إن شاء الله أول عمل مسرحى حساهم فيه حيكون فى إسكندرية دعواتكم :) كنت هناك إمبارح و أخدت صور تحفة من عايز يمتع نظره ؟

“يا إسنكدرية يا مجننانى!” أنا بعشق إسكندرية لإنى عشت فيها أجمل سنوات طفولتى و الحقيقة إمبارح سافرت يوم واحد علشان اتعرف على الفرقة إللى ربنا وفقنى و ألفت لها بعض أغانى مسرحية حيعملوها بعد العيد إن شاء الله 🙂

و سبحان الله إن أول عمل فنى ليا حيشوفه جمهور مش نتاوى 🙂 حيكون فى إسكندرية و سبب إنبهارى إن جدتى لأمى إسكندرانية صميمة و ربنا يديها الصحة قربت على 90 سنة و لسه بتغنى الأغانى القديمة بصوت رائع. جدتى كمان كانت بتعزف سماعى فأنا و بعض الأحفاد فى الأسرة ورثنا عنها الموهبة الموسيقية فأثار تأملاتى إن إسكندرية كانت نبع الموهبة الفنية فى عليتنا و إن شاء الله أول عمل ليا كشاعرة غنائية حيكون فى إسكندرية برضه 🙂

بس عارفين إتعرفت على الفرقة إزاى؟ بعد كرم ربنا اليوتوب يشكر جدا لإن احد أعضاء الفرقة شاف شغلى و كلمنى  و بدا التعاون بيننا و إمبارح كانت أول مرة أتعرف عليهم و ما شاء الله هما كلهم رائعين. بس فى نفس الوقت لاحظت فى عينيهم إندهاش رهيييييييييييب لما شافونى داخلة لابسة واسع و طرحة طويلة لإن غالبا مكنتش هى دى الصورة إللى فى خيالهم عن واحدة بتهرج و مقلدة اللمبى على اليوتوب ههههههههه

هما مقالوش حاجة طبعا بس انا لمحت الذهول فى عنيهم و أنا بفهم الناس جدا 🙂 عموما هى دى أنا بتوليفتى العجيبة ههههههههههههههه

و كان معادى معاهم بالليل فقبل ما أشوفهم رحت زرت جدتى و كان عيد ميلادها لسه قريب و إديناها غنا أنا و هى  يمكن قعدنا ساعة بحالها نغنى ما إنتوا عارفيننى أنا ما بصدق 🙂 و سبحان الله رغم إنها ساعات بتنسى اسامى الناس أو أشكالهم بحكم سنها عمرها ما نسيت كلمات الأغانى 🙂 يا سلام عليها و هى بتغنى هان الود للفنان عبد الوهاب حاجة و لا أغنية الريع للفنان فريد الطرش حاجة روعة و الله العظيم 🙂 و قالت لى جملة كلها حكمة إمبارح: قالت إن إللى بيغنى كتير بيكون سعيد و ده كلام حقيقى فعلا. إنتوا عارفين إن فى اليابان بيعالجوا الإكتئاب بالغنى؟! و سبحان الله أيام الرسول عليه السلام كانوا بيغنوا و هما بيحفروا الخندق علشان يتحمسوا فالغنا شئ جميل جدا…فيا ريت كلكوا تغنوا و ميهمكوش إنكم تسمعوا تعليقات رقيقة زى “جتك القرف 🙂 ” إللى جت على اليوتوب هههههههههههه.

و بعد ماسيبت جدتى  رحت قعدت على البحر ساعتين و خدت الصور الجميلة إللى حتشوفوها فما عدا صورتى طبعا لإن مكانش فى مراية على الشط علشان اصور نفسى بالموبايل زى ما بعمل كل مرة 🙂

و على فكرة أنا ليا ذكريات لاتنسى فى إسكندرية:

* أول جايزة خدتها فى حياتى كانت فى الرسم و كان عندى 5 سنين و سلمها لى الفنان سيف وانلى شخصيا و كانت فى إسكندرية 🙂

* أول مرة أتحرر من اسر الكورال و أغنى سولو كان فى إسكندرية برضه

* أخدت بطولة نادى سبورتنج فى الغطس  و كان عندى 13 سنة

* كنت مشتركة فى المركز الثقافى فى سيدى جابر و إشتركت فى الزهرات و مرة طلعت الزهرة المثالية 🙂 لأ الكدب خيبة كنت التالتة لإن كان فى إتنين أأقل شغب منى هههههههه

* و الحقيقة أنا قضيت المرحلة الإبتدائية كلها تقريبا و جزء من المرحلة الإعدادية فى إسكندرية علشان كده لها ذكريات جميلة محفورة جوايا و أنا سعيدة جدا إن أول إنطلاقة فنية حقيقية ليا حتكون هناك 🙂

و أترككم تستمتعوا بالصور و فى إنتظار تعليقاتكم و دعواتكم 🙂

فيديو بركات دعاء قبل الفجر و أثره على فوزى بجايزة برنامج عصير الكتب مؤخرا…

“و ما توفيقى إلا بالله”

* إضغط هنا لتشاهد قائمة بأسماء الفائزين *

الحمد لله ربنا وفقنى و حصلت على جايزة برنامج عصير الكتب عن مؤلفات الكاتب الكبير جلال عامر فى مقر جريدة “المصرى اليوم” يوم 4 اكتوبر. و تشرفت أنا وباقى المتسابقين بمقابلة الأستاذ مجدى الجلاد الذى تفضل مشكورا بتسليمنا الجوائز و كانت قيمة جدا بالنسبة لمسابقة ثقافية. الفيديو ده بحكى فيه أثر الدعاء لله بيقين على سرعة الإستجابة من خلال قصة فوزى بالجائزة. أتمنى يعجبكم و فى إنتظار تعليقاتكم و دعواتكم 🙂

و إذا لم يدعم متصفحك مشاهدة الفيديو على هذه الصفحة إضغط هنا لتشاهده على اليوتوب.