أشغال مضحكة جت لى من المدونة و أسباب مضحكة لتأليف أغانى و مقالات و تطلع لمزيد من الضحك ليا و للقراء ههههههههه

أنا عملت غلطة فى الرسمة إللى فوق لإن المدونة إتعملت فى سبتمبر 2010 و أنا كاتبة 2009! صباح السطل 🙂 هههههههههههههه

إ ن شاء  المقالة دى تعجبكوا لإنها بتحكى أسباب (معظمها مضحكة!)  لكاتبة بعض المقالات و الأشعار. جاهزين؟ ياللا بندأ ههههههههههههه 🙂

أولا إيه إللى خلانى عملت المدونة أساسا:

* الحقيقة نا حبيت إن المدونة تكون وسيلة لتعريف الناس بفكرة Ba7ebMasr.com إللى كانت أول شرارة ألطقتها الموقف المضحك المبكى! إللى حصل لى فى قصة سندريللا الخيبة! و المقالة دى على فكرة أأقدم مقالة فى تاريخ المدونة و كتبتها يوم 4 يناير 2010 و بعتتها لبريد الجمعة لكنها غالبا لم تنشر و لما تقروها حتعرفوا ليه ههههههههه 🙂
* و على فكرة Ba7ebMasr.com هى أول مدونة لى باللغة العربية و حاليا ليس لى مدونات بالإنجليزية. يعنى متفرغة لكم خالص لإن مدونة بحب مصر  زى الفريك متحبش شريك  🙂
* الشئ اللذيذ إنى عملت شوية فيديوهات على اليوتوب خلال أغسطس 2010 قبل إنشاء المدونة نفسها
* لكن سبحان الله رغم إنى بعتبر موقع  Ba7ebMasr.com هو مشروعى القومى و حلمى الكبير و كان هو السبب الأول فى إنشاء المدونة إلا إن تجربتى فى الكتابة فى هذه المدونة  كانت و مازالت ممتعة فى حد ذاتها و الفضل بعد توفيق ربنا يرجع لمشاركتكم و تعليقاتكم المشجعة و أتمنى دايما أكون عند حسن ظنكم  🙂

ثانيا أسباب مضحكة لكتابة بعض المقالات و الأشعار و بعض الأشغال المضحكة إللى إتعرضت عليا بسبب بعض أعمالى فى المدونة:

* أاقدم أغنية فى تاريخ المدونة هى أغنية على صوتك بالدعا و الحقيقة أنا ألفتها قبل المدونة بكتير يمكن فى 2008 و كان سبب تاليفها إنى كنت بحب الغنوة الأصلية لكن فى بعض كلماتها مكنتش عاجبانى (بالتحديد جملة” لسه ياما فى عمرنا”) فغيرتها و دى كانت أول مرة أألف كلمات على جملة لحنية جاهزة لكن هى متعملتش فيديو إلا بعد إنشاء المدونة
* أما أأقدم فيديو عملته هو البانجو علينا غالى! و على فكرة بإستثناء فيديو أغنية يارب إحفظ مصرنا كل فيديوهاتى لغاية دلوقت أنا إللى عملتها بإيدى و فى إجماع من الكل إن الأفكار حلوة لكن الإخراج مش قوى :(!! و ده كلام صحيح  لإن “صاحب بالين كداب” و المفروض إنى “أدى العيش لخبزاه” علشان كده أنا برحب جدا بالتعاون مع مخرجى فيديوهات فى أعمالى القادة فياريت إللى عنده إستعداد و موهبة يبعت لى على Ba7ebMasrAwy@Gmail.com
فيديو البانجو علينا غالى إتعمل على مرحلتين:

–  كنت فى الساحل الشمالى فى شاطئ نسائى و كان أحلى حاجة فيه إنهم بيمنعوا التصوير و كان فى حمامين سباحة 🙂 فكان جو نسائى لذيذ جدا كيفنى و عمل لى دماغ ويمكن  علشان كده و أنا جوه الميه طقت فى دماغى و ألفت النص الأول من الغنوة و كنت ناوية أأقف على كده.
– لكن سبحان الله و أنا راجعة القاهرة فى السكة قلت فى نفسى طب ليه أقف على كده؟! ما أألف جزء إيجابى و فعلا ألفت الجزء التانى فى السكة و أول ما وصلت عملت الفيديو و أخد وقت لإنه كان أول فيديو أعمله فى حياتى

* أما أغنية يوتوب ىى توب كله يتوب!  فالفتها إحتفالا برمضان السنة إللى فاتت و حبيت أاقدم رسالة هادفة للشباب إنهم يقللوا الهلس بتاع اليوتوب شوية! حدكيو مثل واحد: فى فيديو عنوانه “سقوط  فستان الفنانة … فى حفلة” عارفين الفيديو ده إتشاف كام مرة؟ ……إستعدوا للصدمة: 12 مليون مرة!!  علشان كده جملة “سيب الهلس ياللا و توب!” فى الغنوة كان لها مغزى و ربنا يهدى الجميع.

و للحديث بقية طويلة إحنا لسه بنقول يا هادى بس أنا بتابع الأحداث المؤسفة فى التليفزيون  إن شاء الله حكمل المقالة قريب لما ظروفى تسمح. ياريت تشرفونى قريب علشان تقروا البقية و تكملوا ضحك و لو إن الواحد مخنوق من إللى بيحصل!

إنتهاء المرحلة الأولى من مسابقة “بإيدينا بكرة أحلى” للمواهب الفنية و آخر أخبار مشروع Ba7ebMasr.com مستنية مساهمتكم :)

 يسعدنى الإعلان عن إنتهاء مرحلة الشعر الغنائى من مسابقة “بإيدينا بكرة أحلى”  لإكتشاف المواهب الفنية فى الشعر الغنائى و الغناء و التوزيع الموسيقى و التلحين و إخراج الفيديو. 

*** إضغط على الصورة لتشاهدها بالحجم الطبيعى ***

الفائزين فى المرحلى الأولى ( الشعر الغنائى) من مسابقة “بإيدينا بكرة أحلى”  لإكتشاف المواهب الفنية فى الشعر الغنائى و الغناء و التوزيع الموسيقى و التلحين و إخراج الفيديو.وهم بالترتيب الأبجدى طارق الموجى – عبد الله مطر – محمد مرسى – مصطفى محمود – يسرى الفار – شاعر مجهول ! إضغط هنا لقراءة مساهتهم الرائعة و أتمنى لهم مزيد من النجاح و التوفيق بإذن الله

 يمكنكم مشاهدة تفاصيل المسابقة على الفيديو:

إن لم يدعم متصفحك مشاهدة الفيديو على هذه الصفحة إضغط هنا لتشاهده على اليوتوب.

* طبعا أنا طموحى أكبر من هذه المسايقة. الحمد لله ربنا وفقنى و ألفت أغانى لفرقة مسرحية بالإسكندرية و فى الوقت الحالى لدى أغانى يسعدنى  أن أقدمهم لأى فنانين موهوبين وأبرزهم أغنية “تسمة” و خاطرة “ليه برضى بقليلى مع إن حوايا كتيييييير”. أهم أهدافى الفنية هى دخول مجال الشعر الغنائى بقوة و أن يغنى أشعارى كبار الفنانين فى مصر بتوفيق الله. دعواتكم 🙂

آخر أخبار مشروعى القومى Ba7ebMasr.com

* فكرة Ba7ebMasr.com طموحة و جديدة و تحتاج لفريق عمل متكامل و متميز. و غالبا سيتم الإنتهاء من الموقع على مراحل و سنبدأ بقسم “تفانين فى حب مصر” على أساس إنها فى صميم تخصصى فياريت إللى عنده أى أفكار بناءة لتفعيل الفكرة و يحب المشاركة يطرحها من خلال من التعليق فى المدونة أو التواصل معى على إيميل Ba7ebMasrAwy@gmail.com — إضغط هنا لمزيد من المعلومات 

و أشكركم مقدما لحماسكم و إهتمامكم 🙂

ما أروع الجرأة على الحق! حاجات مبخافش منها و حاجات مضحكة بترعبنى:)

فى حاجات كتير بحمد ربنا إنى مبخافش منها لإن الخوف فيها بيكون غلط و بالعكس فى حاجات مضحكة جدا بخاف منها و حاجات كنت بخاف أعملها زمان و ربنا وفقى إنى أتغلب على خوفى. تعالوا نمسكهم واحدة واحدة:

أولا حاجات مبخافش منها:

1- مبخافش أأقول لسواق التاكسى المدخن بأدب إنه يطفى السيجارة لإنى مش مستعدة أضر نفسى و فى نفس الوقت بدعليه فى سرى إن ربنا يتوب عليه من السجاير و يهدينا أجمعين للخير (ساعات لما بندعى لغيرنا ممكن باخد سيئات بدل ما تاخد حسنات لو كنا بندعيلهم بإستعلاء و إحنا  حاسين إننا أحسن منهم و دى غلطة كبيرة! فعلا أنا ربنا معافينى من آفة التدخين لكن ممكن الراجل ده يكون عند ربنا أحسن منى بمراحل علشان كده بختم الدعاء بإنى أأقول “ربنا يهدينا أجمعين للخير” علشان أشيل من جوايا الإحساس الخاطئ إنى أحسن منه).

خلاصة الحكمة: مفيش حد أحسن و لا أاقل من حد و إللى يفترض غير كده بيكون مريض نفسيا بدرجات متفاوتة. إللى حاسس إن الناس أحسن منه بيكون عنده مركب نقص و إللى حاسس إنه أحسن من غيره بيكون عنده جنون عظمة. إنما الإنسان السوى عارف تماما إن كلنا بشر متساويين فى بشريتنا لكن مختلفين فى توجهاتنا مصداقا لقوله تعالى :“إن سعيكم و لشتى“ و “و لا يزالون مختلفين”

2- مبخافش من الميه و دى حاجة والدتى لها الفضل فيها لإنها رمتنى فى البحر ة أنا عندى 6 شهور! فطلعت بعشق الميه و بحب الرياضات المائية جدا و من كتر عدم خوفى من الميه حصلت على بطولة فى رياضة الغطس و أنا عندى 13 سنة  و كنت بنط من إرتفاع 5 متر بكل سلاسة (متفرحوش قوى لما تشوفوا الحاجات إللى بترعبنى حتقولوا دى لاسعة رسمى ههههههههههه)

3- مبخافش لما أغلط فى حق حد إنى أعتذر له و كمان مبخافش إن لو حد غلط فى حقى إنى أأقوله فى وشه. طول عمرى صريحة لكن ساعات كانت صراحتى بتقلب لواقحة لكن لما  شخصيتى نضجت بقيت أأقول كل إللى فى نفسى بهدؤ و بإسلوب غير مستفز. و ساعات بحس فى بعض المواقف إن الأفضل إنى امثل إنى مش فاهمة من باب “إن الذكى فى قومه المتغابى 🙂” لكن فى الحالة دى بحتفظ برأى لنفسى. و الحمد لله أنا حتى قبل ما أعرف إن الغيبة (الكلام على الآخرين بما يكرهوا فى غيبتهم) من الكبائر طول عمرى مبحبش أضرب إنسان ورا ظهره و بعد كده أبتسم فى وشه إبتسامة صفراء لإنى كنت و ما زلت بعتبر السلوك ده خسيس و منحظ!

4- مبخافش أجرب حاجات جديدة بالعكس أنا بستمتع بتجربة الحاجات إللى معرفهاش و ساعات ده طبعا بيكون سلاح ذو حدين :). يعنى مثلا لما كنت فى لندن رحت مطعم و لقيت أكلة معرفهاش فلما سألت الجرسون عن مكوناتها قاللى إنها نوع من أنواع السمك فقلت أجربه فطلع طعمه شنييييييييييييييييييييع و إتدبست فيه ههههههههههههههههه 🙂

و لما كنت فى كندا واحدة صاحبتى كانت شخصية مغامرة جدا و كان لها مبدأ إنها تجرب الحاجة مرة واحدة الأول لو عجبتها تستمر و لو معجبتهاش يبقى يا دار مدخلك شر و شرف التجربة يكفيك 🙂 ههههههههههههههههههه. أنا كان عاجبنى المبدأ ده بس عندى سقف إنى مش بجرب أى حاجة ربنا محرمها هى بقى مكانش عندها أى سقف فلكم أن تتخيلوا الحاجات إللى كانت بتجربها! الحمد لله ألف مرة على نعمة الإسلام لإنى حاسة لو لا قدر الله إنى لو كنت غير مسلمة بنفس روح شخصيتى المغامرة كنت اكيد ححب أجرب طعم البانجو 🙂 هههههههههههههه بس الحمد لله كل أصحابى بيشهدوا إن دماغى متكلفة من غير أى معونات خارجية 🙂

5-  مبخافش إنى  لما أغلط فى حق نفسى إنى أصلح غلطى. و ميزتى الأساسية إنى صريحة مع نفسى و ده بيكون مؤلم جدا ساعات لكن بيكون بداية للإصلاح فى نفس الوقت.

6- مبخافش من أى نوع من أنواع الحشرات و مش بعوز أموت غير الدبان و الناموس علشان مضرين لكن لما بشوف عنكبوت و لا نملة أو حتى صرصار بيتمختر فى البيت بتأمل فى بديع صنع ربنا و مبحاولش أموتهم لمجرد إنى أأقدر! يعنى هى النلمة علمت لى إيه؟ ما أسيبها فى حالها 🙂  بس مامتى و بنتى بيخافوا من الحشرات فكل ما يعوزوا يموتوا حاجة يصدرونى أنا فآجى  و تطلب معايا تأمل و أقول سبحان الله ده الصرصار بيطير فماما تهب فى و شى و تقول: مش وقته إهبدى الصرصار بالشبشب ههههههههههههههههههههههههههههههههههههههه 🙂

7- مبخافش أوقف الناس إللى بتبلطج عن حدها بمعنى إننا لو وافقين فى طابورمثلا  و حد إستهبل! و حب ياخد دورى يبقى وقعته سودة! لإنى رافضة المبدأ نفسه. أنا مرة رحت البنك الظهر و كان زحمة على آخره لكن رجل الأمن إللى هناك عارفنى كويس فجه و قال لى بصوت واطى إنه حيشوف لى حد يخلص إجراءاتى بسرعة فأنا إبتسمت فى وشه و قلت له:  أنا مرضاش إنى أتعامل معاملة إستثنائية و آخد دور غيرى حتى لو كنت مستعجلة لإن الحق حق.

ثانيا حاجات مضحكة بترعبنى:

1- بترعب من السواقة و زمان أول ما كنت أمسك الدريكسيون و أحط رجلى على البنزين يجيلى إضطراب رهيب و أعرق و قلبى يدق و بعد ما عملت الرخصة و طلعت بالعربية أول طلعة رحت مخيشة! فى عربية الجيران و دى كانت أول و آخر مرة أسوق ههههههههههههههههه 🙂 (وبينى وبينكم أنا شايفة إن عدم السواقة بالذات فى مصر نعمة لإن إلى بيسوقوا دمهم بيتحرق فعلى إيه يعنى؟ 🙂 )

2- أنا كنت إنتحارية! فى تعدية الشوارع زى كل المصريين قبل ما أسافر كندا لكن علشان فى هناك إحترام للمشاه و أماكن مخصصة للتعدية من ساعة ما رجعت و أنا بترعب لما آجى أعدى شارع و بستنى لما ألاقى ناس إنتحاريين تانيين معديين و أمشى معاهم و بيكونوا هما حائط صد بينى و بين العربيات :). و مرة مكنتش عارفة أعدى الشارع خالص علشان طوفان العربيات مش عايز يقف فلما سألت الناس إللى على الرصيف التانى إنتوا عديتو إزاى قالوا لى: إحنا إتولدنا الناحية دى 🙂 ههههههههههههههههههههههههههههههههههههههههههههههههه

حاجات كنت بخاف أعملها زمان و ربنا وفقى إنى أتغلب على خوفى:

سبحان الله رغم إنى طول عمرى بغنى على المسرح إلا إنى كنت بخاف لدرجة الإرتعاش من الكلام قدام ناس كتير بس الموضوع ده كان غايظنى قوى و كنت بفضل أأقول لنفسى إن هما ناس زيى زيهم فليه أخاف منهم؟!!! و صممت أغير الموضوع ده فى نفسى  و أنا فى كندا و الحمد لله بتوفيق ربنا أولا و بالإصرار ثانيا أخدت جوايز فى ال Public Speaking و زادت جرأتى فعملت Standup Comedy قدام الجمهور  و الحمد لله الناس ضحكت ههههههههههههههههههههههه

ياريت إنتوا كمان تحكولى على نفسكم: إيه الحاجات إللى مبتخافوش منها? و بتخافوا من إيه? و قدرتم تتغلبوا على خوفكم من إيه؟ مستنية تعليقاتكم 🙂

مبادرة “فن هادف فى حب مصر” إللى قدرت بالعافية! أوصلها للفنان محمد صبحى إمبارح…

إتشرفت إمبارح بحضور ندوة للفنان محمد صبحى فى مركز إعداد القادة. و الحقيقة أنا مش ناوية ألخص لكم الندوة زى العادة لإنكم سهل قوى تشوفوها على النت لكن حركز على الجملة إللى موجودة فى الصورة إللى فوق. الجملة دى قالها الفنان محمد صبحى أكتر من مرة إمبارح و أنا شايفة إن كل واحدة فينا محتاج يعمل ثورة داخلية على نفسه و ينوى بإخلاص إنه يغير من نفسه للأحسن علشان يقدر ينفع نفسه و أسرته و مجتمعه و بلده و الحقيقة أنا الموضوع ده كان مؤرقنى من فترة طويلة و علشان كده كتبت خاطرة ليه برضى بقليلى مع إن جوايا كتيييييير

و سبحان الله أنا إلى حد ما طبقت نصيحة الفنان محمد صبحى من خلال المبادرة إللى عرفت أوصلها له بالعافية! من خلال مذيع لإن كان حواليه حشود من المعجبين و لما حاولت اطلع  أديها له على المسرح إتهزقت! بس مش متضايقة طبعا لإنى عاذرة المسؤولين هناك 🙂

إليكم نص المبادرة باللون الأخضر (لون الخير 🙂 ) و تعليقات عليها بالأزرق و يا ريت تقروا التعليقات لأنها مهمة 🙂

بسم الله الرحمن الرحيم
مبادرة “فن هادف فى حب مصر”

 

إلى الفنان المبدع محمد  صبحى:
يسرنى أن أقدم لحضرتك هذه المبادرة و أتمنى أن تتحمس لها على إعتبار أنك رائد الكوميديا المسرحية الهادفة فى مصر.

 مبادرة “فن هادف فى حب مصر” تهدف لتشجيع المواهب الشابة على تقديم فن مسرحى هادف على أن يتم إستخدام عائد حفلاتهم المسرحية فى مشاريع تنموية بناءة لمصرنا الحبيبة منها على سبيل المثال لا حصر المدينة التكنولوجية للدكتور أحمد زويل.

فكرة المبادرة:
•    يتم الإعلان عن مسابقة لكتابة سكتشات كوميدية هادفة مدتها لا تزيد عن 10 دقائق لتسهيل الكتابة و ستقوم حضرتك برئاسة لجنة التحكيم و إختيار أفضل 30 سكتش ليتم عرضهم فى حفل مسرحى ممتع و منوع
•    لضمان الإستفادة من هذه المسابقة أتمنى لو حضرتك تعطى الكتاب المشاركين فى المسابقة ورشة عمل أو محاضرة تشرح فيها خصائص الإسكتش الكوميدى الناجح.
•    بعد إنتهاء المسابقة و إختيار الإسكتشات الفائزة يمكن أن تتم مسابقة أخرى للموهوبين فى التمثيل أو يتم الإستعانة بممثلين من معهد الفنون المسرحية لضمان سرعة التنفيذ
•    يمكن تقديم الحقلة بإمكانيات بسيطة فى مكان عام كالأزهر بارك مثلا أو يمكن تمويلها فى حالة العثور على رعاة (sponsors) يتحمسون للمبادرة

قيمة المبادرة و الفوائد المرجوة منها:
•    إستغلال المواهب الفنية فى المساهمة فى المشاريع التنموية
•    تقديم فن هادف للجمهور و إمتاعهم بعرض مسرحى منوع
•    إحياء  فن الإسكتش الكوميدى الذى إندثر فى مصر
•    تبنى المواهب الفنية الشابة

أرجو أن تتحمس حضرتك لهذه الفكرة و تدعمها و أكون شاكرة لو تم الإتصال بى فى حالة تفعليها لإننى أريد أن أشارك فى المسابقة ككاتبة. و يمكن التواصل معى  من خلال الموبايل (هو أنا مجنونة أحط رقمى على المدونة ههههههه 🙂) و البريد الإلكترونى Ba7ebMasrAwy@gmail.com  
و لك جزيل الشكر
هبة الله حسنى
كاتبة و خبيرة تسويق إلكترونى
www.Ba7ebMasr.com
www.HebaHosny.net

ملاحظات هامة على المبادرة السابقة:

1- هذه المبادرة يمكن تعميمها لكل نواع الفنون مش بس الكتابة الكوميدية (طبعا أنا ركزت على كتابة الإسكتش الكوميدى لأسباب خاصة بتقييمى لموهبتى الفنية و أفضل مجال مناسب ليا. الحقيقة أنا  قررت أركز فى كتابة الكوميديا الهادفة سواء فى صورة أغانى كوميدية هادفة أو شعر حلمنتيشى غنائى كوميدى و هى تقريبا غير موجودة فى مصر و أيضا كتابة إسكتشات و هى عبارة عن مشاهد قصيرة يسهل كتابتها للكتاب المبتدئين)

2- رغم سعادتى بتسلم الفنان محمد صبحى للمبادرة إلا إنى أخشى من شيئين:

  * إن المبادرة ممكن تكون وقعت من إيده فى من كتر تزاحم المحبين عليه 🙂

 * بعد كلامه بالأمس جائنى إنطباع أنه سيركز كل طاقته على مشروع المليار لتنمية المناطق العشوائية و كمان هو مشكورا بيدرس تمثيل  للموهوبين بالمجان  فى مدينة سنبل و  بالتالى مش عارفة وقته حيسمح بتبنى المبادرة و لا لأ و لذلك أضعها بين أيديكم و إللى يقدر يفعلها بأى شكل من الأشكال يكون خير و أهه حيكون فى ميزان حسناتى إن شاء الله 🙂 .و على فكرة أنا ميهمنيش حقوق الملكية الفكرية لأى مبادرة اعلنت عنها هنا  مثل مبادرة طقل يعلم طفل و لا حتى فكرة  Ba7ebMasr.com. كل إللى يهمنى إن الأفكار ترى النور و تتحول من أحلام  لواقع.

يا ترى إيه رأيكم فى فكرة مبادرة “فن هادف فى حب مصر” و إيه أفضل السبل لتفعيلها من وجهة نظركم ؟ مستنية أرائكم و مشاركتكم 🙂

قنابل فجرها دكتور طارق سويدان فى ندوة “الحرية طريق الريادة”: المرأة يمكن أن تتولى الرئاسة و حد الردة قرار سياسى و …

تألق العلامة  الدكتور طارق سويدان فى ندوة “الحرية طريق الريادة” التى شرفت بحضورها فى ساقية الصاوى يوم 3 يونيو و إليكم بعض القنابل التى فجرها بعد بحث مستفيض و دراسة و مؤيدة بالأسانيد الشرعية:

– من أروع ما قاله دكتور طارق أن العلماء الذين  يحرمون المظاهرات يكرسون فكرة أن الدين أفيون الشعوب!! رغم أن الرسول عليه السلام أكد أن سيد الشهداء هو من يقف فى وجه حاكم ظالم

– كما أكد دكتور طارق إن اللخبطة حالة طبيعية بعد أى ثورة و إن فى المتوسط الدول بتاخد 13 سنة على ما تقف على رجليها و كمان قال إن التعدد الصارخ فى الأحزاب وضع طبيعى لدرجة إن اليابان إتكون فيها أكتر من 400 حزب بعد الحرب العالمية التانية. لكنه نصح الأحزاب الناشئة أن “تترك الباب موارب” لإنها حتما ستحتاج أن تتحالف مع أحزاب أخرى.

– “من بدل دينه فاقتلوه” كان قرار سياسى أخذه الرسول عليه السلام حينما قالت طائفة من اليهود: آمنوا بإله محمد بالنهار و اكفروابالليل!  . فجاء أمر الرسول درءا للفتنة و خاصا بهذا الموقف. و الحقيقة أنا كان دايما عندى مشكلة مع حد الردة و حسمها دكتور طارق بدليل ناصع أن الحديث لا يمكن أن يلغى القرآن و قد قال تعالى: “لا إكراه فى الدين“. و تساءل دكتور طارق تساؤل منطقى: ما قيمة أن يجبر الإنسان على أن يعتنق دين معين؟ سيتحول لمنافق و يكون وبال على الدين مصداقا لقوله تعالى:”لو قعدوا فيكم ما زادوكم إلا خبالا”  (خبالا تعنى فسادا)

وأ ثار ما قاله تأملاتى فى ما يحدث فى السعودية من إجبار! الناس على الصلاة! هذا حمق لإن الأصل أن يختار الإنسان عبادة الله لا أن يجبر عليها و طبعا لا أحتاج  أن أؤكد أن هذه الممارسة القهرية ليست من الإسلام فى شئ.

– “ما افلح قوم ولوا أمرهم إمرأة” كان هذا الحديث له مناسبة معينة و ليس مقصود على إطلاقه و أكد دكتور طارق سويدان ان الإسلام يجيز تولى المرأة لجميع المناصب السياسية بما فيها الرئاسة و القضاء. يحيا العدل كده بقى أأقدر أرشح نفسى 🙂 هههههههههههه

– التماثيل حلال ما لم تعبد و بالتالى فإن فن النحت حلال بشرط ألا يكون خارج عن حدود اللياقة. و قدذكر د.يوسف القرضاوى كلام مشابه إلى  حد ما فى كتابه الرائع “الإسلام و الفن” و قال أن الأمر يرجع يالأساس لنية الفنان فإن نوى بفنه مضاهاه خلق الله فهو آثم و من لم ينو فلا إثم عليه.( و بالنسبة للموسيقى فطبعا د. يوسف القرضاوى أجاز جميع الآلات الموسيقية و مع إحترامى للذين يحرمون الموسيقى أنا أعتبر أن القول بحرمة الموسيقى إدعاء ينافى الفطرة لإن الكون كله سيمفونية!!)

هذا أهم ما ذكره دكتور طارق سويدان فى ندوته الرائعة. أتمنى أن تكونوا إستفدتوا منها و مستنية تعليقاتكم 🙂