخطة من الحر والعطش والتعب مع الصيام
🔹في حديث سلبي طول الوقت مع النفس تركيز على التعب والمشاكل ….هما ياكلوا على الجاهز. .حوض المواعيين مش بيخلص. ..الحر….
🔹أقصى امنيتها أن تنهي شغل المطبخ الممل المتعب وتخلص الطبخ بأي طريقة
🔹عصبية. .متوترة. .مضغوطة …تمتن بتعبها على زوجها وتنتظر منه قصيدة الشكر والتقدير وتحزن وتعصب اكتر إذا لم يفعل. ..وغالبا لن يفعل! !!
 
 
💚سعاد الواعية💚
 
💟💞قبل أن تدخل مطبخها تخلص النية لله وتكثر من النوايا الطيبة. .إفطار صائم. .إدخال السرور على قلب أسرتها. .ثواب إطعام الطعام. …..
 
💞💟لا تدخل المطبخ إلا وقد أعدت محاضرة مفيدة تسمعها اوتشغيل اذاعة القرآن الكريم تضاعف بها استثمار وقتها وحسناتها أثناء العمل في المطبخ
 
💟💞مطبخها نظيف مريح مرتب وحددت قائمة مسبقة بكل الأصناف ومن قبل عملت تجهيز مسبق لأغلبها لتوفر وقتها ومجهودها في الصيام
 
💟💞مستمتعة. ..هادئة. .مبدعة. ..تشكر الله طول الوقت وتتأمل فضله العظيم في أن وفر كل هذه الخيرات بين يديها وأن أعطاها الصحة للعمل وأن أعطاها أسرة جميلة تتفنن في اسعادها بأشهى الأكلات
 
💟💞تحسن وتتقن العمل وعندها نية أنها تعمل ما يحبه الله وهو الاتقان حتى ولو كان في الطبخ ! وتعلم أنها في عبادة لله بهذا العمل لا تقل ثوابا عن باقي الطاعات. .
 
💟💞مبتسمة. ..مرحة. .سعيدة. .لا تنتظر اي مقابل أو عبارات مدح ولا تتلهف عليها فهي في الأساس حددت وجهتها هي إخلاص العمل لله. …فيأتيها التوفيق والمدح والامتنان وكل ما تتمناه. ..
 
 
أي سعاد فيهما. …👈أنتي👉
 
#اختاري
 
#رمضان_موكب_النور
#سعاد

كلمتين وبس لكل بنت بمناسبة #اليوم_العالمى_للمرأة “كونى حرة” و “اصطادى حلمك”…#المبدعة_الربانية

8 مارس هو اليوم العالمى للمرأة كل سنة وكل إمرأة على وجه الأرض حرة وسعيدة ومحققة ذاتها …

عندى كلمتين وبس لكل إمرأة “كونى حرة” و “اصطادى حلمك

كونى حرة

مهما كانت ظروفك فانت تقدرى تكونى حرة باختيارك وإرادتك الكاملة.. الحرية اختيار … حتى لو كنت مسجونة ورا أسوار … سواء كانت أسوار حقيقية أو كانت أسوار العرف الذكورى والتقاليد المتخلفة …انتى تقدرى تصنعنى حريتك بإيدك …

مين يقدر يمنعك من الحلم؟ مين يقدر يلجَّم حصان خيالك؟ … حريتك اختيارك مهما كانت ظروفك…

ليه أنا طلبت منك تكونى حرة؟

لإن الحرية هى الطريق الوحيدة للسعادة الحقيقية…

و السعادة تحقق بالشجاعة وقمة الشجاعة هى الصدق مع النفس..

خلينى أديكو مثل عملى …واحدة صاحبتى متخصصة فى علم اتفس حكيت لى إنها تعرفت على حالة بنت كانت بتلبس الحجاب علشان خايفة من التحرش لكنها كانت ضعيفة من جواها … وبالتالى حجاب جسدها مقدرش يحجب ضعفها فكانت فريسة سائغة لكل من أراد التحرش بها لغاية ما استجمعت شجاعتها فى لحظة تمرد اتحررت فيها من ضعفها وخدت موقف حاسم من أحد المتحرشين بها…من ساعتها تحول ضعفها لقوة تردع أى حد يفكر مجرد التفكير إنه يسىء لها.

عارفين البنت دى عملت إيه أول ما بقيت قوية؟ خعلت الحجاب…

رغم إن أنا محجبة ومعتزة بحجابى إلا إنى قلت لصحابتى إنى معجبة جدا بالنبت دى…عارفين ليه؟ ولإنها كانت صادقة مع نفسها وفاهمة إنها كانت لابسة الحجاب لأسباب غلط …فخدت قرار حر جرىء إنها تقلعه…البنت دى إذا قررت تتحجب فى المستقبل حتكون خدت القرار لأسباب صح…

ربنا خلقنا أحرار ورغم إنه أرسل رسوله عليه السلام لهداية الناس فقد وجه لرسوله الكريم استفهام استنكارى فى قوله تعالى: “…أَفَأَنتَ تُكْرِهُ النَّاسَ حَتَّىٰ يَكُونُوا مُؤْمِنِينَ– يونس 99

كونى حرة” فى حياتك وفى قراراتك وتحملى مسؤولية قراراتك …وكونى شجاعة وصادقة مع نفسك فى إنك تصلحى مسارك إذا لقيتى نفسك ماشية فى طريق مش حيسعدك…المهم إنك تاخدى قرارك بحرية.

وعلشان تكونى حرة لازم تكونى حقيقية…كونى حقيقية…كونى نفسك…

 

رحلتى المضنية فى البحث عن الحرية خلتنى أدركت إن التحرر الحقيقى هو التحرر الروحانى .. أن أكون حرة بالله ولله وفى الله…ربنا بيحبنا حب غير مشروط…وهو خالقنا والأعلم بنا…فأنا مش بعتبر أوامره ونواهيه قيود ولكن بعتبرها حب ورعاية وهداية…

أحرص على طاعة ربى بحب قدر الاستطاعة

فإذا كلت همتى أو قصرت فى الطاعة

أستغفر ربى الودود بيقين وضراعة

فيستجيب المجيب ويغفر الغفور

ويرحم الرحمن فى لحظة وضّاءة

فأعود لأحلق فى سماء الحرية

وقد زكت نفسى وصارت توّاقة

لنور ربى يملأ النفس إشراقة

أنا مكنتش شايفة المعانى المضيئة طول حياتى لكنى كنت صادقة فى البحث عن الحرية…فلو انتى كمان اخترتى تكونى حرة مهما كانت ظروفك أكيد رحلتك حتاخدك لأروع مكان…إتفقنا؟ 🙂

إصطادى حلمك

حياة الإنسان بيكون لها معنى جميل لما يكون عارف حلمه ورسالته فى الحياة ويسعى لتحقيقه…

أنا اخترت إن رسالتى فى الحياة تكون: “استخدام القوة الشافية للفن فى إثراء حياتى وحياة الآخرين.

وقررت إن ده حلمى الكبير وعلشان أحقق حلمى لازم أصطاده…

ألفت غنوة تعبر عن رسالتى مستوحاه من تتر مسلسل “خاتم سليمان” تأليف الكاتب الروحانى محمد الحناوى

عاشقة سارحة فى الملكوت
برسم على أشجار وبيوت
شمعة تنور ليل حيران
كلمة تصحى أمل بيموت

قلبى بيبرق زى الماس
ولا أملك غير الإحساس
ححفر فى الصخر بأحلامى
وحفرح قلوب الناس

بايعة قلبى للإللى يحبه
ومعنديش فى الحب شروط
عاشقة سارحة فى الملكوت
برسم على أشجار وبيوت

طير فى السما ومليش عنوان

وفى إيدى خاتم سيلمان
أنا عايزة بالضحكة أغير
وأطيب كل الأحزان

عايشة الحلم كإنه حقيقة
حاضناه فى قلبى فى كل دقيقة
الصحرا حخضرها بفنى
بقلب وفطرة طفلة بريئة

حجرى أوام وأسبق أحلامى
والكون حيغنى ألحانى
قلمى وريشتى شراع فى سفينتى
حوصل شطى بنور الله
عاشقة سارحة فى الملكوت
برسم على أشجار وبيوت
شمعة تنور ليل حيران
كلمة تصحى أمل بيموت

من كتر حبى فى الغنوة دى مكنتش قادرة أشيل لحنها من دماغى لدرجة دى تانى مرة أغير كلمات أغنية تتر مسلسل “خاتم سليمان”. المرة الأولى ألفت أغنية بتتكلم عن الإدمان إسمها “تايه ضايع” وهى موجودة فى كتابى “إشراقة روح 1” فى فصل بعنوان “هل عقبتك إدمانك؟”

مطلع أغنية “تايه ضايع”:

تايه ضايع فى الدخان

يسدور فى حطام بركان

على شمعة ينور بيها وهمهه

على سجنه إللى ملوش سجان…إضغطوا على الصورة أو اللينك علشان تحملوا الكتاب وتعرفوا بقية الأغنية…

 

لينك تحميل كتاب “إشراقة روح 1”:

 http://kotobna.net/Book/Details?bookID=816

سلسلة كتب “إشراقة روح” هى أول سلسلة لكتب تفاعلية توظف الكاريكاتير والشعر والتنمية البشرية فى التعمق فى فهم ودارسة آيات القرآن الكريم. وهذا الكتاب هو الأول فى هذه السلسلة: إشراقة روح (1) – تأملات فى قوله تعالىفلا اقتحم العقبة” – نحو علاقة أعمق بالقرآن الكريم.

كتاب-إشراقة-روح-هبة-الله-حسنى-صورة

للبنات فقط (7) – إزاى تحبى نفسك “بجد!” فى الفلانتين؟ 3 نصايح حيغيروا حياتك…

إزيكوا يا بناتيت 🙂

وحشتووووونى جدا دى أول مقالة بناتى أكتبها السنة دى!

كل فلانتين وانتوا سعداء ومتهنيين سواء كنتم سناجل أو مرتبطين …شفتوا السجع العبقرى ده 🙂  فى بنوتة سنجل دمها زى العسل كاتبة فى بروفايلها على تويتر “محجوزة لإبن المحظوظة” 🙂 هههههههههه طبعا وهو يطول؟

سنة 2012 عملت فيديو عنوانه ..”جبتى إيه لنفسك فى الفلانتين؟” واتكلمت فيه بالتفصيل على حاجات محددة تعمليها علشان تحبى نفسك بجد…

ياريت تشوفى الفيديو وتكتبى النقط المهمة إللى فيه لإنه فعلا ممكن يغير حياتك للأحسن بإذن الله…

النهارده حقولك 3 نقاط إضافية تقدرى تعلميهم لنفسك يوم الفلانتين علشان تحبى نفسك بشكل عملى … وإذا وقتك مسمحش إنك تعملييهم كلهم بكرة من فضلك اجتهدى إنك تنجزيهم فى القريب العاجل: 

1- تخيلى إن معاكى مصباح علاء الدين وإنك تقدرى تحققى أى حاجة بتتمنيها فى اللحظة دى …أكتبى كل أمانيكى من غير تردد ولا تفكير …وصدقى من جواكى إنها حتحقق بتوفيق الله…وافتكرى دائما المقولة الراااائعة لدكتور أحمد عمارة: “مع الله كل شىء ممكنفاهمة يا نفسى؟ كل شىء

 

2- جيبى ورقة كبييييييييرة و اكتبى عليها “طريقى لتحقيق أحلامى بتوفيق الله” و اكتبى فيها العادات إللى انتى محتاجة تنميها والمهارات إللى انتى محتاجة تكتسبيها  علشان تحققى أحلامك…

يعنى مثلا أنا اكتشفت إنى إذا ربنا وفقنى لتطبيق سنة البكور إنى أنام بدرى وأصحى بدرى ساعتها ممكن درجة إنجازى تكون أعلى بكتير وبالتالى حقدر أحقق طموحاتى بشكل أسرع والأهم إنى حكون طبقت سنة مؤكدة…فأنا بإذن الله بكرة حكتب إنى محتاجة أكتسب هذه العادة الرااائعة (وعلى فكرة الأجانب إللى ميعرفوش لا تهجد ولاقيام ليل بيصحوا الساعة 4 الصبح … أنا بتكلم عن الناجحين والمميزين منهم …العالم دول عقدونى فى عيشتى مسمين نفسهم the four clock club يعنى نادى الصحيان الساعة 4 صباحا!!!! … الأجانب عقدووونى يا خووواتى…عقبالى ياااا رب لما أنام بدرى وأصحى بدرى…على طريقة الفنانة زينات صدقى الله يرحمها هههههههههههههه)

 

الخلاصة إنك تكتبى كل العادات إللى محتاجة تنميها فى نفسك علشان تحققى أحلامك وتختارى أسهل أو أهم عادة منهم وتبدأى تخططى لتنفيذها من بكرة بإذن الله…مهم قوى التدرج فى الموضوع ده…سهلى الأمور على نفسك …خير الأعمال أدومها وإن قلت … اختارى عادة  واحدة عايزة تنميها أو مهارة واحدة عايزة تكتسبيها واشتغلى عليها…ولما فعلا تتحول لعادة بتعمليها بسهولة وانتظام إبدأى اشتغلى على حاجة تانية فى لستتك الرااائعة “طريقى لتحقيق أحلامى بتوفيق الله

وطبعا ممكن ياخدك الحماس كام يوم وبعد كده يحصل أى عوراض تخليكى مش مركزة فى أهدافك الحقيقية علشانن كده الصورة دى مهمة جدا إنك تقريها بتركيز و أهم جزئين فيها فى رأيى:

أولا إن مهم إنك تدركى إن النجاح محتاج مثابرة وإنك ممكن تواجهى عوائق فإذا حصلت تتقبليها ومتستسلميش وتصممى على الاستمرار فى طريقك

ثانيا إذا أخذت بالأسباب …تزلت عليك عطايا الوهاب 

%d9%85%d9%87%d8%a7%d8%b1%d8%a9-%d8%a7%d9%84%d8%a5%d8%b5%d8%b1%d8%a7%d8%b1-%d9%88%d8%a7%d9%84%d9%85%d8%ab%d8%a7%d8%a8%d8%b1%d8%a9

3- اكتبى لنفسك جواب غرامى ❤ عارفين أغنية “جواب” بتاعة عبد الحليم؟ حاجة كده علشان تنعنش نخاشيش أحاسيسك ومشاعرك وتخليكى حاسة إنك طايرة …

شفتوا التعبير الرقيق ده “تنعنش نخاشيش أحاسيسك” ههههههههه

وفى النهاية حنصحك من قلبى أروع نصيحة ممكن تسمعيها فى حياتك …حبى نفسك لإنها تستاهل إنها تتحب ❤ 

على فكرة أنا كتبت لك آخر جملة باللون الأخضر لإن الأخضر هو لون الحب الغير مشروط …لو عايزة تتغيرى للأحسن لازم تحبى نفسك وتتقبليها زى ما هى النهارده…تقبل الوضع الحالى لا يتنافى مع الطموح والرغبة فى التحسن…إذا حبينى نفسك النهارده دى حتكون خطوة مهمة للتغيير للأفضل بكرة بإذن الله … 

 

%d9%81%d9%84%d8%a7%d9%86%d8%aa%d9%8a%d9%86-2

 

%d9%81%d9%84%d8%a7%d9%86%d8%aa%d9%8a%d9%86-1

فى انتظار تعليقاتكم 🙂

فيديو للبنات فقط (6) “أرجل” سندوتش فى مصر! يا حومتشى على مقاييس الرجولة!!! #هع

 

من حسن حظنا يا بناتيت إن لما كنتاكى طلبت معاهم يعملوا منتج مضر قرروا يتجاهلوا كل بنات ونساء مصر ويعملوا سندوتش يسموه “أرجل!!” سندوتش فى مصر!!! يا حومتشى على مقاييس الرجولة لما  يكون معناها إنهم يبدلوا العيش بفراخ محمرة فى السندوتش وكإن المحمر مش مضر كفاية فيحطوا شوية حشو مضر فى النص!! على رأى الفنان مظهر أبو النجا يا حلااااااوة هههههههههههههه عموما يا بناتيت سيبكم من الهرتلة دى كويس قوى إن كنتاكى طنشتنا واضح إنهم حريصين على جمال بشرتنا…

هل تعلمى يا سيدتى الجميلة إن أكل المحمر بالإضافة لكل بلاويه الزرقا مضر بالبشرة؟ وبالتالى سواء كنتى محتاجة تخسى أو وزنك طبيعى أو محتاجة وزنك يزيد فى جميع الأحوال البعد عن المحمر غنيمة… نشكر القائمين على التسويق فى شركة كنتاكى على ذكائهم النادر وحرصهم على جمال بشرتنا 🙂

ومن كام شهر شفنا الهرى إللى شيبسى عملوه فى حملة “للرجالة وبس” إللى كانت جايبة “رجالة!” بيهربوا من مسؤولياتهم وقاعدين يلعبوا ولما يجيى حد من أهلهم يفكروهم بمسوؤلياتهم  يقوموا يخلوهم يختفوا بقوة الشيبسى السحرية ونسمع فى الخلفية صوت بيقول: “شيبسى …للرجالة وبس” …حوش حوش عالمرجلة إللى بتشر!!!

كنت أتمنى من صميم معاميق قلبى إن كوكاكولا تتعدى من غباء كنتاكى وشيبسى فى التسويق إنما للأسف الأمانة تقتضى إنى أعترف إن كوكاكولا رغم سؤ منتجهم من أقوى ال   brands فى العالم ومتميزين جدا فى التسويق وحملة ال  emotions الأخيرة إللى عملوها كانت ناجحة جدا 😦  يا خسارة إهىء إهىء

 

الكوميديا السوداء فعلا إن كوكاكولا تكون راعى رسمى لماتشات الكورة بعد ما ثبت إنها تسبب هشاشة عظام بالإضافة لكل بلاويها الزرقا وأضرارها الخطيرة!!! اللعيبة لو شربوا كوكاكولا حيخسروا ليقاتهم… إيه زمن العجايب ده؟!

بما إننا بنتكلم على الرياضة فعايزة أقول نصيحة سمعتها من دكتورة متخصصة إن كل البنات محتاجين يلعبوا رياضة سواء كانت عايزة تخس أو وزنها يزيد أو كان وزنها طبيعى …وأكدت إن الرياضة بتفتح نفس البنت إللى محتاجة وزنها يزيد  يبقى كلنا لازم نلعب رياضة بغض النظر عن الوزن … وحتى لو كنتى محتاجة وزنك يزيد ياريت متشربيش كوكاكولا ولا أى نوع مياة غازية لإنها بتسبب هشاشة العظام!!!!

وفى النهاية يا بناتيت رغم العجب إللى بنشوفه فى إعلانات التلفزيون إحنا فى النهاية حرين ومحدش بيضربنا على إيدنا علشان نشترى حاجة تضرنا…حبى نفسك واختارى إللى ينفعك…أنا فى لبسى اخترت أوكسى ههههههههههههههه

ويا رب كل المنتجات المضرة تتجاهل النساء دايما يا رب …يارب يا أختشى ياااا رب! يا حومتشى على مقاييس الرجولة!!!  

فى انتظار تعليقاتكم …

بلاى ليست مجموعة فيديوهات للبنات فقط:

لفات طرح طويلة مبتكرة (9) – كوكتيلك :) جربى الطرح المثلثة مع الطرح الطويلة

إزيكوا بناتيت 🙂

ده ال  look العبقرى إللى أنا رحت بيه #مهرجان_نون_النسوة النهارده. إحساس رائع لما تكونى عاملة حاجة محدش غيرك عاملها فلو كنتى من عشاق التميز تبقى فى المكان الصحيح 🙂

هبة-الله-حسنى-كاتبة-مهرجان-نون-النسوة-2015

و دى أول مرة أجرب ألبس طرح مثلثلة فوق طرحة طويلة. طبعا لو حاولتى ترجعى الطرحة المثلثة لورا أو تعلميها spanish  حيكون شكلها غريب مع الطرحة الطويلة يبقى الحل إنك تبتكرى ربطة لوزعية زى إللى إنتوا شايفينها 🙂

فيديو للبنات فقط (5) – إيه أحسن حاجة تعمليها لو حصل لك تحرش؟

فيديو للبنات فقط (4) مقارنة صااااادمة بين العوانس و المطلقات فى المجتمع الشرقى! #عجب

مقالات مرتبطة بموضوع الفيديو

* ما أروع أن تكونى المرأة الوحيدة فى الوجود فى عين حبيبك – قصص حب مؤثرة من الحياة
https://ba7ebmasrbegad.wordpress.com/2011/04/12/love-stories-from-life-women-rights-islam/

* نداء لكل بنت “مسروعة” مقبلة على الجواز: “إحذرى” إقبلى هذه النوعية من العرسان!!!….
https://ba7ebmasrbegad.wordpress.com/2011/05/12/%D9%86%D8%AF%D8%A7%D8%A1-%D9%84%D9%83%D9%84-%D8%A8%D9%86%D8%AA-%D9%85%D8%B3%D8%B1%D9%88%D8%B9%D8%A9-%D8%B9%D9%84%D9%89-%D8%A7%D9%84%D8%AC%D9%88%D8%A7%D8%B2-%D8%A5%D8%AD%D8%B0%D8%B1%D9%89-%D9%87/

لينك بلاى ليست مجموعة فيديوهات للبنات فقط “كونى رااائعة” :

لفات طرح طويلة مبتكرة (8) جربتى “فصل القوات” مع المشجر؟

إزيكوا يا بناتيت 🙂

و حشتنى قوووى المقالات البناتى. النهارده حكلمكم عن أهمية “فصل القوات” لما تلبسى أكتر من حاجة مشجرة…
long-scraf-1

 

long-scraf-2

 

زى ما إنتوا شايفن أنا لابسة بلوزة مشجرة أسود و أبيض و مبينة حتة من إيشارب أسود فى أيبض بتشجيرة مختلفة. إللى مخلى الشكل النهائى حلو إنى فاصلة الإيشارب عن البلوزة بإيشارب روز فكده مش باين إن نقشتهم مختلفة  و ده إللى أقصد بفصل القوات 🙂

و علشان تقدروا قيمة فصل القوات ححط لكم الإيشارب و البلوزة جنب بعض علشان تشوفوا إن مكانش ينفع ألبسهم سوا من غير ما أفصلهم بلون تانى.

scraf-3

مبدأ فصل القوات بينفع مع تشجيرات كتير خصوصا التايجر يعنى لو عندك إيشارب تايجر و بلوزة تايجر مختلفة عنه فى النقشة إفصلى بينهم بإيشارب سادة و حتكونى سعييييدة جدا بالنتيجة ما رأيكم دام فضلكم؟ 🙂

 

فيديو للبنات فقط (3) – خلى 2014 سنتك…تألقى

لينك بلاى ليست سلسلة فيديوهاتللبنات فقط – كونى رااااائعة

فى إنتظار تعليقاتكم 🙂

البؤساااء! معاناتى فى شراء طقم سورايه و توارد خواطر عجيييييب مع د.منال عمر!

أخدت بلا فخر دور البطولة المطلقة فى مسرحية  les miserables (البؤساااااء!) و أنا بعافر علشان ألاقى طقم سورايه خالى من مهرجانات الترتر و يكون واسع طبعا لكن ميكونش واسع لدرجة إن أى واحدة عادية لو لبسته تبان حامل فى الشهر ال999!!!  الحمد لله كنت قربت أأقول “ما نابنى إلا تضييع وقيتا و فأفأة قدميا!” لكن ربنا كرمنى قبل الفرح بأقل من 48 ساعة و جبت الطقم إللى فى الصور. هو مش طقم أساسا لكن الحمد لله إن البلوزة و الجيب كانوا فى نفس المحل و أنا وفقنهم على بعض….الله الله عالخبرة 🙂 ههههههههههههههههههه

20131107_223854

الأول كنت ناوية أأجر لقيت اذواق فساتين السورايه الإيجار وحشة و أسعارها أوحش!! فقررت أجيب جاهز و أنا سعيدة جدا الحمد لله “بالطقم” إللى جبته لإن البلوزة موديلاها واسع زى ما تكون شال فمش محتاجة طرحة طويلة. و أجمل حاجة إن الطقم نفسه إنه هادى جدا لكن الإيشارب و الجزمة هما إللى نطقوه  و خلوه مناسب لفرح فكده مش حيتركن فى الدولاب و حقدر أروح بيه زيارات و مناسبات تانية. إحساس الإنجاز بعد فأفأة الرجلين جميييييييييييييييل قوى يا نتيتة 🙂

نصيحتى  المخلصة لكم بعد تجربتى المريرة أولا إنك متنزليش قبل الفرح بفترة بسيطة تدورى على سواريهات خصوصا  لما يكون ذوقك مش هو الذوق الغالب فى السوق! و ياريت تريحى دماغك و تفصلى لو ينفع و طبعا يستحسن تجيبى طقم مش مأفور فى لمعته عشان تقدرى تستعمليه فى مناسبات تانية و سيبى اللعب على الإكسسورات و الإيشارب 🙂

20131107_222308

ده فيما يتعلق بالفستان أما د.منال  عمر فحصل بينى و بيتها توراد خواطر عجييييب…

طول عمرى بروح أفراح مودرن و معروف إن دايما أهل العروسة بيكونوا قاعدين فى ناحية و أهل العريس فى ناحية. لأول مرة فى حياتى المرة دى آخد بالى من الموضوع و أحس إننا كده منعزلين رغم إن الفرح إشهار نسب بين اسرتين فمن الطبيعى إنهم يكونوا عايزين يعرفوا بعض لكن تقسيم الكراسى كده بيخلى كل “فريق!” يروح من غير ما يتعرف على أى حد جديد 😦

كل الأفكار دى مرت بخاطرى و أنا قاعدة وسط أهلى إللى بعرفهم و كنت حابة أتعرف على أهل العروسة و جه فى بالى إن ياريت معازيم الأفراح يعملوا  Ice Breakers  و دى ألعاب مصممة إن ناس بيتقابلوا فى مكان لأول مرة يقدروا يتعرفوا بشكل حميم و بطريقة تلقائية و لذيذة و مفيهاش إحراج. فسألت نفسى ليه منعملش كده و بدل ما أنا قاعدة وسط أهلى إللى بشوفهم كتير بدل ما أكون صداقات جديدة؟!

الفرح كان يوم الخميس 7 نوفمبر فلما إتفرجت على لقاء د.منال عمر تانى يوم مع الإعلامى محمود سعد فى حلقة 8 نوفمبر لقيتها بتناقش نفس الموضوع و بتتكلم عن الحميمية الإجتماعية و بتنتقد التلقيد المستورد فى أفراحنا إن أهل العروسة يقعدوا فى ناحية و أهل العريس يقعدوا فى ناحية تاية!!!

توراد الخواطر العجيب إللى حصل لى مع د.منال خلانى خدت قرار إن أى فرح ححضره فى المستقبل حكون مبادرة و حتعرف على الفريق التانى من المعازيم. و لو علاقتى وطيدة بالعروسة أو العريس حقترح إنهم يعملوا Ice Breakers دمها خفيف علشان الأسرتين يتعرفوا.

.إنتوا شايفين إيه؟ ما رأيكم دام فضلكم؟ 🙂

فيديو دليل الأم الذكية (1) – قدمى وجبات سناكس لذيذة و مغذية و سرييييعة للأولاد وقت المذاكرة

إزاى تخلى ولادك يحبوا الأكل الصحى حتى لو مكانوش منعودين عليه؟ 

تحبى تعرفى أفكار سناكس مغذية و لذييييذة و سريييييييييعة تقديمها لأولادك و هما بيذاكروا؟

حتلاقى ردود على كل أسئلتك فى الفيديو إن شاء الله 

1

2

33

عايزة نشوفى صور وجبات “مفرحة!” حتخلى ولادك يضحكوا من قلبهم؟ حتلاقيها فى المقالة دى:

مغامرات أم عسولة (1) – وجبات طوييييييييييل جدا منخارها إخترعتها لبنتى بمناسبة السنة الدراسية الجديدة 🙂

*** حتلاقى مزيد من الفيديوهات النسائية  على بلاى ليست “كونى راااائعة”. يا رب تعجبكوا 🙂 ***

لفات طرح طويلة مبتكرة (7) – حتى دبابيس الطرح “البيييئة!” ممكن تعمل لفات شيك!

سلام عليكم يا بناتيت 🙂

يا ترى بتتغلبوا على ما بتلاقوا دبابيس طرح شكلها حلو؟ الحال من بعضه! خصوصا لما يكون الإيشارب مشجر  زى إللى باين قدماكم. إستحالة مع إيشارب زى ده تشبكى دبوس فيه لمعة أو أكتر من لون و طبعا إستحاااالة أبين الدبوس البلاستيك البييييييييييييئة إللى إنتوا شايفينه فى الصورة!!!
طرحة

طيب أعمل إيه؟الحل سهل جدا بشبك الدبوس لتحت شوية زى ما إنتوا شايفين فى الصورة إللى فوق فبيستخبى خالص و بتكون ربطة الطرحة لذيذة زى الصورة إللى تحت.

scarf1

ما رأيكم دام فضلكم؟ 🙂

لفات طرح طويلة مبتكرة (6) – دخلى الطرحة فى جاكت مفتوحة

إزيكو يا بناتيت 🙂

الفكرة دى سهلة قوى و الحقيقة أنا إستويحتها من د.هبة رؤوف لإنى مرة شفتها فى ندوة و كانت مدخلة الخمار فى جاكت مقفولة فأنا فكرت أعمل نفس الحركة فى جاكت مفتوحة.

و علشان يبقى شكل الطرحة حلو حتربطيها بطريقة  زى إللى باين فى الصورة الأولى  علشان فى الآخر تبان الطرحة كأنها توب لما تلبسى الجاكت.

scraf_jacket_1

لفات_طرح_طويلة

ما رأيكم دام فضلكم ؟ 🙂

إعرفى حقوقك! أدعوكي لقراءة موسوعة “تحرير المرأة فى عصر الرسالة”

*** أنا حذفت لينكات تحميل الكتاب بعد ما علمت أن تحميل الكتب مجانا بدون إذن مؤلفيها حرام شرعا لإنه يعد سرقة لحقوق ملكيتهم الفكرية. وبالتالى أدعوكم لشراء الكتاب المذكور فى المقالة من المكتبات العامة وبصفة عامة علينا أن نتجنب قراءة الكتب مجانا دون إذن مؤلفيها. اللهم ارزقنا جميعا العلم النافع واجعلنا من الذين يعلمون فيعملون ويعملون فيخلصون ويخلصون فيقبلون. اللهم آمين **** 

#إعرفى_دينك_صح_يا_مسلمة  يا بنات مصر إحنا داخلين على مرحلة تقلق بجد فيها شيوخ بيفتوا إن المرأة المنتقبة مسؤولة عن التحرش! فلازم نتسلح بالعلم الصحيح و نعرف الحقوق العظييمة إللى كفلها لنا ديننا الحنيف…

أدعوكم لقراءة موسوعة “تحرير المرأة فى عصر الرسالة” و هى موسوعة قيمة جدا تتحدث عن:

  • معالم شخصية المرأة المسلمة 

  • مشاركة المرأة المسلمة في الحياة الاجتماعية

  • الردود على المعارضين مشاركة المرأة المسلمة في الحياة الاجتماعية 

  • لباس المرأة و زينتها 

     

  • و غيرها من القضايا الهامة المتعلقة بحقوق المرأة

و فى مدونة بتتكلم عن الكتاب ممكن تستفيدوا منها برضه لكن أنا شخصيا عندى مجلد واحد من الموسوعة و ناوية أشترى كل الموسوعة و حتكون قرآتها و تلخيصها لقراء المدونة أولوية قصوى عندى.

كنت حنسى ده لينك المدونة و هى ممتازة جدا و حاطة لينكات لنسخ إلكترونية من الكتاب على تويتر: http://tahriralmaraa.blogspot.com

و ياريت كمان تعملوا للمدونة المميزة دى فولوا على تويتر https://twitter.com/TahrirAlmaraah

فى إنتظار تعليقاتكم 🙂 

تحرير-المراة_فى-عصر-الرسالة-معالم-شخصية-المرأة المسلمة

فيديو للبنات فقط :) أنا كده! كونى حقيقية…كونى نفسك

إذا لم يكن متصفحك يدعم مشاهدة الفيديو على هذه الصفحة إضغط هنا لتشاهده على اليوتوب

 أهم ما تضمنه الفيديو

يعنى إيه كونى نفسك؟ ليه البنات فى مجتمعنا بيخافوا يكونوا حقيقيين؟ ليه (بعضكم مش كلكم) بتقلدى زميلاتك و ليه ممكن تخبى حاجات فى شكلك أو شخصيتك لما حد يتقدم لك؟ طيب إيه علاقة الكباية الهلامية إللى فى الصورة بموضوعنا؟
تدريب عملى علشان تقولى للعالم كله “أنا كده!” و ختاما أمثلة حقيقية من حياتى تفهمى منها إزاى تحررى نفسك من أسر الضغوط الإجتماعية و تكونى حقيقية و غير مصطنعة؟ إللى يعجبها الفيديو تعمل له لايك وشير وتدعيلى 🙂
و يسعدنى إنك تشوفى الفيديو البنوتاتى السابق ليا “للبنات فقط 🙂 جبتى إيه “لنفسك” فى عيد الحب؟!” http://www.youtube.com/watch?v=vx28rTMaWgA

لفات طرح طويلة (5) لما الإيشارب يكون قصير الجيش بيقولك إتصرفى :)

إزيكو يا بناتيت 🙂

شفتوا رمضان بيجرى إزاى؟ ربنا يتقبله منا جميعا و يعيننا على حسن إستغلال ما بقى منه 🙂

الإيشارب إللى فى الصورة إللى فوق أأقصر من العادى فلما حاولت ألفه بالطريقة العادية مكانش طويل بالقدر الكافى علشان كده إخترعت الربطة اللوزعية دى 🙂 إيه رأيكم فيها؟

و على فكرة ممكن تعملى حل تانى إنك تربطى الطرحة المشجرة عادى و تلفى فوقها طرحة طويلة زى ما أنا عاملة فى الصورة إللى تحت. بس طبعا لما آجى أعملها مع البلوزة إللى فوق حتكون الطرحة المخططة جوة و الطرحة السادة لونها أبيض أو أى لون سادة موجود فى النقشة. أنا بفضل الطرحة السادة تكون لون الجيب يعنى لو حتلبسى جيب بيضة يبقى الطرحة تكون بيضة و هكذا. بينى  و بينكوا أنا إشتريت البلوزة دى مخصوص علشان بتتباع بإيشاربها. ما صدقت يا بنتى بدل ما أفضل أدوخ على طرحة تمشى تشجيرتها مع البلوزة! ياريت يكتروا من الموديلات دى و يريحونا!

فى إنتظار تعليقاتكم 🙂

للبنات فقط :) رمضان فرصة الرشاقة: ريجيم رمضانى صحى و متوازن بالصور بشرط تدعو لى جااااممممد :)

إزيكو يا بناتيت 🙂

كل سنة و إنتو طيبين و رمضان كريم 🙂 فى ناس كتير قلقانين من الصيام فى الحر بس انا شايفة إنها فرصة رائعة لأى واحدة عندها كام كيلو عايزة تخلص منهم لإن الصيام فى الحر ميزته إنك مش بتكونى عايزة تاكلى خالص على الفطار و لو كنتى جربتى تصومى فى شعبان يبقى أكيد حسيتى بالحكاية دى بنفسك.

أنا الحقيقة دورت فى النت كتير على ريجيمات صحية و لقيت حاجات مش بطالة بس أنا ناوية أسهل عليكم المواضيع و أحط لكم إقتراحات لوجبات محددة:

بصفة عامة إبعدوا عن المحمرات و الشوربة الدسمة. شوربة الخضار بالكرفس و وشوربة الكوسة بالكارى و شوربة الجزر بالكارى هايلين للريجيم و أحسن حاجة علشان طعم الشوربة يكون حلو كترى البصل على الاآآآآخر لإنه مفيد جدا وبيدوب الدهون و كمان بيدى طعم حلو للشوربة و طبعا ممكن تضيفى لمون فى الآخر لو إحتجتى. الخرشوف كمان مغذى جدا و رائع فى الريجيم فى ناس بتسلقه مع الكرنب و تحط عليه لمون لإن الكرنب كمان بيدوب الدهون.

الصور دى فيها وصفة شوربة الكوسة بالكارى و الجزر بالكارى. أنا جربت الكوسة بالكارى و طلعت تحفة و مش لازم تنفذى الوصفة بالظبط و تحطى زبدة ممكن تعمليها نى فى نى الكارى بيديها طعم رائع:

أنا النهارده إن شاء الله ححط إقتراحات ليومين ممكن تقلديهم بأصناف مشابهة و ممكن أبقى أزود أصناف جديدة إن شاء الله و ححط ملاحظات جانبية بالموف :

اليوم الأول:

قبل صلاة المغرب:3 تمرات و كوب ماء (نصه ساقع و نصه من الحنفية. غلط جدا شرب الماء ساقع على الغفطار)

الإفطار بعد الصلاة:
كوب شوربه جزر بالكارى -كوب خرشوف مسلوق – كوب ارز مطبوخ بزيت نباتى – سلطة خضراء (طماطمية واحدة و كترى الجرجير و البقدنوس و الخس أو الكابوتشا و كمان الكرنب الأحمر رائع و الفلفل الرومى و الجزر. نصيحة : كترى الألوان فى السلطة. و لو عايزة تخسى بذمة إبعدى خالص عن المايونيز أو السلاد درسينج نهائى! حطى معلقة صغيرة زيت زتون و نقطة مستردة و كترى الخل و اللمون زى ما يعجبك)

أنا إن شاء الله ناوية آكل نص كمية الأكل ده بس حشرب الشوربة كلها و لما أرجع من التراويح حاخد ثمرة فاكهة (كيوى – تفاح – مشمش –برتقال –فروالة 7 قطع – جوافة) و حستنى نص ساعة و بعدين أكمل الفطار و ياريت إللى تقدر تتمشى نص ساعة بعد الصلاة يبقى روعة.

ملحوظة دمها خفيف: فى دكتورة ريجيم أعرفها بتقول إللى عايزة تخس بسرعة يا إما تمشى ساعة فى اليوم يا إما ترقص نص ساعة 🙂  

بين الفطار و السحور :

ثمرتين فاكهة أو كوب شوربة أو أى كمية خيار  و ممكن مشروبات زى القرفة و الجنزبيل و الينسون و الكركديه و النعناع

السحور: كوب زبادي مع ملعقة عسل أبيض (جيبى العسل من العطار أحلى نوع عسل حبة البركة بيعجبنى أوى طعمه لكن برضه العسل الجبلى مفيد جدا و كمان عسل  البردقوش) و ست ملاعق فول مدمس مع قطعة توست و نساكافيه بدون سكر و لبن خالى الدسم لو كنتى ممن يشربون المنبهات زى حالاتى. عايزة أبطل منبهات خااالص دعواتكم 🙂

_______________________________________________________________________________________________________

اليوم الثانى:

قبل صلاة المغرب: 3 تمرات و كوب ماء (نصه ساقع و نصه من الحنفية. غلط جدا شرب الماء ساقع على الغفطار)

الإفطار بعد الصلاة: كوب شوربه – سلطة تونة بالبطاطس بالطماطم و الخرشوف و الفلفل الرومى و الخس– رغيف عيش سن

بين الفطار و السحور : طبق قمر الدين أو قطعة كنافة و قطايف (يستحسن الحلويات تكون 3 مرات فى الإسبوع بالكتير و بدليها بفواكه. على فكرة أنا بعمل زبادى بالفواكه بيتى سهل قوى بحط كيوى أو فروالة أو موزأو تفاح أو بخلطهم كلهم مع نعلقة عسل نحل على زبادى خالى الدسم. ده أفيد و أوفر من الزبادى بالفواكه بتاع السوق بس المهم العسل يكون طبيعى من العطار أو منحل لحد تعرفيه)

السحور: 2 توست ريجيم –جبن قريش –خيارة – كابوتشا أو خس لمنع الإحساس بالعطش – ا كوب لبن خالى الدسم

الريجيم ده متوازن و سهل ولو إلتزمتى بيه حتنزلى 3 كيلو فى الإسبوع و أو أكتر بإذن الله. دعواتكم 🙂

فيديو للبنات فقط :) جبتى إيه “لنفسك” فى عيد الحب؟!

إزيكو يا بناتيت 🙂 كل سنة و إنتم طيبن بمناسبة عيد الحب 3>

الفيديو ده بيطرح سؤال مهم: إيه الفرق بين حب النفس و الأنانية و إزاى تحبى نفسك بجد؟ لو مش عارفة تشوفى الفيديو على الصفحة دى إضغطى هنا علشان تشوفيه على اليوتوب.

عارفين ليه بيطلبوا مننا فى الطيارات نلبس الكمامة قبل ما نلبسها لأطفالنا فى حالات الطوارئ؟ علشان لو ملبسنهاش الأول ممكن نتخنق و ساعتها مش حنقدر نساعدهم! ده مثل يدل على أنه لا يمكن أن نحب الآخرين إلا إذا أحببنا انفسنا أولا و الدليل قصة سيدنا عمر…

جوهر حب الذات:

إتباع امر الرسول عليه السلام “إحرص على ما ينفعك
و نص الكامل للحديث: عن أبي هريرة رضي الله عنه قال: قال رسول الله صلى الله عليه وسلم :المؤمن القوي خيروأحب إلى الله من المؤمن الضعيف وفي كلٍّ خير ,احرص على ما ينفعك واستعن بالله ولا تَعْجَز وإن أصابك شيء فلا تقل لو أني فعلت كذا، كان كذا وكذا، ولكن قل قدَّر الله وما شاء فعل فإن لَوْ تفتح عمل الشيطان” رواه مسلم.

3>  كيف أحب نفسى؟ 3> 
• التفكير الإيجابى فى كل أمور الحياة حتى المشاكل
• صاحبى نفسك 🙂
مقالتى الإنجليزية عن حب النفس:
Relationship Advise – Who Needs a Man When You Have a Jacuzzi?!
http://heba-hosny.wrytestuff.com/swa601766-Relationship-Advice-Who-Needs-A-Man-When-You-Have-Jacuzzi.htm

لفات طرح طويلة مبتكرة (4) – يا بناتيييت يا عسسسل التايجر وصل :)

إزيكو يا بناتيت 🙂

كل سنة و إنتو طيبين و أنا سعيدة إن أول مقالة حكتبها فى 2012 حتكون بناتى على الآخر 🙂

الحمد لله ربنا وفقنى و إشتريت البلوزة التايجر ذات الفرفورتين إللى إنتم شايفين الأسهم الخضرة -> عندهم.

و طبعا إنتو عارفين إن التايجر موضة. هو يعتبر موضة على طول الحقيقة عمره مابيروح زى الكاروهات و الإسود فى أبيض. مبدأيا قبل ما أأقولكم عملت ربطة الطرحة إزاى حد فيكو فيكم عارف الفرفورتين دول إسمهم إيه؟ 🙂

لو مش عارفة مش مهم و الله ما بتفرق معانا الأسماء 🙂 لكن الحقيقة الفرفورتين دول هما السبب إنى إشتريت البلوزة أساسا لإى قررت أغير إستخدامهم الأصلى و أحطهم على الطرحة زى ما إنتو شايفين فى الصورة.

فحطيت واحدة منهم فوق الطرحة البيضة و خبيت الدبابيس إللى شبكتهم فيها بالطرحة إللى مدية على بيج و سبت الفرفورة التانية حرة طليقة فوق الطرحة. ما رأيكم دام فضلكم ؟ 🙂

وإحنا كحزب المحجبات اللبيراليات ذوات المرجعية الإسلامية 🙂 برضه مسايرين الموضة و لينا ثقافتنا مش أى أى يعنى ههههههههههه

و ليا طلب أخير يا جماعة فى دعاء بيقال للناس لما بتشترى هدوم جديدة: لبست جديدا و عشت سعيدا و تزوجت تقيا و أنجبتى و ليا و متت شهيدة.

شفتوا ديننا جميل إزاى 🙂 حتى شرا الهدوم له دعاء رائع الحقيقة فياريت تدعوا لى بالجامد علشان الملايكة تقول و لكى مثله. إتفقنا؟ مستنية تعليقاتكم 🙂

نداء لكل بنت مسروعة! مقبلة على الجواز: إحذرى إقبلى هذه النوعية من العرسان!!!كان لازم أغير المقالة علشان….

1 slide 19

*** الإعتراف بالحق فضيلة و أنا لازم أعترف إنى بعد ما حضرت صالون للدكتور أحمد عمارة  إكتشفت إنى قلت بعض الأشياء الخاطئة فى هذه المقالة و قمت بتصحيحها باللون الأخضر على إعتبار إن الأخضر لون الخير  🙂 فياريت تهتموا بقراءة هذه الأجزاء. و فى نقطة تانية عايزة أوضحها الأفكار المطروحة هنا ممكن يستفيد قراء رجال برضه يعنى هى مش حكر على النساء. بمعنى إنى لو شلت كلمة “مهند” و حطيت مكانها “نانسى أو هيفا” المقالة حتبقى رجالى رسمى :). وأنا حبيت أوضح النقطة دى خصوصا لما لقيت تعليقات من شباب قروا المقالة. و كلمة أخيرة يا جماعة أنا ممكن أكون خرفت فى بعض أجزاء المقالة لكن “عدانى العيب” 🙂 فى ردودى على التعليقات فياريت تقروها هى كمان 🙂 ***

إزيكو با بناتيت 🙂

فى فرق كبير بين إنك تكونى عايزة تتجوزى و بين إنك تكونى مسروعة! على الجواز.

إن يكون ليكى فتى أحلام تتمنى ترتبطى فى يوم من الأيام ده شئ طبيعى لكن لما أى بنت بتعوز الموضوع ده زيادة عن اللزوم ممكن تقع فى غلطة شنيعة إنها تقبل أى حد و السلام! علشان تتجوز و  بعد كده تندم أشد الندم!

الحقيقة أنا فكرت اكتب المقالة دى لإنى آعرف بنات متضايقين زيادة عن اللزوم إن مفيش حد فى حياتهم زى ما يكون الجواز هو نهاية العالم! علشان كده قررت أكنب المقالة دى و حوضح فيها تلات حاجات أساسية:

1. إيه إللى بيخلى بعض البنات تتسرع على الجواز

2. إيه الخطوات الاساسية إللى المفروض تاخديها قبل!! ما تفكرى فى الجواز

3. و ختاما إيه نوعية العرسان إللى المفروض تفرى منهم فرارك من الأسد هههههههههههه.

جاهزين؟ ياللا نبدأ…بس محدش يزغدنى…إيه ده مستعجلين على إيه؟!! قطيعة تقطع الجواز و سنينه هههههههههههه

1. إيه إللى بيخلى بعض البنات تتسرع على الجواز؟

– المقارنات المتخلفة! إنت ممكن تكونى عادية فى الحياة خالص لكن  أول ما جارتك تتخطب تقوم القيامة و متقعدش! إشمعنى هى؟!! من أكثر العادات الإنسانية حماقة على الإطلاق هى إن  الإنسان يقارن نفسه بغيره. إللى بتعمل كده محتاجة تظبط إيمانيتها و تفتكر قوله تعالى:”إن سعيكم لشتى” و تفتكر كمان إن الجواز رزق ربنا حيبعتهولها فى الوقت المناسب. إللى المعانى دى مترسخة جواها, حتفرح من قلبها لما صاحبتها تتخطب قبلها, لكن لو حست بشئ من الحزن, تعرف إنها بتعمل مقارنة فة غير محلها و لازم تراجع نفسها.

الفراغ!! لو البنت كان فى فراغ فى حياتها, أكيد الجواز حيكون شغلها الشاغل!!

– للأسف ساعات المجتمع و الأهل هما إللى بيعملواالمقارنات المتخلفة و يفضلوا يخنقوا البنت فى عيشتها ( فى إعلان عجبنى قوى لعصير جهينة البنت بتقول فيه إلى طنط فلانة و فلانة وفلانة مش عارفة حتفرحوا بيا إمتى ههههههههههههه) هو فعلا سؤال رخم لما واحدة تقولك: هو إحنا حنفرح بيكى إمتى؟ زى ما يكون عندك إجابة!!! بس عارفين مرة سمعت واحدة سالت السؤال ده لبنت فى المسجد و جايز كانت بتسأله بحسن نية فردت البنت رد رائع و قالت: كله بأمر الله 🙂

2. إيه الخطوات الاساسية إللى المفروض تاخديها قبل!! ما تفكرى فى الجواز

زى ما بتذاكرى علشان تنجحى فى الإمتحان فى, فى خطوات معينة لازم تاخديها علشان تضمنى حسن إختيار شريك الحياة:

– تحلى كل المشاكل إللى تكلمنا عليها فى رقم 1 بإنك تثقى فى إن ربنا لا يقضى إلا بالخير و إن رزقك حيجيلك فى الوقت المناسب. و كمان لازم متقعيش فريسة للفراغ بإنك تملى حياتك بأشياء مفيدة مثلا إحرصى على ممارسة هوايتك المفضلة و إعملى أنشطة خيرية و إجتماعية و مهم جدا إنك تقوى علاقتك بربنا أيا كان دينك. و طبعا بالنسبة لبعض التعليقات إللى ممكن تكون مش لذيذة من الأهل أو المجتمع, فيا ريت  تتجاهليها تماما و ده حيكون سهل جدا لو علمتى الحاجات التانية لإنك لما تكونى سعيدة بجد من جواكى, محدش حيقدر يضايقك.

– لازم تكونى عارفة إيه مواصفات فتى احلامك بدقة قبل ما تبتدى تشوفى ناس و أول خطوة إنك تفهمى نفسك كويس الأول و تكونى صادقة مع نفسك. لازم تكونى فاهمة طبيعة شخصيتك و عارفة إيه مميزاتك و عيوبك علشان تقدرى تحددى صفات الشخصية المناسبة ليكى. و طبعا مش محتاجة أقولك إنك لازم تبتدى بنفسك و يكون فيكى نفس الصفات. يعنى مثلا مينفعش واحدة تقول إنها عايزة جوزها يكون واثق فى نفسه و هى معندهاش أى ثقة فى نفسها!

لو و إنت فى جلسة مصارحة مع نفسك إكتشفتى إن فى صفة تتمنيها فى شريك حياتك مش موجودة فيكى, لازم تحاولى تنمى الصفة دى فى نفسك قبل أى شئ.

( الحقيقة أنا عملت هنا خلط غير مقصود لإن طبعا شئ أساسى إنك تكونى صادقة مع نفسك و تحاولى تعالجى عيوبك بس دى حاجة بتعمليها لنفسك و ملهاش علاقة بإختيار شريك الحياة خالص.مسالة إنك لازم تكونى رائعة و محصلتيش علشان الشخص إللى بتحلمى بيه يظهر فى حياتك, ده مفهوم خاطىء.

كل المطلوب منك إنك تعرفى مواصفات فتى أحلامك بدقة وتركزى على إللى إنت عايزاه و  بعد كده يكون عندك يقين إن ربنا حيرزقك بيه. و هى دى الخطوات إللى المفروض تاخديها طبقا لكلام د. أحمد عمارة:

1- إكتبى كل المواصفات إللى بتحلمى بيها فى ورقة و متستعجليش إفضلى زودى على الورقة إسبوع ولا حاجة المهم خدى وقتك لغاية ما تحسى إنك حطيتى كل الصفات و مفيش حاجة ناقصة

2- إختارى أهم 7 صفات منهم

3- و دى ألذ حته خصوصا لو كان خيالك واسع زيى. إتخيلى إنك لقيتى الإنسان ده بالفعل و عيشى كل المشاعر الجميلة و أتخيلى أهم 7 صفات و هى متحققة فيه  بس حاولى متتخيليش ملامح شكل معينة و أهم حاجة منتسيش تتخيلى إنك بتشكرى ربنا إنه أنعم عليكى بيه

4-دكتور أحمد بيؤكد إنك لما تفضلى تعملى كده فترة بإذن الله حتلاقى الإنسان ده بكل صفاته الجميلة ظهر فى حياتك 🙂 )


و على فكرة فى دورات كتير بعضها مجانى بتعلمك إزاى تختار شريك حياتك. أنا مرة شفت إعلان فى جمعية رسالة. حاولى تستفيدى بالدورات دى و أهم عنصر لنجاحك فى إختيار شريك حياتك إنك تقتنعى من جواكى إن ده قرار مصيرى محتاج مجهود مش مجرد فستان أبيض و طرحة!!

– لازم تكونى واثقة فى نفسك وراضية تماما عن شكلك. انا مليش دعوة بعارضات الزياء إللى بيطلعوا فى الإعلانات كل إللى أعرفه إن ربنا مبيخلقش حاجة و حشة و إنك حتكونى أجمل إمرأة فى الكون فى عين الإنسان إللى حيختارك من دون الناس علشان تكونى شريكة حياته ( فى مقالة ما أروع أن تكونى المرأة الوحيدة فى الوجود فى عين حبيبك وعلى فكرة أنا عملت تغييرات فى المقالة دى برضه بناء على كلام د.أحمد و أعتقد إنها مفيدة إنكوا تقرأوها حكيت حكاية زميلتى إللى الناس إتريقوا على شكلها فى الشغل و عيطت لكن بعد كده ربنا حط فى طريقها إنسان حبها بجنون و تسمك بها بإستماتة. فياريت أى واحدة فيكم مش راضية عن شكلها تقرا المقالة دى و أكيد نظرتها لنفسها حتتغير)

لازم تكونى واقعية و إنت بتحطى مواصفات شريك الحياة لإن التطلع للكمال فى بشر حماقة كبيرة لإن عمرك ما حتلاقى عريس على الفرازة زى ما بيقولوا. لازم تكونى مستعدة إنك تحبيه حب غير مشروط بمعنى إنط بتحطى الصفات الأساسية إللى لازم تكون موجودة و بعد كده المفروض تتقبلى شريك حياتك على بعضه و متحاوليش تغيرى شئ فيه.

ممكن مثلا واحدة تقررا إنها لا يمكن ترتبط بإنسان مش بيصلى أو بيدخن لكن ممكن  يكون عصبى شوية لإنها شايفة إن العصبية إللى متدخلش المستشفى و متجيبش عاهات مستديمة 🙂 صفة ممكن تتحملها فى شريك حياتها لو توفرت فيه الشروط الأساسية.

و بالتالى إلى كل بنت حاطة مواصفات إنها عايزة زوج شبه مهند و عاطفى و حساس و ملياردير و بيرجع البيت الساعة 2 علشان يفسحها و مامته خرساء 🙂 ههههههه نصحيتى لها تروح تعيش فى المريخ لإنها بتدور على كائن فضائى ملوش وجود على الأرض!!    

(فى موضوع الواقعية أهم حاجة إنك تكونى صادقة مع نفسك و تسألى نفسك إنت تتمنى إيه بجد؟ مش إيه إللى العرف أو المجتمع قاله!. أنا حضرت ندوة قريب أكد فيها المحاضر أن السبب الرئيسى للزواج فى مصر طبقا للإحصائيات هو الضغوط الإجتماعية و هو أمر مؤسف جدا لإن فى الآخر إنتى إللى حيتتجوزى مش المجتمع! )                                                                                                                          

3.  إيه نوعية العرسان إللى المفروض تفرى منهم فرارك من الأسد هههههههههههه.   

(هنا بقى يا جماعة أنا عملت غلطة شنيعة إنى ركزت على السلبيات و إللى بيركز على السلبيات بتحصله. يعنى مثلا لو فضلتى تقولى مش عايزة زوج كذاب حيجيلك الكذاب لإن هو ده إللى إنت مركز عليه يبقى لازم نعكس لغتنا و نخليها إيجابية:

بدل ما تقولى: “مش عايزة زوج كذاب” قولى: “عايزة زوج صادق ”          

وبناء عليه حغير عنوان فقرة 3 المتخلف من: إيه نوعية العرسان إللى المفروض تفرى منهم فرارك من الأسد هههههههههههه.

إلى:

3. إيه أهم الصفات إللى المفروض تكون موجودة فى عريس علشان تقبليه من حيث المبدأ   

وطبعا حصحح التخريف السلبى إللى قلته عن كل نوع بكلام إيجابى )

بعد ما عملتى الواجب بتاعك و رسمتى صورة فى خيالك لفتى أحلامك آن الأوان إنك تخوضى معترك الحياة و تبدأى تشوفى ناس بالفعل و زى ما بيقولوا الكتاب بيابن من عنوانه. إليك بعض العرسان إللى لازم ترفضيهم من بابه!!

– جاى  فى السريع! تكونش فاكرنى كيس جوافة؟! فى رجالة بيكونوا مستعجلين على الجواز بشكل أوفر زى قصة الفنان ماجد الكدوانى فى فيلم “جاى فى السريع” لما كان عايز يشوف عروسة و يتجوزها فى يومين علشان يرجع شغله فى الإمارات! النوعية دى بتتعامل مع الجواز زى ما  يكونوا رايحين يشتروا كيس جوافة!! و إستعجالهم بيكون واضح فى إنهم بيحاولوا يحددوا تواريخ خطوبة و غيره من اول يوم و كمان بيكون عايز يريحك على الآخر علشان يخلص بسرعة فحتلاقيه بيوافقك على كل حاحة تقوليها حتى لو تخريف علشان ينجز. يا ريت النوع  ده تقوليله مع السلامة و متندميش!!

– التعديل الإيجابى للتخريف السابق: إنسان بشعر بقيمة الزواج و إنه قرار مصيرى و بالتالى يكون مستعد أن يعطيكى و قت كافى للتعرف عليه

– و فى ختام برنامج “متنقطنيش شكرا” يا ريت متردش على سؤالى بسؤال!! النوع ده بينقطنى لإنه بيقعد يلف و يدور و ميدكيش عقاد نافع. فى رجالة سطحيين جدا أول ما شكلك يعجبهم بيعتبروا إن كده تمام و لازم يكملوا فى الجوازة و مش مهم لو فيكى اى عيوب يبقى يغيرها بعد الجواز (دول ملهمش فى الحب الغير مشروط خالص!) .

النوع ده من العرسان دى بيكون خد القرار إنه عايز يكمل الجوازة و علشان يضمن إنك مترفضيهوش بيفكر قبل ما يتكلم و ممكن يلبس قناع مزيف و يفضل يتمسكن لحد مايتمكن!!! بس بيبانوا بقى لما تلاقيهم بيلفوا و يدورا و ميردوش على أسالتك بشكل مباشر لإن كل إللى يهمهم إنهم يريحوكى و يدوكى إجابة مثالية مش إجابة حقيقية!! فمثلا لو سالتى واحد هوايتك إيه فرد عليكى و قال: و إنت هوابتك إيه؟ ياريت تقوليله: هوايتى إنى أرفض الناس إلى بترد على سؤالى بسؤال! و ترويله طريق الباب. هههههههههه 

التعديل الإيجابى للتخريف السابق: إنسان واثق فى نفسه و مؤمن بأهمية الصراحة و الوضوح فى فترة الخطوبة و تشعرى بذلك من إجاباته الصريحة و المباشرة لأسلئتك و طبعا لازم تتعاملى معاه بنفس الطريقة علشان تقدروا تاخدوا القرار السليم

– إبن امه!! لو جالك عريس ساكت و مامته بتتكلم طول الوقت, ده معناه إنه عديم الشخصية و إبن امه و إنها حتحشر نفسها فى حياتكو بعد كده!!! يبقى لازم تقصرى من بابه.

التعديل الإيجابى للتخريف السابق: إنسان قوى الشخصية و بار بأهله

– إحذرى هؤلاء لإن ربنا مش بيحبهم! فى تلات صفات ذميمة جدا ربنا مش بيحبها فمش معقول ترتبطى بإنسان ربنا مش بيحبه. إحذرى تماما البخيل و المتكبر و الكداب. و من فضل ربنا و كرمه إن الصفات دى صعب إخفائها لإن البخيل مثلا حيكون بيعيط وهو بيشترى لك كيس فشار!!! فسهل قوى تكشفيه.

التعديل الإيجابى للتخريف السابق: إذا وجدتى أى من هذه الصفات فأبشرى لإن الله يحب من يتحلون بها: الكريم و المتواضع و الصادق

أنا طبعا خليت التخاريف السلبية إللى كنت كاتباها قبل كده علشان تقارنوا لإن أغلب الناس للأسف بتفكر زيى فلازم كلنا نتعود نغير طريقتنا, ياريت تشاركنا بالتعليق علشان كلنا نتعلم من بعض و مستنية رأيكم 🙂

ما أروع أن تكونى المرأة الوحيدة فى الوجود فى عين حبيبك – قصص حب مؤثرة من الحياة

إزيكو يا بناتيت 🙂

*** الإعتراف بالحق فضيلة و أنا لازم أعترف إنى بعد ما حضرت صالون للدكتور أحمد عمارة  إكتشفت إنى قلت بعض الأشياء الخاطئة فى هذه المقالة و قمت بتصحيحها باللون الأخضر على إعتبار إن الأخضر لون الخير  🙂 فياريت تهتموا بقراءة هذه الأجزاء ***

النهارده ححكيلكو حكاية بنيتن أعرفهم شخصيا ربنا أنعم عليهم إنهم عاشوا قصص حب جميلة و صادقة.

الحكاية الأولى:

بطلة الجكاية دى كانت زميلتى فى الجامعة و دفعتى و قدر ربنا إننا نشتغل مع بعض فى نفس الشركة بعد التخرج. الحقيقة هى مكانتش جميلة بمقاييس الجمال المتعارف عليها (لكن طبعا الجمال جمال الروح و ربنا سبحانه و تعالى مبيخلقش حاجة وحشة). المهم هى كان أنفها كبير بشكل ملحوظ لدرجة إنها فى اول يوم إشتغلت فى الشركة بعض الشباب (عديمى التربية!!!) عايبوا على شكلها بصوت مسموع مما دفعها للبكاء الهيستريى!

لكن يقدر الله أن يعين فى الشركة زميل يقع فى حبها من أول نظرة و عمل البدع علشان يتقدم لها و هى رفضته أكتر من 5 مرات!! و مع ذلك لم ييأس و فى الآخر قاللها جملة هزت مشاعرها: قاللها إنه لما راح يشترى شقة الزوجية إشتراها علشان هى إللى تدخلها. طبعا كلام زى ده يدوب الحجر فقررت تديله فرصة إنها تتعرف عليه وإكتشفت إنه إنسان رائع بكل المقاييس و كانت النهاية الرائعة إن هما تزوجوا و كانوا فى منتهى السعادة. و سبحان الله رغم إنها لم تكن جميلة بالمقاييس المعروفة إلا إنها أول بنت إتجوزت فى دفعتنا!!!

للوهلة الأولى قد يدل إصرار زميلنا على الإرتباط بها رغم الرفض المتكرر دليل على إنه “تبت و معندوش كرامة”!! لكن ده غير صحيح على الإطلاق. الفكرة كلها إن مشاعره الجارفة نحايتها خلته مش شايف  غيرها زى ما يكون ربنا مخلقش  إمرأة تانية على وجه الأرض. هو قال لنفسه: “هى دى إللى أنا عايزاها و مش عايز غيرها” فكان لازم يتمسك بيها طبعا لإنه مكانش شايف أى إحتمال تانى. يا بختها 🙂

القصة الثانية:

بطلة القصة الثانية كانت بتشتغل عندنا فى البيت. كان جارهم بيحبها بجنون و إتقدم لها   و رفضته كتير قوى و بعد كده إتجوزت واحد تانى و محصلش نصيب. فلما إتجوزت إبن الجيران جاله “يأس مؤقت” و خطب واحدة تانية بالفعل لكن أول ما عرف إنها سابت جوزها, فسخ خطوبته و إتقدم لها تانى!!! واحد غيره كان ممكن يشمت أو يقول فى نفسه:”Oh La La أنا مقبلش إنى أتجوز واحدة إتجوزت قبل كده” لكن كل ده محصلش لإنه كان صادق مع نفسه  و مسمحش  إن كل هذه الحواجز الوهمية المصطنعة التى خلقها عرف مجمتعنا المتخلف تقف فى طريق حبه.

و على رأى الشاعر الكبير نزار قبانى: “إنى لا أؤمن فى حب لا يحمل نزق الثوار..لا يضرب مثل الإعصار…لا يكسر كل الأسوار”  و يقول فى نفس القصيدة:”الحب مواجهة كبرى..إبحار ضد التيار” و طبعا هو  شاف الأمرين من أهله و فضلوا يقولوا له كلام زى:”ملقتش غير واحدة مطلقة تتجوزها؟” و “إنت إيه زنقك!! على كده؟ ما البنات مالية البلد؟”

هو ده الإبحار ضد التيار فى أروع صوره. عارفين إيه إللى زنقه!! ؟ نفس إللى حصل فى القصة الأولى: إن عنيه مكانتش شايفة غيرها فصمم وتمسك بيها و طبعا كل مواقفه دى أثرت فيها و إتجوزوا من 3 سنين و عايشين فى منتهى السعادة. من فضلكوا يا بناتيت إمنعوا الحسد 🙂 لكن الغبطة مسموحة طبعا…ربتا يجعل كلامنا خفيف عليها.

و طبعا كلنا عارفين قصة زواج السيدة خديجة عليها السلام من الرسول عليه السلام و إن تقريبا هى إللى إتقدمت له  🙂 و كانت متجوزة مرتين قبله  و أكبر منه ب 15 سنة و هى كانت أول بخته و مع ذلك هو كمان مقالش: “”Oh La La” 🙂  و لا إتضايق إنها خدت الخطوة الأولى و دول احسن ناس على وجه الأرض و السيدة خديجة من أعظم أربع نساء فى الجنة (الثلاثة الآخرون هن: مريم عليها السلام و آسيا زوجة فرعون و السيدة فاطمة إبنة الرسول عليه السلام).

كل ده أثار تأملاتى و سألت نفسى ماذا لو حدث العكس: ماذا لو إمرأة فى مجتمعنا المعاصر كانت تحمل مشاعر حب قوية لإنسان ما و مش شايفة غيره بمعنى إن هى كمان حاسة زى ما يكون ربنا مخلقش رجل تانى غيره على وجه الأرض غيره. تقدر تعمل إيه؟ و لا حاجة للأسف!

(فى مشكلة فى حكاية مش شايفة حد غيره. ممكن واحدة تكون حبت إنسان فيه صفات مشفتهاش فى حد غيره فلما مبيحصلش نصيب ممكن توهم نفسها إنه وحيد زمانه و مفيش حد غيره فيه الصفات إللى هى بتتمناها و تفضل تحبه بلا أمل و تجتر ذكريات الماضى!! لازم منقيسش الأمور بنظرتنا الضيقة. لو شفتى حد فيه صفات جميلة و محصلش نصيب خلى عندك يقين إنك حتقابلى حد تانى فيه نفس الصفات و أحسن لو دعيتى ربنا بإخلاص و يقين)

رغم إن مفيش أى مخالفة شرعية فى إنها تحاول بالتلميح أو حتى التصريح إلا عرفنا المتخلف لا يسمح لها بذلك و الراجل طبعا حيعتبرها “مدلوقة ومعندهاش كرامة!!”. بمعنى إن الدين حررها لكن العرف كبلها!!!

( الحقيقة و أنا فى صالون لدكتور أحمد عمارة يوم 15 مايو واحد قامت نسفت لى الفكرة دى لما قالت إنها هى إللى إتقدمت لجوزها و كان جوزها موجود و أكد الكلام ده! لأ لأ هما مكانش حد فيهم من كوالامبور!! صدقونى دول مصريين و الله 🙂 . طبعا البنت إللى تعمل حاجة زى لازم تكون ثقتها بنفسها ملهاش حدود و تتقبل إحتمال إن هو يكون مش حابب يرتبط بيها قبل ما تقدم على خطوة جريئة زى كده. و فعلا فيه بنت تانية حكت إنها فضلت تحب شخص من طرف واحد أربع سنين و لما وصلته إحساسها بشكل غير مباشر هو رفض و هى حمدت ربنا و كانت بتحكى الحكاية دى بكل فخر و ثقة و ده شئ اسعدنى جدا. فى أمل يا ولاد 🙂 )

و أنا طول عمرى مستفزة من مخالفة أشياء كثيرة فى مجتمعنا للأصول الشرعية إلا إنى كنت بالقليل فاهمة إنها لا تمت للدين بصلة. و للأسف تضاعفت كراهينى لتحيز مجتمعنا “الإسلامى!!” بشكل أعمى للرجال لما سافرت كندا لإن للأسف الغرب بيقيس الإسلام على تصرفات المسلمين! بمعنى إنهم بيعتيروا تصرفات المجتمعات الإسلامية تعبر عن جوهر الدين و طبعا أنا كنت “بتحمق “و أدافع عن دينى و أأقولهم إن المرأ ة إتحررت فى عصر الرسول عليه السلام تحرر كامل نفتقده اليوم فى مجتماعتنا “المتقدمة!!!”

أنا حاسة إنى قلبتها دراما على الآخر!!! ليه كده؟!   خلينا “نطرى القاعدة :)” بأبيات من  شعر الجاهلى كان يقولها شاعر فى غزل  حبيبته “بثينة”: (إحنا خدنا الشعر ده فى المدرسة تحت مسمى الغزل العفيف و مكانش علينا نحفظه بس أنا حفظته لإنه عجنبى قوى)

أبثيبة إنك قد ملكتى فاسجحى     وخذى بحظك من كريم واصل

فلرب عارضة علينا وصلها       بالجد تخلطه بقول الهازل 🙂  (يعنى  حتى فى الجاهلية الستات كان مسموح لهم يكحوا!!)

فأجبتها بالقول بعد تستر          حبى بثينة عن وصالك شاغلى

لو كان فيه كظفر قلامة لوصلتك أو أتتكى رسائلى

يا سلام مفيش اروع من كده. ليه أهلى مسمونيش بثينة؟ ليييييييه؟!!! 🙂

لفات طرح طويلة مبتكرة (3) – أسرع لفة شيك و ستايل :)

إزيكو يا بناتيت 🙂

اللفة دى بقى سريعة جدا و بقيت أعملها أغلب الوقت لإنها أسهل بكيتر من اللفات إللى وريتهالكو قبل كده. و ممكن الطرحة إللى جوة  أو برة تكون مشجرة أو سادة فكده ممكن تغيرى شكلك بسهولة. الطرحة الجوانية بتتلف حوالين الرقبة و بتتربط بدبوس من الجنب بتغطيه الطرحة التانية. أنا بستعمل دبوس مشبك علشان أضمن إنه يفضل ثابت.

الحقيقة أنا ستايلى فى الحجاب إنى بلبس حاجة واحدة مشجرة يا الطرحة يا البلوزة يا الجيب و نفسى يعملوا أأطقم فيها الطرحة لون الجيب علشان يريحونا. ساعات بلاقى كده فى العبايات بس أنا العبايات مش بتليق عليا. أقصى حاجة إنى بلبس فوقها بلوزة طويلة فوق الركبة زى إللى إنتو شايفنيها فى الصورة. و كمان أنا الطرحة السودة بتغمق وشى قوى فبالطريقة دى أأقدر ألبس طرحة سودة بشكل جديد أو أى لون تانى طبعا.

مستنية رأيكم 🙂

إزاى تفرضى إحترامك على أى شاب (2) – طرائف و عجائب شباب الفيس بوك :)

إزيكو يا بناتيت 🙂

فى مقالة إزاى تفرضى إحتامك على أى شاب فى النت أو فى الحياة قلت لكم إن كلمة “حضرتك” و قراية القرآن كله من الوسائل الفعالة و كمان قلت لكم إن الكتاب بيبان من عنوانه.

المهم حصل لى مؤخرا موقف حبيت أشرككم فيه:

واحد بعت لى رسالة على الفيس بوك و قاللى: “أحب أتعرف”. عادة الناس بتعمل Friendship Request من غير ما يبعتوا رسايل. فأنا بعد تفكير رديت عليه و قلت: “أنا برحب بأى صداقة أساسها الإحترام و ليا أصدقاء كتير على الفيس بوك يسعدنى إن حضرتك تكون واحد منهم” 🙂

فرد عليا و قال ما معناه:”و الله يا أختى أنا كويس قوى” . شوفتوا يا بناتيت؟ بقيت أخته  رسمى علشان سطرين كتبتهم ووحددت موقفى من الأول 🙂 و بعد كده عمل Friendship Request.

لكن سبحان الله لإن الناس مش زى بعض, فيه واحد تانى بعت لى رسالة يقول لى:”أحب أتعرف” فرديت عليه نفس الرد العبقرى فرد عليا و قال:”يعنى إنت شايفانى مش محترم؟!”

طبعا أنا كنت حقع على الأرض من الضحك لإن الكلام إللى أنا قايلاه لا يمكن يستفز إلا إللى على إللى على راسه بطحة. فرديت و قلت له:”أنا آسفة إذا كان حضرتك جالك الإنطباع ده. أنا معرفش حضرتك علشان أحكم عليك. كل الفكرة إن بحب إن موقفى يكون واضح من البداية” فرد عليا و قال:”أوك مفيش مشكلة” (و أنا مش عارفة إيه ظاهرة كتابة كلمات إنجليزى بحروف عربى. مرة واحد كتب لى نو كموينت بالعربى! عموما ده ممكن يبقى موضوع ظريف لمقالة تانية )

اللذيذ فى الموضوع إن الشاب ده معمليش Friendship Request بعدها لكن هو حر طبعا..

عموما الناس مش زى بعض خالص فى تفسيرها للأمور لكن المهم إن إنتى تكونى واضحة من البداية. و ربنا يصلح حال الجميع 🙂

ليه أنا مقتنعة إن بطلات فيلم “678” ضاعفوا مشاكلهم؟ و إزاى تحررى نفسك من أسر الماضى مهما يكون مؤلم؟

إزيكو يا بناتيت 🙂

سبحان الله! فيه حقايق معينة لما الإنسان بيفهمها بتهون عليه حاجات كتير أهمها إن الدنيا دار إبتلاء و إن حياة الإنسان فيها عمرها ما بتكون خالية من المشاكل. كل الفكرة إن طبيعة المشكلة وحدتها بتزيد و بتنقص حسب الظروف لكن القاسم المشترك إن دايما حيكون فيه مشاكل و منغصات فى حياتنا و إللى بيحدد مدى سعادتنا أو تعاستنا هى قدرتنا على التعامل مع هذه المشاكل.

فلو كل واحدة فينا إستوعبت الكلام ده بقوة, حتدى الأمور حجمها الطبيعى و مش حتضاعف مشاكلها. طبعا مفيش شك إن الإغتصاب و التحرش من أعنف و أقسى المواقف إللى ممكن بنت تواجهها لكن و إن كنت مقدرة إنها ممكن ميكونش لها أى ذنب خالص فى إللى إتعرضت له, بحس بالأسى لما بلاقى النبات بيضاعفوا مشاكلهم بدل ما يعالجوها مع إن كل شئ فى الحياة له علاج و يا ما بنات إتعرضوا لظروف قاسية لكن بالإصرار و اليقين بالله قدروا يحولوا مشكلتهم لطاقة إيجابية خلتهم سعداء فى حياتهم و حررتهم من ماضيهم و إن شاء الله فى آخر المقالة أنا حوريلكم مثل عملى على كلامى.

أنا مؤخرا شفت فيلم “678” و أثار و بعض التأملات جوايا وحبيت إنى أشرككم معايا فيها.و أنا مش ناوية أنقد الفيلم كعمل فنى لكن حتكلم على ال 3 شخصيات النسائية فى الفيلم و إزاى كل واحدة فيهم إتعاملت مع ظروفها و ليه نا شايفة إنهم ضاعفوا مشاكلهم بدل ما يحلوها. تعالوا نمسكهم واحدة واحدة.

1 – فايزة و قامت بدورها الفنانة بشرى:  فايزة كانت زوجة و أم لطفلين و كانت بتتعرض لتحرش بصفة يومية علشان كانت بتركب الأتوبيس لشغلها. الألم إللى سببهولها الموضوع ده خلالها تصب جام غضبها على الناس كلها بما فيم جوزها إللى ملوش أى ذنب حتى لما سألها مرة:”إنت ليه مضيعة فلوسنا على التاكسات و مش بتركبى الأتوبيس زى الناس؟” بدل ما تنتهز الفرصة و تجاوبه علشان يقدر إللى هى فيه, قالت له إنها حترجع تانى تركب الأتوبيس! نتيجة “قرفها” من كل الرجالة أهملت حقوق حوزها الشرعية و كانت السبب فى زيادة عدد المتحرشين لإن جوزها لما نفد صبره إبتدى يتحرش بستات تانيين و لما هى عرفت سألته بكل براءة:”ليه مطلقتنيش؟” مع إن هى نفسها مطلبتش الطلاق! و كان ممكن تطلبه و تصمم عليه كمان ولو رفض تخلعه لكن هى معملتش كده وبعد كده لامته!

مشكلة فايزة كانت ممكن تتحل من أول يوم لو كانت رجعت البيت و صارحت جوزها إن فيه واحد كان بيحاول يتحرش بيها فى الأتوبيس و إنها مش ممكن تركب أتوبيسات تانى و من هنا و رايح حتركب تاكسات لشغلها حتى لو ده أثر على المصاريف. تفتكروا لما هى تقول كل الكلام  ده لجوزها من أول مرة يحصل لها تحرش هو كراجل شرقى عنده نخوة كان حيقولها:”معلش إستحملى و إركبى ألتوبيس؟” مأظنش! ده جايز كان يشتغل أكتر من شغلة و مبيقبلش إن ده يحصل فى مراته و كمان كان ممكن يعذرها شوية لو قصرت فى حقوقه لفترة بسيطة.

لكن فايزة ضاعفت مشكلتها لما مقالتش حاجة لجوزها من أول ثانية و سابته مش فاهم أى حاجة و بسببها هو نفسه إتحول لمتحرش مع إنه فى الأصل كان إنسان كويس!

2- صبا و قامت بدورها الفنانة نيللى كريم: صبا إتعرضت للتحرش و هى مع جوزها وهو شاف ده بعنيه. مشكلة فايزة إنها كانت متألمة من إللى حصل لها و منتظرة من زوجها المساندة   و لما مكانش “مثالى” فى مسانتده لها من أول يوم طلبت الطلاق و صممت عليه. صبا كان عندها مشكلة خطيرة بتحصل لناس كتير إنهم لما بتواجههم مشكلة  مش بيشوفوا غير ألمهم هما و معاناتهم هما بس و مش بيحاولوا يشوفوا المشكلة بعيون الآخرين. جوز صبا كان حاسس بالألم الشديد مش بس لإنه شاف التحرش بعنيه بس كمان إنه كن عاجز عن حمايتها و دى حاجة بتكون قاتلة لأى رجل. فهو كان فيه إللى مكفيه و فاقد الشئ لا يعطيه لكن لإنه إنسان كويس و مقدر تماما إنها ملهاش أى ذنب و بيحبها بصدق, لما فاتت شوية أيام و هدى رجع لها و كان حابب إنهم يستمروا مع بعض لكن هى إللى رفضت كأن هى الوحيدة إللى إتألمت! لو كانت شافت المشكلة بعنيه هو كانت حتعذره و كانوا ممكن يستمروا مع بعض و يعوضوا إللى فات.

3- نيللى و الحقيقة مش عارفة إسم الفنانة الجميلة إللى قامت بدورها: بيللى هى الوحيدة إللى إتصرفت بإيجابية مع مشكلتها و مشكلتها كان لها ميزة عجيبة إنها كشفت لها إن خطيبها بيحبها حب غير مشروط و بيساندها على طول الخط  و مش بس كده ده كمان ضحى بأحلامه الفنية و إشتغل شغلة مبيحبهاش علشان يرتبطوا بسرعة. نيللى كانت على وشك إن هى كمان تضاعف مشكلتها و تخسر خطيبها و ترضخ لضغوط الأهل و تتنازل عن القضية, لكن المشاعر الصادقة إللى هو إدهالها فى قلب المحنة ساعدتها على تجاوزها.

مشكلة بنات فيلم 678 بتحصل مع بنا ت كتير مش شرط يكونوا بيتعرضوا لنفس الظروف بالظبط لكن كتير منهم للأسف بيضاعفوا مشاكلهم بدل ما يعالجوها. أنا مرة قريت عن حكاية بنت إتعرضت لمحاولة إغتصاب و محاولتش تتعالج و لا قالت لأهلها طبعا و بعد كده إتجوزت واحد و طبعا مكنتش طايقاه و فى الآخر إنفصلوا. طيب ليه متعالجتش؟ هو ده السؤال الملح! ليه تعيش بالألم طول حياتها؟ أنا مش بطلب من أى بنت إتعرضت لحاجة زى دى إنها تقول لأهلها خصوصا لو كانوا متشددين بس هى أكيد  تقدر تروح تتعالج عند المتخصصين. دى حاجة فى إيديها. حرام تعيش أسيرة الماضى طول حياتها.

و أنا فى كندا قريت قصة واحدة أمريكية إتعرضت لإغتصاب و هى عندها 5 سنين!! و كان عندها سرطان و الدكاتره قالو إن قدامها 6 شهور و تموت لكن هى صممت إنها مش حتعيش أسيرة لماضى و إنها تستحق السعادة فى حياتها. فإبتديت تتعالج و إهتمت بالجانب الروحانى لدرجة إنها قدرت “تسامح” مغتصبها!! أنا مش عارفة هى قدرت تعمل كده إزاى لكن كل إللى أعرفه نها لما إتعالجت, خفت من السرطان بدون  أى تدخل جراحى و أصبحت كاتبة مشهورة فى أمريكا و عمرها عدى ال 90 سنة!

أنا كتبت مقالة كاملة عنها بالإنجليزى ممكن تقريها هنا:   http://searchwarp.com/swa602683-Now-I-Know-That-Forgiveness-Is-Pure-Self-Love-Thanks-Louise.htm

بيتهيألى بعد القصة المؤثرة دى مفيش أى سبب يخلى أى واحدة فينا تعيش أسيرة الماضى. خدى قرار إنك تستحقى تكونى سعيدة و بإذن الله حتكونى سعيدة. و فى ختام هذه المقالة أحب أأقول لأى بنت إتعرضت لأى أحادث مؤسفة فى حياتها: حبى نفسك لإنها تستاهل إنها تتحب.

و ربنا يلطف بالجميع و يخرجنا من الدنيا الفانية دى على خير. اللهم آمين.

لفات طرح طويلة مبتكرة (2) – بصوا يا بناتيت على الساتيل ده….

إزيكو يا بناتيت 🙂

الفكرة دى بقى سهلة جدا كل إللى بتعمليه إنك تلفى طرحة سودة  طويلة  عادى خالص فوق  بلوزة سودة و بعد كده تعملى أى لفة طرحة قصيرة من فوق. الطرحة السودة مبتكونش باينة قوى زى ما إنت شايفة فى الصورة و حتى لو بانت مش مشكلة لإنك حتكونى رابطاها بطريقة حلوة.  و زى ما إنتو شايفين أنا ماسكة الطرحة السودة بإيدى الشمال بس هى مش بتكون باينىة غير من قريب قوى. المهم إنها تقضى الغرض و خلاص.

مستنية رأيكم 🙂

ربطات طرح طويلة مبتكرة (1) – بصوا يا بناتيت على النيو لوك ده….

إزيكو يا بناتيت 🙂 فى مقالة حاجات مش فاهماها فضفضت معاكم إنى مش قادرة استوعب ليه مصصمات الطرح مش معبرين الطرح الطويلة خالص! و لإن الحاجة أم الإختراع زى ما يقولوا و لإنى بلا فخر أكتر إنسانة بتحب التجديد فى اللبس و فى كل حاجة فربنا وفقنى و صممت النيو لوك إللى باين فى الصور إللى تحت.


الفكرة سهلة جدا أنا ربطت الطرحة الفوشيا بنفس طريقتى العادية و بعد كده حطيت الطرحة البضية  بالشكل إللى إنتم شايفينه. طبعا فى أفكار كتيرة ممكن تعمليها للطرحة الفوقانية و ياريت لو جربتو أى حاجة تبعتولى الصور.  مستنية رأيكم  🙂

للبنات فقط – إزاى تفرضى إحترامك على أى شاب تتعاملى معاه على النت أو فى الحياة؟!

إزيكو يا بناتيت:)

الحقيقة يا بناتيت أنا فخورة جدا إن ليا إسلوب تعامل مع الإخوة الرجالة بيجبرهم على إحترامى سواء على النت أو فى الحياة العادية. أنا بعمل حاجتين بساط جدا:

1 بخلى العلاقة فهمى رسمى نظمى بمعنى إنى بفضل أأقول حضرتك طول الوقت حتى لو بكلم حد أصغر منى

2 تقريبا بقرأ لهم كل القرآن إللى أنا حافظاه  🙂 و بفضل أأقول ألفاظ زى “ربنا يكرمك”, “ربنا يوفقك” أهو منها الملايكة تقوللى و لك مثله و منها هو يفهم إنى مش بتاعة تهريج.

و حوضح لكم السيناريو ده بمثل عملى حصل فعلا. مرة واحد دخل يعمل معايا شات على الفيس بوك ودارت هذه المحادثة الشيقة:

الشاب الروش: هاى ممكن نتعرف؟

أنا: سلام عليكم

الشاب الروش: إسم الجميل إيه ؟

أنا: الظهر بيدن بعد إذن حضرتك حروح أصلى 🙂

ما أنا مش معقول أسيب الصلاة علشان أرغى مع الأخ! الشخص ده عمره ما حاول يكلمنى تانى لإن الرسالة وصلت. طبعا ممكن واحدة فيكم تسألنى طيب إنت ليه بتعملى شات معاهم أساسا؟ السبب ببساطة إن بدور على فنانين موهبين علشان أتعاون معاهم من ناحية و علشان أنشر مواهبهم فى صفحة إبداعات القراء من ناحية تانية. فبالتالى مينفعش أنعزل عن العالم خصوصا إن الفيس بوك مليان شباب محترمين و الأعمال الموجودة دلوقتى فى صفحة إبداعات القراء إتعرفت على أصحابها على الفبس بوك.

و طبعا يا جماعة الكتاب بيبان من عنوانه: “هاى ممكن نتعرف؟” مفياهاش حاجة كلهم بيقولوا كده! لكن إللى بيجى بعد كده بيبين حاجات كتير. مثلا لما واحد يقولوللى “عجبتنى غنوتك الفلانية” أو يقول “أنا شاعر و ملحن” كده بحس إن الحوار ممكن يكون مفيد لكن لما الكلام يكون فيه ألفاظ زى “يا طعم يا جميل يا مقلوظ” بقصر على طول!

فى شاب بعت لى رسالة قال لى فيها إن عجبه قوى إنى كاتبة فى البروفايل بتاعى إن بشكر ربنا على المواهب إللى منحها لى. جملة زى دى تعكس إنه إنسان محترم على طول. فاتعرفت عليه و إن شاء الله فى مشروع تعاون مشترك بينى و بينه.

أنا بتبع نفس الأسلوب فى التعامل فى الحياة العادية و بضيف عليه إن نبرة صوتى بتكون رسمى جدا.

و طبعا إنت أيا كانت ظروفك أكيد لازم تتعاملى مع زمايلك الرجال فى الشغل أو فى الكلية. بمعنى الإختلاط شئ لا مفر منه. أنا بتعامل مع طوب الأرض بإحترام وبفترض فيهم حسن النية و لو إتضح لى العكس بقول جاى و بقصر.

الطريقة دى بتنجح بنسبة 99%. جربيها و قوليلى حصل إيه  🙂

للبنات فقط – حاجات مش فاهماها!

إزيكو يا بناتيت:)

فى حاحتين مش قادرة أفهمهم : ليه البنات “بيتزرزروا” فى مترو الأنفاق و ليه مصممات لفات الطرح “زابلين”  الطرح الطويلة خالص! تعالوا نمسكهم واحدة واحدة

ليه البنات “بيتزرزروا” فى مترو الأنفاق؟!

منظر عربية سيدات مترو الأنفاق خصوصا فى و قت الذروة يشرح القلب و علشان كده أنا مش فاهمة  ليه بسمع كلمات غريبة زى “آه يا عينى” أو “بصى قدامك يا حولة”!

يا جماعة أنا بحس بمتعة غير عادية لما رجلى تتفرم بدل المرة عشرة و لما نظارة الشمس بتاعتى تنحشر فى عينى لإن هى دى روح التضامن النسائى و “التكاتف” و لو إن التكاتف ساعات بيقلب لكتف قانونى! و كله كوم و الفعصة إللى بتفعصها كوم تانى. ما فيش تكليف يا جماعة كلنا بنات فى قلب بعض و أهى عظة ليوم الحشر  🙂

ليه مصممات لفات الطرح “زابلين”  الطرح الطويلة خالص؟!

يا حماعة نفسى أعمل نيو لوك لطرحتى الطويلة لكن مصممات الطرح زابلين أمثالى خالص! عمرى ما شفت طرح طويلة فى فترينة و لما دخلت على اليوتوب علشان أدورعلى لفات طرح مبتكرة لقيت فيديوهات كتير لكن كلها يا إما  ربطات سواريه يا إما طرح قصيرة! نفسى أفهم ليه الطرح الطويلة مزبولة كده مع إن فيه بنات كتير بيلبسوها!! حد عنده تفسير؟!